Read Khiamniungan Naga Ngiokhem 27 Bible Online

Ngiokhem 27 - Khiamniungan Naga bible

Ngiokhem 27

¹Nungai Mosaüh Israel aheihoi nousoko aikü khaiuniahoi nouso tü ngiom, “Lonyi ngo asam hau ayam hantsünso apem lükankei.

²Asamüh Yordan Haiu yantsün ajekhaiu nai naiuso asam Goaüh asam hau kiutsün goumchi nai naptsün ajekhaiu nai, asamüh lung asong ajantso loungpoikhiam tsom- lutkü kihtaiuau noin,

³küta nungso chiai nung ngiokhem nouso naiuso atsandetsünso apem lüsat. Tilai APAOU asam paosiposo Goa nou tha- lotaiutsün memei naiuso atsüomei goumchi nai asam nappe,

⁴naiuso asam Yordan Haiu etsai shi-e, ngo lonyi asam tü ayam hantsünli, loungpoikhiam nou tsomkü Ebal king nai lükitaiu.

⁵Sun jengtsaiu tsühakü lung noulu latsün nungai amthang tsak lüshan,

⁶tiautenai APAOU asam Goa hau asamüh amthang tsak shan naito tsüpaikü noitsün lung nou lah ao noin. Nungko asamüh ajah ao nou chaithio nouso thioau noin,

⁷naiuso nungai asam aloat chaithio nou thio- küta nokmei chaithio nouso asamüh lühe, küta APAOU asam Goa khako monglingkü lüthe.

⁸Loungpoikhiam nou tsomkü kihtsün lung nou tü Goa ngiokhem nouso apem sasakü lüsat.”

⁹Naiuso Mosaüh Levi mesonhoi nouso ko hakü Israel hai apem tü ngiom, “Israel hai, ngü tü mongkiukü anglu. Lonyi asam APAOU Goa khaiuniaso hau iula-iu;

¹⁰nungtiphe ngo lonyi asam hau kiutsün Apa ngiokhem nouso apem angkü lükankei.”

¹¹Nungai Mosaüh Israel khaiunia hoi nouso tü ngiom,

¹²“Asamüh Yordan Haiu yanküta- Simeon, Levi, Yihuda, Isakar, Yosep naiuso Benjamin kau nouso tü ouk nou weluttsün taoko Gerizim King nai tsa au noin.

¹³Naiuso tilai athesan nou welutte- Reuben kau, Gad kau, Asher kau, Zebulun kau, Dan kau, naiuso Naptali kau nouso Ebal King ai tsa au noin.

¹⁴Nung ngio nouso Levi haiüh sang asong nou welutte.

¹⁵“‘Sotsom goa, lung goa, pai nou shantsün, tsüdekünai sun nou shankü akau ai amkhamtsünso sauhai lünou Goa nou athesan kiuji, APAOU nou sotsom goa chinyanji.’ “Naiuso khaiunia apem nou thalakü ngio-e, ‘Amen!’

¹⁶“‘Sauüh apa po naiuso nyiu asuh tsühate, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

¹⁷“‘Sauüh meshen phaosipo elung soisoiji, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

¹⁸“‘Sauüh niopek khaiunia ayam tsüthakü nai niaji, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

¹⁹“‘Sauüh melemaohai, mejetthso hai, naiuso jihi hai, ngiotsüo phok- lean kiu-e, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

²⁰“‘Sauüh meshen po tsam- mongnyiu ko ajisiwop chhikü meshen po lomiamji, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

²¹“‘Sauüh thainian tü ajisiwop chhiji, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

²²“‘Sauüh meshen nuosinio ko ajisiwop chhiji, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

²³“‘Sauüh meshen tsammongnyiu ün nyiu ko ajisiwop chhiji, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

²⁴“‘Sauüh akau ai khaiunia loatji, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

²⁵“‘Sauüh aphio tsünoikün khaiunia tsak loat au chai louji, Goa nou athesan kiuji.’ “Naiuso khaiunia apem nou thalakü ngio-e, ‘Amen!’

²⁶“‘Sauüh Goa ngiokhem nouso naiuso atsandetsünso angio tsüangji, Goa nou athesan kiuji.’ “Naiuso khaiunia apem nou thalakü ngio-e, ‘Amen!’