Read Khiamniungan Naga Ngiokhem 30 Bible Online

Ngiokhem 30 - Khiamniungan Naga bible

Ngiokhem 30

¹“Ngo lo asam hau ouk tsü- dekünai athesan ongko tsak choloau kiu-iu. Tilai nungso apem asam tü thawao-e, naiuso APAOU asam Goaüh asam pengpunitsün mele nouso ongko asam kih-e, nungai ngo asam hau acholoau kiutsün asamüh yangsane.

²Asam si asam thsaosithsoso APAOU dongai phokle naito, naiuso ngo lonyi asam hau kiutsün apa athoilut nouso asam mongpem apemüh ang naito,

³APAOU asam Goaüh asam tü atsüojinyang noi-e. Asam tilüsong mele nai pengpunkü noin nung mele nouso ainou apaüh asam niakamshi-e, naiuso apaüh asam loüh memeikü iula-ishi-e.

⁴Asam goumchi aniokun laiukü nai pengpunkü noi lüko, APAOU asam Goaüh asam aikü lokame, naiuso nialokü shishi-e,

⁵nungtiphe asam paosiposo tiai ataojam kihkü noiküla, nung goum- chi tengkam nouso asamüh loshi-e. Naiuso apaüh asam paosiposo tü tekkü simkü asam memei naiuso piakü shingkü iula-i-e.

⁶APAOU asam Goaüh asam naiuso asam thsao- sithsoso hau angio angtsün mongpem nouso kiu-e, nungai asamüh apa asam mongpem apem nou tsüojine, naiuso asam nung goumchi nai asaita kihe.

⁷Asam tü chinyantsün naiuso asam thangmangtsün ehso tü nung athesan nouso apem lolut kiu-e,

⁸nungai ngo lonyi asam hau kiutsün apa athoilut nouso apem asamüh kankeikü loüh asamüh apa ngio angshi-e.

⁹APAOU nou asam chhisiya apem ko shingkü khu-i-e, asam thsoso piakü iula-e, naiuso asam thainianso piakü iula-e, naiuso asam eiu ai chihsikhiam phopkü sungi-e. Asam paosiposo memei iula-itsün ko apa monglingtsünli, asam memei iula-iau lüko apa monglinge.

¹⁰Lüko asamüh nung thsam nouko apa atsande sattaiutsün nouso, naiuso apa ngiokhem nouso, apem angio angkü kankeiau noi-e. Asam mongpem apem nou apa dongai laokü shiao noi-e.

¹¹“Ngo lonyi asam hau kiutsün athoilut nung thatü chekkü tsüde, tsüdekünai asamüh tsüsaokü hao tsüde.

¹²Nung maou nai tsüde, ‘lüko samüh nung lula küta angio angkü theao shiokü hau sau maou nai sungküta sam thaiutha kankü sao-e?’ ta asamüh sangao pokü tsünoi.

¹³Tsüdekünai nung khiamnok etsai tsüde, ‘samüh nung lula küta angio angkü theau shiokü hao khiamnok yankü sau khuküta sam hau kankü shikiu-e?’ ta asamüh sangao pokü tsünoi.

¹⁴Tsüde, nung asam ko hakü noin. Asamüh nung ngeji naiuso ngioau shio-e, nungtiphe lo nung angkü lüthe.

¹⁵“Ngo lonyi asam hau amei si tsümei, naiuso aa si ee jetko acholoau tsak kiu-e.

¹⁶APAOU asam Goa athoilut ngo lonyi asam hau kiutsün asamüh angio ang naito, apa tsüojin naito, apa ngio ang naito, naiuso apa ngiokhem nouso apem kankei naito, asam khaiunia piakü noitsün mele tsak iula-e naiuso shingkü khu-e. Asamüh thalokü kihloau noitsün goumchi nai APAOU asam Goaüh asam ouk kiu-e.

¹⁷Lüko asamüh angio tsüangkü naiuso angloau tsüaiukü amao goa nouso tü amkhamao phoklekü khuwan naito,

¹⁸asam lomowane ta ngo lo asam lotsüoji. Asamüh thaloküta kihloau noitsün nungh goumchi Yordan Haiu yankü nai asam aakihlaiu laiukü tsükih-e.

¹⁹Ngo lo asam hau aa si ee jetko, naiuso Goa athesan si Goa ouk jetko choloau kiuji, naiuso ngo aün naiuso goumchi nou tü asam mitha ao jonji. Aa nou lüsinglo.

²⁰APAOU asam Goa lütsüojin naiuso apa ngio angkü mongkiukü lünoi, nungaito apaüh asam paosiposo Abraham, Isak, naiuso Yakob tü asam hau kiuao thalotaiutsün goumchi nai asam naiuso asam thsaosithsoso aakih laiukü kih-e.”