Read Khiamniungan Naga Ngiokhem 31 Bible Online

Ngiokhem 31 - Khiamniungan Naga bible

Ngiokhem 31

¹Mosaüh Israel hai tü tsülaokü chite,

²kü ngiom, “Ngo loto aakihlaiu pon 120 noin, naiuso ngo loto asam ongko ahei laiukü theau tsüshio-e. Naiuso nungko hakü, APAOU nou ngü tü Yordan Haiu tsüyane ta ngio-iu.

³APAOU asam Goa pem asam khako khu-e, naiuso nungai kihtsün mele nouso lomowane, nungti asamüh ngüso goumchi thaloau shio-e, naiuso APAOU nou ngiotsünli, Yihusua asam ahei au the-e.

⁴Amor hai nokpao Sihon naiuso Bashan nokpao Og, apaüh shioloküta ngüso goumchi lotheantsünli, APAOU nou nungso khaiuniahoi lomowane.

⁵APAOU nou ngüso khako ashiolotsün asam hau kiu-e, naiuso ngo asam hau ti chiten nungli ngüso lükankei.

⁶Mongsongkü naiuso monglamkü lüthe. Ngüso lün lahat. Asam Goa APAOU pem nou asam ko ha-e. Apaüh asam tsüwane naiuso tsüleane.”

⁷Nungai Mosaüh Yihusua Israel khaiunia apem khako jonshiküta ngiom, “Mongsongkü naiuso mong- lamkü lüthe; APAOU nou asam paosiposo tü nung goumchi thaloau thalotaiutsün nai nung khaiunia nouso ni niakü nappe.

⁸APAOU apa pemüh asam nia-e naiuso asam ko ha-e, Apaüh asam tsüwane naiuso tsüleane, nungtiphe asam lamong- hen tsüdekünai hatkü lanoi.”

⁹Nungtiphe Mosaüh Goa Ngiokhem nouso satthio küta nung APAOU ngiokhem Paidan paotsang- tsün Levi meson nouso naiuso Israel aheihoi nouso hau kium.

¹⁰Apaüh ngüso tü thoilutkü ngiom, “Pon chinyat athon pungkü, tilai chailaiu wankiu-etsün akom lemkü shishi-e nung Ngiokhem Asolotsün Sümai nai sang songkü wekü lüwe.

¹¹Nung Israel khaiuniahoi tilai ngüso APAOU asam Goa amkhamao amthang tsak nai shi-e nungai ngüso hau lüwete.

¹²Khaiunia pungkü nou nung lula küta APAOU asam Goa lomsanau nge- loau naiuso apaüh tsandetsün nouso tü mong kiukü angao melo, menyiu, naiuso methso hoi, naiuso melemao hai, asam noksong nai kihtsünso ngüso apem lüjonkam.

¹³Nungli asam thsaosithsoso sauhaiüh APAOU asam Goa ngiokhem tilaitso molu- dekü noitsünsoüh lüko lula-e. Naiuso nungti Yordan yankü goumchi sübao asamüh thaloküta kihlotsün ko ngüso nung goumchi ko kihtsün lektso apa ngio angao ngelo-e.”

¹⁴Nungai APAOU nou Mosa tü ngiom, “Ni laiukü tsükih shi-e. Nungtiphe ngo ayamhan nouso kiuao Yihusua lüjon küta apa Nejenkhio nai nialokü ashi.” Nungai Mosa si Yihusua ne Nejenkhio nai khu;

¹⁵naiuso nung Nejenkhio koukhan dongko APAOU nou thengmia kheam tsak mongko tsakü ngüso dongai sungh.

¹⁶APAOU nou Mosa tü ngiom, “Ni laiukü tsünoikü eane, naiuso ni ean phiai khaiuniahoi nou ngü tü mong tsükiukü iula-e, naiuso ngo ngüso ko athalou-e shantsün ngüsoüh lotheane. Ngüsoüh ngü leane naiuso ngüso nappao noitsün goumchi ün sotsom goa nouso tü ngüsoüh amkhame.

¹⁷Tilai nung thawao-e, ngo ngüso ko mongmatkü iula-e, ngo ngüso leane, naiuso ngüso lomowane. Ahat au lümeikü aküothe ngüso khako shi-e, naiuso ngüsoüh nung thawaotsün taoko ngo, ngüso Goa, ngüso ko tsühashi ta yange.

¹⁸Naiuso ngo ngüso tü hachuau shanane, tiautenai ngüsoüh tsümeikü chhin naiuso amao goa nouso amkham.

¹⁹“Lo, nung jih nou lüsatlo. Nung Israel khaiuniahoi hau lütsande, naiuso nung ngüso thaiutha mitha tsakli tsakü noi-e.

²⁰Ngo ngüso paosiposo tü thalotaiutsünli, ngüso nung memei naiuso atsüomei goumchi nai kankü khu-e. Nungai ngüsoüh aiutsün chihsikhiam alum ngüsoüh eppe, naiuso ngüso aalokü kih-e. Lüko ngüso ngü ainou laokü khukü amao goa nouso amkhame. Ngüsoüh ngü wanane naiuso jü athalou-etsün lotheane,

²¹naiuso atsüoting ahat au ngüso khako shi-e. Lüko nung jih nou loüh tsülaokü hange naiuso nung ngüso thaiutha mitha tsakli tsakü noi-e. Lo, lüko, ngüso hau kiuao thalotaiutsün goumchi nai ngo ngüso monialükhunkün khako, ngüsoüh ti yangji ngo nung ngeji.”

²²Nung ajekhaiu kolu Mosaüh jih nou satsan küta nung Israel hai hau tsande.

²³Nungai APAOU nou Nun thso Yihusua ko chitekü ngiom, “Mong- lamkü naiuso mongsongkü lüthe. Ni Israel khaiuniahoi ngo ngüso tü thalotaiutsün goumchi nai nialokü nappe, naiuso ngo ni ko noi-e.”

²⁴Mosaüh Goa ün Ngiokhem thsam tsak ko satthio, naiuso nung tsaktso tsüsa-anao paotsangkü noiküla.

²⁵Tilai apaüh khemkü shin, apaüh APAOU ün Athalou-e Paidan paotsangtsün Levi mesonhoi nouso tü ngiom,

²⁶“Nung Goa ün Ngiokhem thsam nou alo, küta asam APAOU asam Goa ün Athalou-e Paidan dongko ataiu, nungai nung apa khaiuniahoi thaiutha mitha tsakli noi-e.

²⁷Ngüso titi mongkong naiuso akhengshitsün tsak noin nung ngo ngeji. Jü aakih taoko ngüsoüh APAOU thako khengshikü noiküla, naiuso ngo ean phiai loüh tikkü ngüsoüh khengshi-e.

²⁸Ngo aün naiuso goum nou tü ngüso thako jümitha au jone, ngo nung chhisiya nouso ngüso hau chitesomau asam mele aheihoi naiuso asonghoi nouso apem jükhako akamshi.

²⁹Ngo ean phiai khaiuniahoi nou kausaikü iula-e, naiuso ngo ngüso tü ti tsande taim nung nanane ta ngo ngeji. Ashiao noitsün taoko ngüsoüh aküothe nou waohe-e, tiautenai ngüso tü ti lachhi ta ngiom nung chhisantsün tsangko APAOU mongmati-e.”

³⁰Nungai Israel khaiuniahoi apem nou angkü noi taoko Mosaüh jih apem thantaiukü hangde.