Read Khiamniungan Naga Ngiokhem 33 Bible Online

Ngiokhem 33 - Khiamniungan Naga bible

Ngiokhem 33

¹Goa khaiunia Mosaüh apa moeankün khako Israel khaiuniahoi ouk kiutsün ouk nouso nungso noin:

²APAOU Sinai King ainou saom, apa Edom khütha nai aje khekkü sungh naiuso apa khaiuniaso tü Param King ainou jelut. Apa ko honghoi heng che hakü naiuso apa pha uai inyai tsak semkü noiküla.

³APAOU nou apa khaiunia tsüojinji naiuso sauhai apa ün noin ngüso kipsanji. Nungtiphe sam apa khako kauthioji naiuso apa athoilut nouso angio angji.

⁴Samüh Mosaüh kiutsün ngiokhem nouso angio angji, nung sam mele ün tengkam atengting nouso noin.

⁵Tilai mele aheihoi nouso aikü kamshikü noiküla, APAOU, apa khaiunia Israel nokpao iula.

⁶Mosaüh Reuben kau thaiutha ngiom, “Reuben khaiunia thsaothsaokü lüko, tilai tong tsüthone.”

⁷Yihuda kau thaiutha apaüh ngiom, “APAOU, Yihuda haiüh ahachuau wetsün sang tü anglu; Ngüso amao kau nouso ko loüh jam lüjeiai-ishi. Ngüso thaiutha ehli alikiu, APAOU, naiuso ngüso ehoi thako ehlitsün nai ngüso ahachu.”

⁸Levi kau thaiutha apaüh ngiom: “APAOU, ni, mongchiotsün Urim naiuso Thumim tsangkü tsangsheikü ahan, Levi hai, ni yathsüotsün tsangkü; Ni ngüso tü Massa nai thelu naiuso Meriba khiam nai ngüso atsüo ta mitha epsan.

⁹Ngüsoüh posinyiu, deisinio, tsüdekünai methsoso tü simkü ni tü amongkiutsün asong han. Athoilut nouso ngüsoüh angio ang naiuso ni athalou-e noutü mongkiukü noiküla.

¹⁰Ngüsoüh akhaiuniaso tü angiokhem angau tsande-e, ngüso asam amthang nai aloat chaithio nouso kiu-e.

¹¹APAOU, ngüso kau oukongkü iula ao ahachu; ngüsoüh ti chhiji nungko lümongtsam. Ngüso ehoi apem sutnekü lüwan, ngüso tilaitso lacho-ishi.”

¹²Benjamin kau thaiutha apaüh ngiom: “APAOU, nou tsüojintsün naiuso hachutsün nung kau noin; ajekhaiu thathunkü ngüso jimkü noiji, naiuso apa ngüso ongko noiji.”

¹³Yosep kau thaiutha apaüh ngiom: “APAOU, ngüso goumchi ah ou hakü ouk akiu, naiuso goh akhei ainou khiam hakü ouk akiu.

¹⁴Aje awon nouko semtsün shep nou ngüso goumchi ouk akiu, Ah tao pungkü shep ameiting eiutsün nou meankü anoi-i.

¹⁵Be ta noitsün King nouso shep ameiting nousoüh meankü anoi-i.

¹⁶Ngüso goumchi amei noulu meankü anoi-i, Sauüh paieng nai in nyai tsangkü chitekü noiküla, nung APAOU ameiting nou tsangkü chitekü noiküla, nung APAOU ameiting nou tsangkü ouk akiu. Nung ouk nouso Yosep kau tü ashi-i. Tiautenai apa deisinioso ongko apa ahei noiküla.

¹⁷Yosep to jangkaupong oukong tsak noin, nung ong nouso nguo ongli noin. Apa ongso nung Manase ün heng si heng naiuso Efraim ün heng cheli, nungso tsangkü mele nouso thaopengkü ta ngüso goumchi athon saokü komane.”

¹⁸Zebulun si Isakar kau thaiutha apaüh ngiom, “Zebulun khiam chiai chaile nouko tsüomeikü lünoi, naiuso Isakar tsam chaisiou nouso ko shingkü anoi-i.

¹⁹Ngüsoüh melemao hai ngüso king nai jonji naiuso nungko ayam atha nou aloat chaithio nouso kiuji. Ngüsoüh ngüso chaiou khiamnok ainou naiuso haiusai singtso ainou epji.”

²⁰Gad kau thaiutha apaüh ngiom: “Sauüh Gad nokshing losungkiu Goa nian lülom, apa chongkhaoli pamkü noiji küta chipekkü heanji.

²¹Ngüsoüh meshen thaiutha goh ameiting nou thalom, haoson atengting nou ngüso hau sonkium. Tilai Israel aheihoi aikü kamshi, ngüsoüh APAOU ün athoilut naiuso ngiokhem nouso angio angkü noiküla.”

²²Dan kau thaiutha apaüh ngiom: “Dan, to Bashan ainou hamkü sungtsün chongkhaothso tsak noin.”

²³Naptali kau thaiutha apaüh ngiom: “Naptali to Goa ün atsüojinyang nou thameikü ouk kiu-iu; Galil khiamnok ainou ngüso goumchi ajepekki saokü noin.”

²⁴Asher kau thaiutha apaüh ngiom: “Amao kau nouso tü simkü Asher ouk noin, apa meshen deisinioso atsüojinyang noitsün lüthe, naiuso apa goumchi Olip pai nousoüh meankü noi-e.

²⁵Apa noksong nouso sun be nou bejei-e, naiuso apa asaichi aalokü lünoi.”

²⁶Israel khaiuniahoi, asam Goa khekkü amao goa titso tsünoi. Apaüh ni hachuau aün ainou apa akhengting oukong maou yankü ainou shiji.

²⁷Goa asaita asam solotsün noiküla, naiuso apa athontsüyang asam hachutsün noin. Apaüh asam khu taoko asam ehoi koman, naiuso ngüso apem lomowanau asam tü ngiokü noiküla.

²⁸Nungtiphe Yakob thsaosithsoso aalo nai kihji, Khülam naiuso theng nou meankü noitsün goumchi tsak nai aalokü noin, nungai maou ainou khiamle nou goh nou lopenkiuji.

²⁹Israel, ni titengkü amongling! Ni khekkü APAOU nou kipsantsün mele tsaktso tsünoi. APAOU, apa pem asam shii naiuso sah noin, apaüh asam solo-e naiuso ashio nou kiu-e. Asam ehoisoüh asam tü atsüojinyang koja shi-e, naiuso asamüh ngüso ngamthio-e.”