Read Khiamniungan Naga Ngiokhem 34 Bible Online

Ngiokhem 34 - Khiamniungan Naga bible

Ngiokhem 34

¹Nungai Mosa, Moab Tsamei ainou Yeriko tü ajepek ai noitsün Nebo King, Pisga kingkhaiu nai sungh, nungai APAOU nou apa hau Gilead goumchi athum, ajenapki nai noitsün Dan noksong saokü han;

²naiuso Naptali goumchi athum, Efraim si Manase goumchi nouso, ajenap nai Mediteranian khiamnok saokü Yihuda goumchi;

³ajepekki nai noitsün Yihuda goumchi, naiuso tsamei goh Zoar ainou Yeriko saokü, mepai noitsün noknio nouso han.

⁴Nungai APAOU nou Mosa tü ngiom, “Nung goumchi ngo Abraham, Isak, naiuso Yakob so tü ngüso thsaosi- thsoso hau kiu-e ta thaloutsün noin. Ngo ni hau nung epi-iu; lüko ngo ni nungai tsünap ha-i-e.”

⁵Nungti Mosa, APAOU yathsüotsün APAOU nou ngiokü taiutsünli apa Moab goumchi nai ean.

⁶APAOU nou apa Bet Peor noksong tü lalutkü noitsün Moab tsamei nai khanan, lüko lonyi saokü nouko sauühtso apa khantsün athang tongtü tsünge.

⁷Tilai Mosa ean, apa aakihlaiu pon 120 noiküla, apa ean taoko aya nai lilu oukongkü naiuso niovei nou loüh meikü noiküla.

⁸Israel khaiuniahoi nousoüh Moab tsamei nai apa thaiutha mongsaiukü ajekhaiu aosamnyi noiküla.

⁹Nun thso Yihusua, mongthat mongsai nou meankü noiküla, tiautenai Mosaüh apa thangko tsaao apa shingthio. Israel haiüh Yihusua ngio ang naiuso APAOU nou ngüso hau Mosa tsangkü kiutsün athoilut nouso kankei.

¹⁰Israel nai nung khako Mosa khekkü Goa e-po tilaitso tsünoiküla, APAOU nou apa ko khasikha chite.

¹¹APAOU nou Mosa Ijip nokpao thako naiuso apa asonghoi nouso thako Ijip goumchi apemai ii naiuso athanga nouso chhitsünli amao e-po sauüh chhikü tsünoi.

¹²Israel hai apem khako chhi asong naiuso ahat au lümeikü Mosaüh chhitsünli amao e-po sauüh chhiao tsüshiokü noiküla.