Read Khiamniungan Naga Ngiokhem 32 Bible Online

Ngiokhem 32 - Khiamniungan Naga bible

Ngiokhem 32

¹“Goum naiuso aün jü ngio alula, ngo ti ngioji nungtü shimkü shikü anglu.

²Jü atsandetsün ah ou chhan khekkü sao-e naiuso goh nai khiamleli iula-e. Jüngio nouso paisam aosam tü haoluttsün ah ouli noi-e. Sang ashethop chiai ah paih hauluttsünli noi-e.

³Ngo APAOU nian lomsane, naiuso apa khaiuniasoüh apa asong thaiutha chite-e.

⁴“APAOU asam solotsün akongting noin, apa to ayam pungkü saiukü naiuso ngiotsüo noin. Asam Goa to atsüo naiuso mongkiutsün; apaüh ti ayam noin naiuso, asio noin nung chhiji.

⁵Lüko asam mong tsükiutsün hoi, apa khaiunia au theao tsümai, angei naiuso akausai mele tsak.

⁶Asam tsüngekün naiuso maingahoi, APAOU nou nungti kankeiau ayam noin süne? Apa asam po, naiuso asam shantsün, apaüh asam mele tsak hau shan.

⁷“Atao laiukü yankü shitsün tü lüyanglu; asam poso tü ti thawao, nung lüsanglo, yankü shitsün chiteau ashehoi nouso tü lüsang.

⁸Akhengting nou mele nouso hau ngüso goumchi kium, khaiuniahoi tiai kih-e nung apaüh yankü noin. Apaüh mele pungkü hau goa tsak tsak kium.

⁹Lüko Yakob thsaosithsoso apaüh meshen thaiutha cholo.

¹⁰“Apaüh ngüso liutsa lang nai tsakeitsün tao eplo, nung ahsheih akongting sheitsün liutsa lang tsak noiküla. Apaüh meshen pem solotsünli, ngüso solokiu naiuso ngüso thaiutha paotsangkü noiküla.

¹¹Letche tsaküh meshen thso hau ajei ao apa ekok chiai noi-ikü tsandetsün khekkü, APAOU nou Israel asalianao noitsün ainou kipsankü taiu.

¹²Melemao goa ahachu tsühakü APAOU noulu apa khaiunia niasan.

¹³“Apaüh ngüso hau goumchi atsok nouso tü nok-shingi, naiuso ngüsoüh goh ai sungtsün heshiu. Ngüsoüh liukhiam nung lung nouso ongko epsan; ngüso olip pai lungkap nai shingkü noiküla.

¹⁴Ngüso jangtso naiuso won nousoüh anyao nou saiukü kiuji; ngüsoüh onnemok hoi, wonhoi, naiuso tsam thainian nouso ameiting taim, naiuso jinyak ameiting si theng ameiting nou ngüso ün noin.

¹⁵“APAOU ün khaiuniahoi memeikü iula, lüko akhengshitsün noiküla. Ngüso pem tsahkü naiuso, eheshiu kamtaiukü noiküla. Ngüsoüh ngüso shantsün Goa lean, naiuso akipsantsün akongting nou wanan.

¹⁶Ngüso sotsom goa chhisiya tsangkü APAOU niovei kiakü iula-i, ngüso chhi tsümeikün tsangkü apa mongkia-i.

¹⁷Ngüso paosiposoüh tilaitso tsüngekün atsüotsüdekün goa sübao Israel haiüh tsüamkham, nung goa nouso hau ngüsoüh aloat chaithio kiu.

¹⁸Ngüsoüh aa kiutsün Goa, ngüso kipsantsün bean.

¹⁹“Tilai APAOU nou nung ep, apa chinyankü iula, tiautenai melothso si menyiuthso nousoüh apa mongmati.

²⁰Apaüh ngiom; ‘Ngo loto ngüso tütsühachu shi-e,’ ‘lüko nung mongkong naiuso mong tsükiukün, hoi tü ti thawaoji nung tü ngo thapkü noi-e.’

²¹Ngüso sotsom goa shioko ngüsoüh ngü mongmati, ngüso goa atsüo nou tsüde. Nungtiphe ngo ngüso mongmati ao mele tsak kankei-e; mainga mele tsak nou ngo ngüso mongmati-e.

²²Jü amongmat In nyai khekkü sunge, küta goumchi nai alum chetheane. Nungüh gohkhei naiuso kinghok saokü chetheane.

²³“‘Ngo ngüso khako athon tsüyangkün aküothe kankü shi-e, naiuso jü oukop chon nouso apem ngüso thako kankei-e.

²⁴Ngüso naiusile naiuso kiyashi nou eane, ngüso ahatao lümeikü kiyashi kia nou eane. Ngüso tü komao ngo liu thainian nouso honge, naiuso ngüso tü jeiao she suntsün pao nouso honge.

²⁵Sonkeng nouso nai ehli nou eane, tsam nouso tü alekkat nou shithane, pühe mesohoi nouso eane, nionyaothso si ashehoi lüko tsüpoi-e.

²⁶Nungti ngüso sauüh tsüyangsan shiao ngo ngüso moisemkü lomowane.

²⁷Ngüso hau jü khaiuniaso shiolo-itsün ngo ngüso tsübülomi-e, ngüso noipektsün ngo jüpem noiküla.’

²⁸“Ayanglo tsüsunkü Israel mele tsak noin ngüso tü mongthat pungtsün tsünoi.

²⁹Ngüso tiau shiohean ta thapluao tsümon ngüso tü ti thawao nung ngüsoüh ngela au tsüshio.

³⁰Tiauta tsak tsangkü heng tsak shiolowan naiuso nime tsangkü nou heng che shiolowan? APAOU, ngüso Goaüh, ngüso leaniu; ngüso ün akong Goa nou ngüso wananiu.

³¹Ngüso ehsoüh ngüso goa tsaosilao, Israel ün oukong Goa khekkü tsüde ta ngeji.

³²Ngüso ehso tsümeitingkün Sodom naiuso Gomora li, akhosak si sheh iusantsün sainaoshep nouso khekkü noin.

³³Pao sheh tsangkü shantsün theng khekkü noin.

³⁴“Ngüso ehoiüh ti chhikü noiküla nung APAOU nou yangsanji, apaüh ngüso angja kiuao atao tongtü nou tü taiuji.

³⁵APAOU nou thamshi-e naiuso ngüso angja kiu-e; ngüso loianau atao shi-e, ngüso mowanao nou ajekhaiu shimkü noin.

³⁶Apaüh ngüso ou pihtsün epnai APAOU nou apa khaiunia kipsane. Tilai apaüh ngüso angjakü eppe, apa yathsüotsünso khütha nai apa atsüojinyang noi-e.

³⁷Nungai APAOU nou apa khaiuniaso tü sange, ‘asamüh monglamtsün oukong goa nouso tiai noin?

³⁸Asamüh nungso tü thainian atsah nou loatkü amkham, naiuso ngüso hau ashiuao theng kium. Lo asam hachuau ngüso ashi-i, asam kipsanao ngüso lükhaolao-i.

³⁹“‘Ngo, naiuso Ngo lu, Goa noin; amao goa tsaktso atsüo tsüde. Ngo loatji naiuso ngo lu aa nou kiuji, ngo tawaikiuji naiuso ngo lomeikiuji; naiuso ngo ti chhiji nungtü asamüh khengshiau tsüshio.

⁴⁰Aa Goa, atsüoting nou ngo noin, ngo jüpha loksanji naiuso ngo ngiomong shinge shanji.

⁴¹Ngo oukü noitsün jüsalaiu laplapkü lomonji, küta ngiotsüo nou chhiji mo ta thapji. Ngo jü ehso thako phao nou sane, naiuso sauhaiüh ngü chinyanji, ngüso angja kiu-e.

⁴²Jü oukopchon nouso tü ngüso she chanlut-e, naiuso sauhaiüh ngü tü khengshiji ngüso apem jüsalaiuüh loate. Sauhaiüh jüthako li-eji ngo ngüso tsaktso tsüpoi-e; tawaikü noitsün si akho tsamai noitsün lüko eane.’

⁴³“Mele so, asamüh APAOU khaiuniahoi lomsanau noin- sauhaiüh ngüso loatji, apaüh apem hau angja kiuji. Apaüh apa ehso tü thamshiji, naiuso apa khaiuniaso angei wankiuji.”

⁴⁴Mosa naiuso Nun thso Yihusua neüh, nung jih nou Israel khaiunia nousoüh lulakü hang.

⁴⁵Tilai Mosaüh Goa ün ngiokhem, khaiuniahoi nouso hau tsandekhem,

⁴⁶apaüh ngiom, “Ngo lonyi asam hau kiutsün athoilut nouso apem angkü theao tsüokü lüthe. Nungso asam thsoso hau lütsandeshi, nungaito ngüsoüh Goa ün atsande nouso apem mong kiukü ange.

⁴⁷Nung ngiokhem nouso ngio khenge ngio tsüde, nungso asam aa nou noin. Nungso angio lüang nungaito asamüh thaloküta kihloau noitsün Yordan yankü noitsün goumchi nai asam aakih laiukü kih-e.”

⁴⁸Nung ajekhaiu kolu APAOU nou Mosa tü ngiom,

⁴⁹“Yeriko noknio tü lashikü noitsün Moab goumchi nai Abarim King nouso ai lükhu, ngo Israel khaiuniahoi hau kiuao noitsün Kanan goumchi tü Nebu King ai sungküta lüthaplu.

⁵⁰Adei Aron Hor King nai sungtsünli, ni nung King nai eane,

⁵¹tiautenai aje nemthso Israel khaiuniahoi khako ngü tü mong thumkü tsükiukü noiküla. Tilai asam Kades noksong shimkü Zin liutsa nai Meriba khiam nouko noiküla, ajeüh khaiuniahoi khako ngü asuhat kiukü tsülomsan.

⁵²Ni nung goumchi tü laiukü jetekü noikü saiulu-e, lüko ngo Israel khaiuniahoi hau kiutsün goumchi nai ni tsünape.”