Read Khiamniungan Naga Ngiokhem 3 Bible Online

Ngiokhem 3 - Khiamniungan Naga bible

Ngiokhem 3

¹“Nungthankü, sam Bashan khiamkhan ajepekki dongai khunai, Og Nokpao apa khaiuniasoko Edrei noksong shimkü samko ehli au shin.

²Lüko APAOU nou ngü tü ngiom, ‘Apa lün hatkü lanoi, Ngo apa, apa khaiuniaso, naiuso apa goumchi apem asam hau kiuao noin. Amor hai nou Sihon sau Hesbon nai nokshingkü noiküla, apa tü chhikü shitsünli, Og Nokpao ta lüko lüchhi.’

³“Nungtiphe APAOU nou Og nokpao lüko naiuso apa khaiuniaso hakü sam oukong nai kiuwan, küta samüh ngüso apem chaoatkü wan.

⁴Nungko aikü samüh apa noksong nouso apem thalowan. Samüh thalotsün noksong apem nai aolouk, nung Og Nokpaoüh nokshing tsün Arkob khiamkhan athum lowan.

⁵Nung noksong nouso be atsok nou bekü, bekhan mongkü, naiuso bekhan kiapau son nou meikü khüpkü shankü noiküla, naiuso be tsübekü nok piakü hakü thalo.

⁶Hesbon nokpao Sihon ün noksong nouso tü ti chhin, nunglilu samüh noksong nouso apem lothean naiuso melo, menyiu, naiuso methsoso apem loatkü wan.

⁷Samüh noksong nai noitsün thainian naiuso jengtsaiu apem kamhean.

⁸“Nung taoko samüh Amor hai nokpao nime ainou Yordan Haiu ajepek nai noitsün goumchi, naiuso Arnon Haiu ainou Hermon king saokü goumchi nou lowan.

⁹(Hermon king tü Sidon haiüh Sirion ta naiuso Amor haiüh Semir ta jonji.)

¹⁰Samüh Bashan Nokpao Og ün Tsamei nai noitsün noksong nouso, Gilead khiamkhan nouso, naiuso Bashan ajepek nai Saleka naiuso Edrei noksong nouso saokü goumchi apem lowan.”

¹¹(Refaim hai ongko Og Nokpao nung aphiting noiküla, apa mea paidan atheng nai ak-e püle naiuso atham nai ak-e nime thatso athat tongtü thattsün tsangkü nai noiküla. Nung losaokü Amon hai noknio Rabba nai epao shio-e.)

¹²“Tilai samüh goh nou thalo, ngo Reuben naiuso Gad mele nouso hau Arnon Haiu shimkü noitsün Aroer noksong ajepekki goumchi nouso kium, naiuso noksong nouso ko aikü Gilead goumchi apaitso.

¹³Manase mele apaitso hau ngo Gilead goumchi apoi nou, naiuso Bashan goumchi apem, tiai Ogüh nokshingkü noiküla, nung Arkob khiamkhan athum kium.” (Bashan nung Refaim hai goumchi ta jonkü noiküla.

¹⁴Manase mele ainou Jairüh Arkob khiamkhan athum lowan, nung Bashan Geshur naiuso Maaka elung saokü noiküla. Apaüh noksong nouso nian apa nianphi nianlut, naiuso losaokü nung nok nouso tü Jair ta jonji.)

¹⁵“Ngo Manase mele Makir kau hau Gilead goh thatkiu.

¹⁶Naiuso Reuben si Gad mele hau Gilead ainou Armon Haiu saokü goumchi nou kium. Haiu liuwemko ngüso ajepekai sheitsün elung noiküla, naiuso ngüso ajenapki elung nou Jabbok Haiu noiküla.

¹⁷Ajenap nai ngüso goumchi Yordan Haiu tü yangkü, ajepekki elung nou Galil Khiamnok ainou Ee Khiamnok asong ngoikü, naiuso ajepek elung nou Pisga Kinghok tü saokü noiküla.

¹⁸“Nung taokolu ngo ngüso hau ayamhan nungso kium: ‘APAOU sam Goaüh Yordan ajepek nai noitsün goumchi nouko kihloau asam hau kiuwaniu. Nungtiphe lo asam ehli khaiuniahoi nouso thalokü ngüso amao Israel mele nouso khako Yordan yankü khukü ngüso goumchi ko hachukü kihlo-iau lühong.

¹⁹Lüko asam hau ngo kiutsün noksong nouso ai asam tsammongnyiuso, asam ehen methsoso, naiuso asam tsam thainian noi-e, tiautenai asam tsam thainian piakü haan ta ngo ngeji.

²⁰APAOU nou asam hau kiutsün Yordan ajenap goumchi ngüsoüh thaloküta aalo nai mokihlokün lektso asamüh meshen Israel khaiunia lühachu, nung apaüh asam thaiutha nungko chhianiu. Nungphiai ngo asam hau kiutsün nung goumchi nai asam laokü shiau shio-e.’

²¹“Nungai ngo Yihusua hau ayamhan nou kium: ‘Ni APAOU a Goaüh Sihon si Og nokpao nime tü chhitsün epiu, naiuso asamüh sauhai goumchi thaloshi-e nungso tü lüko apaüh nungtilu chhi-e.

²²Ngüso lün hatkü lanoi, tititenai APAOU asam Goa asam thaiutha ehli nai tsakiu-e.’”

²³“Nung taoko ngo kojakü misao saokü ngiom,

²⁴‘Akhengting APAOU, ni athanga chhi asong chhiao, nouso ayalo noulu ni ngü hau han ta ngo ngeji. Aün naiuso Goum nai ni chhi asong chhikü shitsünli to ti goaüh chhiao tsüshio-e!

²⁵APAOU, ngo Yordan Haiu yankü khuküta, memei goumchi naiuso alengmei king goh nouso naiuso Lebanon king nouso etsai noitsün goumchi nouso ta thapluko.’

²⁶“Lüko asam khaiuniahoi nouso shioko APAOU nou ngüko mongmat küta ngü tü tsü-ang. Nung liko apaüh ngiom, ‘Nungüh saiuwaniu! Nung thaiutha langioshi!

²⁷Pisga Kingson nai lüsung, küta aniokun püle nai ni ti epji tsokü lüthap, tiautenai ni Yordan yankü tilaitso tsükhu-e.

²⁸Yihusua hau apa yamhan nouso lükiu, apa mong lülosongkiu, tiau- tenai ni eptsün goumchi nou thaloau naiuso kihloau apaüh khaiuniahoi nou nung yankü nialokü khu-e.’

²⁹“Nungtiphe sam Betpeor noksong tü lashikü noitsün tsamei nai noian.”