Read Khiamniungan Naga Ngiokhem 6 Bible Online

Ngiokhem 6 - Khiamniungan Naga bible

Ngiokhem 6

¹“APAOU asam Goaüh asam hau tsandeau ngü tü thoiluttsün ngiokhem nouso apem nungso noin: Asam napküta kihloau noitsün goumchi nai asamüh nung ngiokhem nouso lü ang.

²Asam kihtsün lektso asam si asam thsaosithsosoüh ngo asam hau kiutsün ngiokhem nouso apem angkü APAOU asam Goa alomsan nungaito nung goumchi nai asam laiukü kih-e.

³Israel khaiuniahoiso, nungso tü lüanglu, naiuso nungso tsüokü lükankei! Nungaito asamko aküo apem meikü khu-e, naiuso asam akongting mele tsak iula-e, naiuso APAOU sam paosiposo Goa nou thalotsünli nung jangnyao naiuso liukhiam tsangkü noitsün goumchi nai asam kih-e.

⁴“Anglu, Oh Israel! APAOU sam Goa to APAOU tsaklu noin.

⁵Naiuso ni APAOU aGoa da among apem nou, aonthso apem nou, naiuso aoukong apem nou lütsüojin.

⁶Ngo lonyi asam hau kiutsün athoilut nouso tilaitso labean.

⁷Nungso ni athsoso hau lütsande. Tilai ni tsamko noi-e, naiuso yamai tsakeikü noi-e, naiuso ni saikü noi taoko, naiuso ni chhi nai noi taoko nungso thaiutha laoshikü lüchite.

⁸Nungso ni yangshiau thaiutha aphem nai naiuso khakheng nai kelutkü lütaiu.

⁹Nungso atsam koukheam nouso tü naiuso bekhan nouso tü satlutkü lütaiu.

¹⁰“Asam paosiposo Abraham, Isak, naiuso Yakob tü APAOU asam Goaüh thalokü taiutsünli, apaüh asam hau asamüh tsüshankün atsüo- mei noknio nouso hakü goumchi tsak kiu-e.

¹¹Nung tsam nouso ko asamüh tsüyanthiokün jengtsaiu amei nou meankü khiam temkhao nouso hakü noi-e. Naiuso asamüh tsüthom kün sainaoshep naiuso Olip shep piu aimong nouso hakü kiu-e. Tilai APAOU nou asam nung goumchi nai nialokü shi-e, asamüh heau aiutsün alum eppe.

¹²Ijip goumchi tiai asam sua noiküla, nungai nou APAOU sauüh asam niasankü shin nung asamüh tsübeanao tsangsheikü ataiu.

¹³APAOU asam Goa lülomsan, naiuso apalu lüamkham, naiuso asam athalotsün apa niankolu lüthalo.

¹⁴Asam lemkü noitsün khaiuniahoi nouso goa la amkham.

¹⁵Asamüh amaohai goa amkham naito, APAOU amongmat nou asam thako In li shi-e, küta asam moi- semkü lomowane, tiautenai APAOU asam Goa, sau asamko noin, apaüh amao akhengshitsün jeitaiuao tsüshio.

¹⁶“Asamüh Masa nai apa lilutsün- li, asamüh APAOU asam Goa lalilu.

¹⁷Apaüh asam hau kiutsün ngio- khem nouso apem asamüh angkü theau tsüokü lüthe.

¹⁸APAOU nou ti ayam thakü naiuso amei noin ta ngioji nung lüchhi, nungaito asam ko aküo apem meikü khu-e. APAOU nou asam paosiposo tü thalokü taiutsün atsüomei goumchi tengkam asamüh theau shio-e;

¹⁹naiuso apaüh thalotaiutsünli, asamüh asam ehso komane.

²⁰“APAOU sam Goaüh tiauta ‘sam tü nung ngiokhem nouso apem angkü theau thoilutkü noiküla ta ashiao noitsün atao nouko asam thsosoüh asam tü sange?’

²¹Nungai ngüso hau nung lüchite: ‘Sam Ijip nokpao sua hoi noiküla, naiuso APAOU nou apa oukong asong nou sam kipsan.

²²Sam nioveiüh apa athanga chhi nouso ep, naiuso Ijip haitü ahat au lümeikü chhitsün, ngüso nokpao naiuso apa khemko noitsün asonghoi khako chhitsün samüh epkü noiküla.

²³Apaüh sam paosiposo tü nung goumchi sam hau kiuao thalotaiu- tsün nai sam nialokü shiao Ijip ainou apaüh sam soktham.

²⁴Nungai APAOU sam Goaüh sam tü nung ngiokhem nouso apem angkü theau naiuso apa lomsanau thoilutkü noi- küla. Samüh nung chhi naito apaüh sam shingkhan khütha nai asaita jimkü noi-e naiuso tsüomeikü taiu- kiu-e.

²⁵Goa nou sam tü thoiluttsün apem samüh mongkiukü kankei naito, apa samko mong lengkü noi-e.’