Read Khiamniungan Naga Ngiokhem 7 Bible Online

Ngiokhem 7 - Khiamniungan Naga bible

Ngiokhem 7

¹“APAOU sam Goaüh sübao asamüh kihloau noitsün goumchi nai asam niathio-e, naiuso apaüh nung ainou mele piakü komane. Asam khutsün taoko asam tü songkü naiuso oukongkü noitsün mele chinyat nungso: Hit hai, Girgas hai, Amor hai, Kanan hai, Periz hai, Hiv hai, naiuso Jebus hai asam khako komane.

²Tilai APAOU asam Goaüh nung khaiunia nouso asam oukong nai kiuwane, asamüh ngüso shiolo-e naiuso asamüh ngüso apem loatkü wanao noin. Ngüso ko athsanne lanoishi, tsüdekünai ngüso hau atsüojinyang ti lahan.

³Asam ngüso ko tsamsigoh layang, naiuso asam thsoso ngüso ko tsamsigoh yangiau lakiu,

⁴tiautenai ngüsoüh asam thsoso ngüso sotsom goa nouso tü amkhami au nialükhune. Nungti nou shithawao naito, APAOU asam ko mongmate, küta asam jamaolu lomo- wane.

⁵Nungtiphe ngüso amthang nouso lülotheankiu, ngüso ün am- kham lung kheam nouso nelangkü lüthiopekan, ngüso sotsom menyiu Ashera hethekü lüwan, küta nungso sotsom in nai lüjahwan.

⁶Tiautenai APAOU a Goa thaiutha asam asio khaiuniahoi noin; APAOU a Goaüh goumchi nai shingkhan chikü khako apaüh meshen khaiunia mothikü theau asam shingsan.

⁷“APAOU nou asam amao mele nouso chiai piakü noin shioko chosan tsüde, naiuso tsüojinji ta tsüde, lüko goumchi nouko naito asam mele ehenthsoting tsak noiküla.

⁸Lüko APAOU nou asam tü tsüojintsün nung apaüh asam paosiposo tü thalotaiu- tsün tsülothekü taiuau aiutsün shioko noin. Nung shioko apaüh asam Ijip nokpao sua noitsün ainou apa oukong asong tsangkü asam kipsan küta khaiuniatsüo iula-in.

⁹APAOU asam Goalu Goa noin naiuso apa mongkiutsün noin ta lüyangsan. Apa tü tsüojintsünso naiuso athoiluttsün angtsünso hau vetao hengsiheng ta apa atsüojin hankü apa athalou-etsün taiuji;

¹⁰lüko sauhaiüh apa tü chinyanji ngüso angja kiuao apa henyikü tsünoiji.

¹¹Nungtiphe lo asam hau tsandetsün naiuso lonyi kiutsün ngiokhem nouso apem angio angkü lüthe.

¹²“Asamüh nung athoiluttsün nouso mongkiukü naiuso angkü kankei naito, APAOU asam Goaüh athalou-etsün asamko tsülaokü taiu-e, naiuso apaüh asam paosiposo tü thalotsünli, asam hau asaita atsüojin hankü noi-e.

¹³Apaüh asam tsüojine naiuso ouk kiu-e, asam haove nai singkü khu-e, naiuso methso hai piakü chette; apaüh asam eiu nouso ouk kiu-e, nungai asamüh chih nou taiu-e, theng nou taiu-e, naiuso Olip khiam nou taiu-e, naiuso apaüh asam tsam thainian naiuso onnemok nouso ouk kiu-e. Apaüh nung ouk nouso apem asam paosiposo tü kiuao thalotaiutsün goumchi nai ouk kiu-e.

¹⁴Asam ouk kiutsünli nung goumchi ko sau khaiunia tsünoi-e. Asam tsüdekünai asam ün tsam thainian nouso tsak lüko alün tsüha-e.

¹⁵APAOU nou asam akiasiya apem ainou sojei-e, naiuso asamüh Ijip nai noi taoko waohetsünli apaüh asam dongai akiathe titso kankü tsüshi-e, lüko apaüh nung akiasiya nouso apem asam ün ehso khako kankü shi-e.

¹⁶APAOU asam Goaüh asam oukong nai kiutsün mele apem lülomowan, ngüso hau atsüojinyang titso lahan. Asamüh ngüso goa nouso la amkham, tiautenai nung asam thaiutha jin tsak noili-e.

¹⁷“Nung mele nouso sam haove tü piakü noin, samüh ngüso titi thekü komanau tsüshio-e ta asam chija langio.

¹⁸Ngüso lün hatkü lanoi, APAOU asam Goaüh Ijip nokpao naiuso apa khaiuniaso tü ti chhin nung lüyangshi.

¹⁹Asam nioveiüh epkü shitsün akiathe nouso, ii hantsün naiuso athanga chhisiya nouso, naiuso APAOU asam Goaüh oukong asong naiuso akong tsangkü asam jashitsün lüyangsan. Apaüh Ijip hai lomowantsünli, lo sam hatkü noitsün khaiunia apem lomowane.

²⁰Apaüh ngüso mongko lekkatkü iula-iküta sauhai thakhukü pamkü noin nungso lüko lomowane.

²¹Nungtiphe nung khaiunia nouso lün lahat. APAOU asam Goa asamko hakü noin; apa ahatau lümeikü Goa asong noin.

²²Asam khutsün taoko nung mele nouso APAOU nou yamlu yamlu kü komane. Asamüh ngüso apem jamaolu lomowanao tsüshio-e, tititenai asamüh nung chhi naito, liu ai noitsün thainian nouso haove piakü iulaküta nung asam thaiutha angja au tsak noi-e.

²³APAOU nou asam ehso asam oukong nai kiu-e naiuso ngüso molomowan kün lektso ngüso pülaikü iula-i-e.

²⁴Apaüh ngüso nokpaohoi asam oukong nai taiu-e. Asamüh ngüso loate, naiuso loto tsüyangsan shi-e. Khaiunia sau- lünou asam thako tsa au tsüshio-e, asamüh khaiunia chikü lomowane.

²⁵Ngüso sotsom goa nouso lüjahwan; nungso tü sunkü noitsün tangkason naiuso chaiou lakkeng lachinik, naiuso lalo. Asamüh nung chinek naito, nung asam thaiutha jin tsak noili-e, tiautenai APAOU nou sotsom goa nouso chinyanji.

²⁶Asam tsamai nung sotsom goa nouso lalothio, tsüdekünaito nungso thaiuthako athesan shitsün asam chiai noi-e. Asamüh nung sotsom goa nouso lüchinyan, tiautenai nungso apem APAOU athesan khemai noin.