Read Khiamniungan Naga Ngiokhem 5 Bible Online

Ngiokhem 5 - Khiamniungan Naga bible

Ngiokhem 5

¹Mosaüh Israel khaiuniahoi apem jonkam küta ngiom, “Israel khaiuniahoiso, ngo lonyi asam hau kiutsün ngiokhem nouso apem tü anglu: Nungso lüngelo küta tsüokü lükankei.

²Sinai King ai nai APAOU sam Goaüh athalou-e tsak shan.

³Nung sam poso kolu tsüde, lüko lonyi aa noitsün apem nouko shan.

⁴Nung King nai APAOU nou asam ko In ainou khasikha chitekü noiküla.

⁵Nung taoko APAOU ngio asam hau tsandeau thaiutha APAOU naiuso asam jetko ngo tsa, tiautenai asam In lün hatkü noiküla, naiuso King nai tsüsung. “APAOU nou ngiom,

⁶‘Asam Ijip hai sua aküo ainou kipsantsün APAOU asam Goa Ngo noin.

⁷“Ngü tü simkü amao goa la amkham.

⁸“‘Ti sotsom lünou aün nai, goum- chi nai, goh kheiai khiam mongai asam thaiutha ti lashan.

⁹Sotsom goa ti khako lünou lakauthio, tsüdekünai la amkham, tititenai Ngo APAOU asam Goa naiuso Ngo amao akhengshitsün titso jeitaiuao tsüshio. Ngü tü chinyantsünso ngo ngüso thsaosithsoso vetao süme naiuso püle saokü angja kiuji.

¹⁰Lüko ngo tsüojintsünso naiuso Jü ngiokhem angtsünso khako ngo vetao hengsiheng atsüojinyang hanji.

¹¹“Jü nian yaang nai jünsankü lakankei, tiautenai ngo APAOU asam Goaüh jü nian yaang nai kankeitsünso hau angja kiu-e.

¹²“Ngo APAOU Goa nou thoi- luttsünli, Yihuda Anonyi ajekhaiu nou siokü lütaiu.

¹³Asamüh chhisiya au thaiutha ajekhaiu louknyi noin.

¹⁴Lüko Yihuda Anonyi nouto ngü hau thumkü losiokü taiutsün ajekhaiu tsak noin. Nung ajekhaiu koto asamüh, asam thsosoüh, asam sua nousoüh, asam thainian nouso hau, tsüdekünai melemao sauhai asam goumchi ko kihakü noin, nungsoüh nung ajekhaiu sauüh ti tsüchhisiya-e. Asam suasoüh lüko asamüh lilu aalo au noin.

¹⁵Ngo, APAOU asam Goaüh, jü oukong naiuso akong asong nou asam Ijip nai sua noi taoko niasantsün lüyangsan. Nungshioko ngo asam tü Yihuda Anonyi ajekhaiu nou lüyangsan ta thoilutji.

¹⁶“APAOU, asam Goaüh ni tü thoiluttsünli, apo naiuso anyiu asuh lühat; nungko APAOU asam Goaüh ti sübao goumchi asam hau kiuji, nungai ni aakih laiukü naiuso meikü noi-e.

¹⁷“Ni khaiunia laloat.

¹⁸“Ni ajisiwop lachhi.

¹⁹“Ni lakau.

²⁰“Ni sau thako lünou aphio mitha lakiu.

²¹“‘Ni amaohai tsammongnyiu lachinek, apa tsam lüko lachinek, apa goh lüko, apa sua nouso lüko, apa tsam thainian nouso lüko, apa gado hoi lüko, tsüdekünai apaüh taiutsün ti lünou lachinek.’

²²“Tilai asam king nai kamsankü noiküla, APAOU nou asam apem hau nung ngiokhem nouso kium. Tilai apaüh In ainou naiuso thengmia ateitham ainou sang akongting nou chitekü noiküla, apaüh amao tsü- dekü nungso ngiokhem nouso kium. Nungai apaüh nungso lungkhio nime tü satlutküta ngü hau kium.

²³“Tilai king athum nou tü In nou nyaikü noiküla, naiuso asamüh anyakhem ainou sang tsak lula, asam aheihoi naiuso kau nai ateng nouso jü dongai shi,

²⁴küta ngiom, ‘Tilai apa In ainou chitetsün samüh lula, APAOU sam Goaüh apa songtsün naiuso ajinka kankü noiküla! Goa nou khaiunia tsak ko khasikha chite lüko apa tsümowankü aa kih-e ta samüh lonyi epiu.

²⁵Nungtiphe sam loto tiauta e shi-e? Nung atsüoting In nou sam mowane. Samüh APAOU sam Goaüh chitetsün lushi naito sam atsüoting eane.

²⁶Aa Goa In ainou singiotsün lulakü phiai khaiuniathso ajantso aa kihkü shin süne?

²⁷Mosa, laokü lükhu, küta sam Goaüh chitetsün chikü tü lüanglu, küta laokü shikü apaüh ni tü ti ngiom, sam hau achite. Nung samüh ang-e naiuso kankei-e.’”

²⁸“Tilai APAOU nou nung lula, apaüh ngü tü ngiom, ‘Nung khaiuniahoi nousoüh ti ngiom ngo lula-iu, naiuso ngüso ayam thakü noin.

²⁹Ngüsoühlu nungti asaita yangsankü noi-e tünaito, ngüsoühlu ngü asaita asuhat kiukü naiuso ngo thoiluttsünso apem angkü kankei-e tünaito, ngüso naiuso ngüso thsaosithsoso thaiutha asaita aküo ameilu noi-e.

³⁰Ni khukü ngüso tü momo nejenkhio ai laokü khuau lüngio.

³¹Lüko Mosa, ni to ngüko nungko anoi, naiuso ngo ni hau jü ngiokhem nouso naiuso athoiluttsün apem kiu-e. Ngo ngüso hau kiutsün goumchi nai ngüsoüh angio angkü kankeiau thaiutha, khaiuniahoi nouso hau nung lütsande.’

³²“Israel khaiuniaso, APAOU asam Goaüh asam tü thoiluttsün alum chhiau asamüh tsangsheikü lünoi. Apa ngiokhem nouso tsak lüko angio tsüangkü lathe.

³³Nungso apem angkü lüthe, nungaito asam thaiutha aküo alumai meikü khu-e naiuso asamüh thalouküta kihlokü khuau noitsün goumchi nai asam aakih laiukü noi-e.”