Read Khiamniungan Naga Ngiokhem 28 Bible Online

Ngiokhem 28 - Khiamniungan Naga bible

Ngiokhem 28

¹“Ngo lonyi asam hau kiutsün athoilut nouso apem kankeiao APAOU asam Goa ngio asamüh mongkiukü ange tünaito, APAOU nou amao mele apem khako asam songkü shankiu-e.

²APAOU asam Goa tü angio angkü lüthe, naiuso nung ouk nouso apem asam ün noi-e:

³“APAOU nou asam eiu nai naiuso noksong nai ouk kiu-e.

⁴“APAOU nou asam thsoso piakü, pai eiu ao eiu tsükhemkü, naiuso jang si onnemok piakü ouk kiu-e.

⁵“APAOU nou asam khülam naiuso nungko nou eheshiu khemsantsün ouk kiu-e.

⁶“APAOU nou asamüh chhitsün chhisiya alum nai ouk kiu-e.

⁷“Asam ehsoüh tilai asam kome, APAOU nou ngüso shiolo-e. Ngüso asam komau yam tsak ai shi-e, lüko yam chinyat ai khupenge.

⁸“APAOU asam Goaüh asam chhisiya ouk kiu-e naiuso asam khü- lam taiutsün pei nouso meankiu-e. Apaüh asam hau kiutsün goumchi nai asam ouk kiu-e.

⁹“Asamüh APAOU asam Goa ngio angkü apaüh thoiluttsün alum chhi naito, apaüh thalotsünli, asam apa khaiuniaso iula-i-e.

¹⁰Nung goumchi nai khaiunia apemüh APAOU nou asam meshen khaiunia theao chosan ta nge-e, küta ngüso asam lün hate.

¹¹APAOU nou asam paosiposo tü asam hau kiuao thalotaiutsün goumchi nai asam thsoso piakü naiuso eheshiu tsükhemkü kiu-e.

¹²Apaüh atao tongtü nouko apaüh kamtaiutsün maou ainou ah ou honge naiuso asam chhi apem ai ouk kiu-e, nungai asamüh mele piakü hau laiukiu-e, lüko asamüh to tsülaiulo-e.

¹³APAOU asam Goaüh mele nouso ongko ahoilut ao tsüdekü ahei ao asam shankiu-e, ngo lonyi asam hau kiutsün apa athoilut nouso apem mongkiukü lüthe, nungaito asam asaita tsülaoatkü shingkü khu-e.

¹⁴Lüko asamüh ti yamko lünou nungso angio tsüangkü lathe, tsüdekünai amao goa nouso layathsüo naiuso la amkham.

¹⁵“Lüko asamüh ngo lonyi kiutsün APAOU asam Goa athoilut nouso naiuso ngiokhem nouso mongkiukü tsüange tünaito, nung athesan nouso apem asam da thawao-e:

¹⁶“APAOU nou asam noksong nouso naiuso eiu nouso athesan kiu-e.

¹⁷“APAOU nou asam chihsikhiam naiuso nungko nou khemsantsün eheshiu nouso athesan kiu-e.

¹⁸“APAOU nou asam hau thsohai thsaothsaokü, chihsikhiam tsümei- kün, tsam thainian thsaothsaokü, onnemok thsaothsaokü kiukü asam athesan kiu-e.

¹⁹“APAOU nou asamüh chhitsün alumai athesan kiu-e.

²⁰“Asamüh tsümeikün chhiküta APAOU wanan naito, asam liukü si moisemkü molomowankün lektso, apaüh asam dongai aküothe, apülai, naiuso omhe nou kankü shi-e.

²¹Asamüh thaloau noitsün goumchi nai asam tsaktso tsüpoi taiukü mothamokün lektso apaüh asam dongai akiasiya tsülaokü honge.

²²APAOU nou asam tü asonnetsün akiasiya, tsapomkia naiuso kiyashi kia nou shiuh-e, apaüh asam chih- sikhiam molotheankün lektso apaüh aje thatü thsüokü jetsün honge. Nung aküothe asam moeankün lektso asam ko noi-e.

²³Ah nou tsü ou-e, naiuso asam goumchi sunli jüokü iula-e.

²⁴APAOU nou asam mothamokhemkün lektso, ah ou liko, ahthei ahsheih honge.

²⁵“APAOU nou asam, asam ehso hau shiolowan-i-e. Asamüh ngüso yam tsakai shikü kome, lüko asam ngüso ainou yam piakü nai khupenge, naiuso asam da ti tha- waoji, nung epnai goumchi khaiunia apem lekkate.

²⁶Asam tilai eane, waio nouso naiuso thainian nouso shikü asam mea heane, naiuso nungko nungso komanau sautso tsünoi-e.

²⁷APAOU nou Ijip hai tü chhitsünli asam dongai chaikia nou honge. Apaüh asam pem chaikia tsangkü mou satkü iula-i-e. Asam pem khun yan nou meankü noi-e, naiuso nungüh asam tü yane, lüko nung tilaitso tsüthasange.

²⁸APAOU nou asam monghenkü iula-i-e, apaüh asam tü niopek nou si apülai-itsün nou shiuh-e.

²⁹Asam anyi awon nai niopek khaiunia tsakli sao-ekei-e, naiuso asamüh asam yam epao tsüshio-e. Asamüh chhisiyatsün tilailünou tsüomeikü tsükhu-e. Asam thangmangkü naiuso kaoatkü lu noi-e, naiuso nungai asam haloau sau tsünoi-e.

³⁰“Asam menyiuthso tsak ko tsamsigoh yangau khemtaiu-e- lüko nung menyiuthso amaohai tsaküh tsamsigoh yangane. Asamüh tsam tsak lahsane- lüko asam nungko tilaitso tsükih-e. Asamüh sainaoshep eiu a lüko nung sainaoshep tilaitso tsühe-e.

³¹Asam thainian nouso asam niovei nou ep epkü loate, lüko asamüh nung nyih tsaktso tsühe-e. Asamüh thapkü noikü asam gado so tenlükhunane, naiuso nung gado nouso asam hau laokü tsükiushi-e. Asam onnemokso asam ehso hau kiu- wane, naiuso nungko asam haloau sautso tsünoi-e.

³²Asamüh thapkü noikü asam thso melothso naiuso menyiuthso nouso melemaohai sua ao kiuwane. Ajekhaiu pungkü asam thsoso laokü shijimoko ta thape noinou asam nioau kiakü shiane.

³³Asam kowekü chhitsün ainou ti moyamhekünai melemao tsaküh asam chihsikhiam apem lowane, lüko asam tü angja omhe naiuso athang- mang kiutsün tsülaokülu noi-e.

³⁴Asam angja nou asam monghenkü iula-e.

³⁵APAOU nou asam hok nouso tilaitso amei tsüyangkün chaikia nou meani-e; khaiu ainou hok saokü chaikia nou meankü noi-e.

³⁶“APAOU nou asam naiuso asam paosiposo nung khako tilaitso tsükih lekü nou melemaohai goumchi tsakai asam nokpaoko hakü kankü khu- wane, nungai asamüh paisilung nou shantsün goa nouso tü amkhame.

³⁷APAOU nou asam pengpunkü khuau goumchi nai khaiuniahoi nou asam tü ti thawao nung ngem nou lekkate; ngüsoüh asam alonyai ao the-e, naiuso alekkatao iula-i-e.

³⁸“Asamüh lelo piakü lethio-e, lüko be-eiuyam thsaothsaokü lu yamhe-e, tiautenai asam chihsi- khiam jongku nousoüh heane.

³⁹Asamüh sainaoshep thomkü nung- tü paotsange, lüko asamüh nungtü eiusantsün shep tsüpane, tsüdekünai nungso ainou theng tsüshiu-e, tiautenai nung sainao nouso suong nou heane.

⁴⁰Asam goumchi apemai Olip pai nouso samsane, lüko asamüh Olip khiam intso lüko tsütaiu-e, tiautenai Olip shep nouso yaang ta thamkü saliane.

⁴¹Asam tü melothso naiuso menyiuthso chetlute, lüko ngüso mowane, tiautenai ngüso ehli taoko sua ao kankü khuwane.

⁴²Asam paisam aosam naiuso chihsam khiamsam nouso apem paosuong nou heane.

⁴³“Asam goumchi ai kihatsün me- sanhoi nouso kongsimongkü iula-e, lüko asam to tsaosilaokü shiane.

⁴⁴Ngüsoüh asam hau laiukiuao chai nou taiu-e, lüko asamüh to ngüso hau laiukiuao tsütaiu-e. Athon nai ngüso asam chiai nokpao iula-e.

⁴⁵“Nung aküothe nouso apem asam khütha ai shi-e, naiuso nungso asam ko asam molotheankhemkün lektso noi-e, tiautenai asamüh APAOU asam Goa tü angio tsüang naiuso apaüh kiutsün ngiokhem tsükankei.

⁴⁶Nungso Goa ün mikhem mitha nouso asam naiuso asam thsaosi- thsoso chiai asaita noi-e.

⁴⁷APAOU asam yam pungkü nai ouk kiu-iu, lüko asamüh apa monglingkü naiuso mongpem amongling nou apa tsüyathsüo.

⁴⁸Nungtiphe APAOU nou asam thako hongau noitsün ehoi nouso asamüh yathsüoe. Asam alum yamai naiukü, lekü, naiuso tsosa noi-e. Asam molotheankün lektso APAOU nou asam tü thsüokü thang- mange.

⁴⁹Asamüh ngio tsüngekün mele tsak, goumchi athon tsak ainou APAOU nou asam thako nialokü shi-e. Ngüsoüh asam tü letche ehpoli nap poh-e.

⁵⁰Ehen tsüdekünai ashe sautü lünou ngüsoüh atsüojinyang tsühane naiuso amongkia noulu ngüsoüh chhi-e.

⁵¹Ngüsoüh asam tsam thainianso naiuso chihsikhiam heane, küta asam naiusile nou eane. Ngüsoüh asam chihsikhiam, theng, Olip khiam, tsam thainian tsüdekü- nai onnemok titso tsüpoi-e, naiuso asam eane.

⁵²Ngüsoüh APAOU asam Goaüh asam hau kiutsün goumchi nai noksong nouso apem komane, naiuso asamüh monglamtsün be atsokting nouso loiane.

⁵³“Tilai asam ehsoüh asam nok- song nouso thalowanji, asam thatü naiuphe APAOU asam Goaüh asam hau kiutsün thsoso lüko asamüh heane.

⁵⁴Asam ongko khaiunia amei, sau ti angja tsünoikü nai chetsinyimkü noin, asam noksong thalowantsün taoko apaüh lüko me- shen thsoso heane, tiautenai apaüh heau amao chihsikhiam ti tsünoishi. Apaüh meshen nio tsüdekünai meshenüh tsüojintsün tsammongnyiu hau lüko, naiuso apa thso apoi nouso hau lüko tsüwaoha-e.

⁵⁵

⁵⁶Menyiuhai ongko lüko sauhai atsüomei tsamkhaiu nai chetsinyimkü noin nung thaiuko apa tilaitso tsütsakeide ngüsoüh lüko aya nousoüh lilu chhi-e. Tilai apa noksong eh nou tha- lowanji, apa thatü naiukü iulaküta meshen thso lo chettsün tsüdekünai nungthanko chetshitsün akauai heane. Apaüh nung meshenüh tsüojintsün tsammongpo naiuso thsoso hau lüko tsüwaohakü heane.

⁵⁷

⁵⁸“Asamüh nung thsam nouko sattaiutsün Goa ün atsande nouso apem mong kiukü angio angkü tsüthekü naito naiuso asamüh APAOU asam Goa athanga naiuso ahattao lümeikü nou nian asuhat tsükiukü naito,

⁵⁹apaüh asam naiuso asam thsaosithsoso khütha nai amei ao tsüshiokün akia naiuso ahat ao tsak nou tilaitso alao tsüyangkü imkia honge.

⁶⁰Asamüh Ijip nai akia tsümeitingkü waohetsün apemli loüh jam apaüh asam khütha nai kankü shi-e, naiuso asam tilaitso tsü- meila-e.

⁶¹Nung Goa ün ngiokhem nouso naiuso atsande nouso sattaiu- tsün thsam nouko tsühakü nou akiasiya, naiuso imkia in diodio honge, naiuso asam lomowane.

⁶²Asam maou nai kianthsüo nousoli piakü iula lüko, asam thsao- thsaokülu aasane, tiautenai asamüh APAOU asam Goa angio tsüang.

⁶³APAOU nou asam shingkü khu-iau naiuso haove nai piakü sungiao mongkiukü lotsünli, asam lomo- wanao naiuso lotheanao lüko apaüh asam khütha nai ayangelat tsünoikü chhi-e. Asam kihloau noitsün goumchi ainou asam seksankü wane.

⁶⁴“APAOU nou asam aniokun tsak ainou goumchi aniokun tsak ai ta mele apem ongko pengpuni-e, nungai asam tsüdekünai asam paosiposoüh tilaitso tsüamkhamdekü nou goa nouso, paisilung nou shantsün goa nouso tü asamüh amkhame.

⁶⁵Asamüh tiaitso nokmei tsüeppe, asam tengkhaiu ün ta jonau asamüh athang tsünoi-e, APAOU nou asam amongtsam tsünoikü yangelattsün nou, ayang tsünoikü aküo nou, naiuso mongyang mowankü nou meani-e.

⁶⁶Asam aakih asaita ahat nai noi-e. Anyi si asoh asam alekkat nou meankü noi-e, naiuso asam asaita ee lün hatkü nai kih-e.

⁶⁷Asamüh eptsün alum nouko asam mongpem ahat nou ngaongao-e. Ahom tsütokü asamüh ah nou shakta anya an ta yange, naiuso asham tsütokü ah nou shakta ange-an ta yange.

⁶⁸Asamüh Ijip nai tilaitso laokü tsükhushi-e ta ngio lüko, APAOU nou asam Ijip nai kheng nouko laokü hongane. Nungai asamüh asam chija, asam ehso phamongai sua ao janthiowanao kowe-e, lüko khaiunia sauüh asam tuh ao tsü-aiu-e.”