Read Khiamniungan Naga Ngiokhem 8 Bible Online

Ngiokhem 8 - Khiamniungan Naga bible

Ngiokhem 8

¹“Ngo lonyi asam hau kiutsün ngiokhem nouso apem mong kiukü lüang, nungaito asam aa noikü naiuso shingkü iulaküta goumchi sübao asam paosiposo tü thalokü taium nungai kih-e.

²Naiuso apaüh asam tsamlo-iau, asam theluao, asam mongpem ai ti noiküla nung ngeau, apaüh thoiluttsün kankei-e süne tsükankei-e nung ngeloau thaiutha APAOU asam Goaüh nungso pon aopüle liutsa nai asam niakeitsün yam apem asamüh yangsanela.

³Apaüh asam naiukü noi-i, nungphiai asam naiuso asam paosi posoüh tilaitso tsühetekün manna nou aheau kium. Khaiunia nou themtsai noulu aa nou tsükihji, lüko APAOU nou ngiotsün ngio noulu aa noiji ta asam tü tsandeau apaüh nung chhikü noiküla.

⁴Nung pon aopüle chikü nouko asam neshe tsünyian, tsüdekünai asam hok lüko tsüpum.

⁵APAOU asam Goaüh asam lothakü lohat kiutsün nung po tsaküh meshen thsoso thatsamiau alohat tsakli chhikü noiküla ta lüyangsan.

⁶Nungtiphe APAOU nou asam tü thoiluttsünli lüchhi, apa ngiokhem khemko apa tü angio angkü lükih.

⁷APAOU asam Goaüh asam atsüomei goumchi tsak nai nialokü shiji- nung goumchi nai haiu nouso naiuso khiamngan nouso noin naiuso tsamei si king nouso ai tsangthiotsün gohkheiai sungtsün haiungan nouso sunkü noin;

⁸nung goumchi nou wonne au thetsün jinyak, sainao shep, lat shep, sasa shep, Olip eiutsün, naiuso liukhiam sungtsün sunkü noin.

⁹Nung goumchi nai asam ti laitso naiukü naiuso tsüsaiu tsüomkü tsünoi-e. Lung nouso mongai sün nou noin, naiuso king nouso kheiai daosün thaiusanao noin.

¹⁰Asamüh heau mongchiotsün apem epe, naiuso nung alum tsükhemkün goumchi asam hau kiutsün thaiutha asamüh APAOU asam Goa hau nianlom kiu-e.

¹¹“Lonyi ngo asam hau kiutsün athoilut ngiokhem nouso ang au tsüphiokü, naiuso APAOU asam Goa tsübeanao tsüokü lüthe.

¹²Tilai asamüh eheau aiutsün alum taiu-e, naiuso asam kih au tsam amei amei lahshane,

¹³naiuso tilai asam tsam thainian naiuso onnemok hoi, asam tangkason naiuso chaiou lakkeng nouso, naiuso asam ün amao jeng- tsaiu nouso shingkü iula-e,

¹⁴Ijip goumchi sübao nai asam sua aküo nouko noiküla, nung ainou niasan- tsün APAOU asam Goa bülomkü iulakü labean naiuso tsülukü lathe.

¹⁵Apaüh asam aliule suntsün paohoi naiuso mekhakhanio nouso ahat aoli noitsün liutsa lang asongting yankü nialokü shin. Nung singtso goumchi nai apaüh asam hau lung ainou khiam chetsankiu.

¹⁶Liutsa nai apaüh asam hau asam paosiposoüh tilaitso tsühedekü nou eheshiu manna heau kium. Athon nai apaüh asam mei iau asam khako atheluao angja nouso kium.

¹⁷Nungtiphe asam oukongüh asam memei iula ta tilaitso layang.

¹⁸Asam memei iula- itsün nung APAOU asam Goa oukong tsangkü ta lüyangsan. Tiautenai lonyi saokü apa asam paosiposo ko athalou-e taiutsün tü mongkiukü noitsün shioko apaüh nung chhiji.

¹⁹APAOU asam Goa tilaitso labean tsüdekünai amao goa nouso am- khamau naiuso yathsüoau laphokle. Asam phoklelükhun naito, lonyi asam atsüoting lomokü wane ta mitha kiuji.

²⁰Asamüh APAOU tü angio tsüangkü naito, asam khuau noitsünko APAOU nou mele nouso lomowantsünli asam lüko lomowane.