Read Khiamniungan Naga Ngiokhem 29 Bible Online

Ngiokhem 29 - Khiamniungan Naga bible

Ngiokhem 29

¹Moab goumchi nai Israel khaiuniahoi nouso ko APAOU ün athalou-e Mosa tü thalotsün nungso noin: Nung apem APAOU nou ngüso ko Sinai King nai athalou-e shantsün thun lu noin.

²Mosaüh Israel khaiuniahoi apem aikü jonkam küta ngüso tü ngiom, “Asamüh APAOU nou Ijip nokpao tü, apa ün asonghoi nouso tü, naiuso apa goumchi athum tü ti chhikü shin nung epiu.

³Asamüh ahatau lümeikü nou imkia nouso, athanga chhi nouso, naiuso APAOU ün angawan- tsün asong chhi nouso epiu.

⁴Lüko lonyi shisaokü nouko asamüh ti waohe apaüh nung tsüngela-i.

⁵Pon aopüle chikü APAOU nou asam liutsa yankü yam niakeikü shin, naiuso asam neshe si hokkhut nouso nyiankü tsü-iula.

⁶Asamüh eheau themtsai, tsüdekünai ashiuao theng, tsüdekünai jim tsütaiuküla, lüko apa asam Goa ta hanau APAOU nou asamüh potsün kiukü noila.

⁷Lüko tilai sam nung athang nai shin, Hesbon hai nokpao Sihon naiuso Bashan nokpao Og ne sam thako ehliau shikü noiküla. Lüko samüh ngüso shiolokü shin;

⁸küta ngüso goumchi lowan, küta nung Reuben si Gad ne kau ongko janekü kiuwan, loüh apaitso nou Manase kau hau kium.

⁹Nung athalou-e yam nouso apem mongkiukü angio angkü athe, nungaito asam chhisiya alum ko ashio eppe.

¹⁰“Lonyi asam apem aheihoi naiuso asonghoi, asam melohoiso,

¹¹menyiu hoi, methso hoi, naiuso melemao hai asam ongko kihakü asam hau paisikhiam lokiutsünso APAOU asam Goa khako tsakü noin.

¹²Asam ko APAOU asam Goaüh athalou-e shantsün ko napau naiuso nung ngiokhem nouko noiau asam lonyi nungko noin.

¹³Nungtiphe APAOU lo asam meshen khaiunia ta tsangsheikü taiuao, apa asam Goa ta, nung asam paosiposo Abraham, Isak, naiuso Yakob tü thalotsünli noi-e.

¹⁴APAOU nou nung athalou-e shantsün asam ko lu tsüde,

¹⁵Asam apem lonyi nungko tsakü noinso naiuso loüh mochetkün thsaosithsoso ko lüko shanji.

¹⁶“Ijip nai aakih ti khekkü naiuso amao hai goumchi yankü khutsün tao titili noiküla nung asamüh lüyangsan.

¹⁷Asamüh ngüso achinyan sotsom goa- pai nou, lung nou, tangkason nou, naiuso chaiou lakkeng nou shantsün nouso epiu.

¹⁸Lonyi nungko tsakü noitsün melo, menyiu, tsamkhaiu, tsüdekünai mele saulünou APAOU asam Goa am- khamtsün ainou amao mele sotsom goa nouso tü amkhamkü tsükhuau tsüokü lünoi. Nungto akhosak naiuso she pai nai sungtsün eiu tsak khekkü noi-e.

¹⁹Lonyi nung chhisiya ao lethsangkü loküta khaiunia tsak mong kongkü apa mongchiotsün yamai khuwan nai, nungüh asam apem amei si tsümei wekülu lotheane.

²⁰Nungtin khaiunia hau APAOU nou awan tsükiu-e. Nung- likoto APAOU amongmat sungtsün apa thako asaita noi-e, naiuso APAOU nou apa moisemkü molomowankün lektso nung thsam nouko sattaiutsün aküothe apem apa tü thawao-e.

²¹APAOU nou apa Israel hai kau apem khako athatluao tsak taiu-e, naiuso nung APAOU ün atsandetsün naiuso athalou-etsün thsam nouko athesan naiuso aküothe nouso apem apa chiai noi-e.

²²“Ashiao nou vetao nouso ko asam thsaosithsoso naiuso goumchi laiukü jetekü noitsün ainou melemao haiüh aküothe naiuso angja omhe nouso APAOU nou asam goumchi ai kankü shitsün eppe.

²³Eiu nouso ko paisam aosam tsüsungkü wanane, nung goh nou taoson lung naiuso jim nou meankü noi-e; titso thomthioau tsüshio-e, naiuso nungko sang lüko tsüsame. APAOU nou mongmat sung taoko lotheantsün Adma naiuso Zeboiim nai Sodom naiuso Gomora noknio nouso khekkü asam goumchi noi-e.

²⁴Nungai goumchi khaiunia apem nou, ‘APAOU nou ngüso goumchi tü nung tiauta chhin, Apa amongmat sungtsün ti koko noiküla ta sange?’

²⁵Naiuso athashitsün nungti noi-e: ‘Nung tiautenai APAOU ün khaiuniahoi nou ngüso paosiposo Goa ko, Ijip ainou niasantsün taoko ngüsoüh athalou-e shantaiu nou lotheantsün tsangko ta ngio-e.

²⁶Ngüsoüh nung khako tilaitso tsüamkhamkü noitsün goa nouso, APAOU nou chinyantsün goa nouso yathsüo.

²⁷Nungtiphe APAOU nou apa khaiuniaso ko mongmat küta nung thsam nouko sattaiutsün aküothe apem ngüso goumchi ai kankü shin.

²⁸APAOU thatü thsüokü mongmat sung, küta apa amongmat asongting nouko apaüh ngüso meshen goumchi ainou seksankü wan, naiuso ngüso melemao hai goumchi tsak nai koman, naiuso lonyi ngüso nungai noin.’

²⁹“APAOU sam Goaüh khakhakü tsühankün ajantso noin, lüko apaüh apa ngiokhem tsangsheikü sungi-iu, naiuso sam si sam thsaosithsosoüh asaita nung angio angkü theau noin.”