Read Khiamniungan Naga Yohan 10 Bible Online

Yohan 10 - Khiamniungan Naga bible

Yohan 10

¹Yisuüh ngiom, “Ngü asam tü atsüoting ngioji: khaiunia sau, onnemok tsamai bekhan tsangkü tsüdekü lüko amao bekhan ai siangthiokane; apa to kau naiuso laple;

²Lüko sau koukhan tsangkü nappe, apa Onnemok jimtsün.

³Apa hao tsam jimtsün nou koukhan nou sop kiuji; naiuso onnemok hoi nou apa sang lulaji; naiuso apaüh meshen onnemok nian tsonkü jonji, küta nialoukü khuji.

⁴Apaüh meshen ün nou onnemok apem nialouküta ngüso khako khuji, naiuso onnemok hoi nou apa phiai hoilutji; tititenai ngüsoüh apa sang ngen.

⁵Amao phiai ngüsoüh tsühoilute, apa dong ainou to ngüso khupenge; tititenai ngüsoüh amao sang tsünge.”

⁶Nung athatlu ngio Yisuüh ngüso tü ngiom, lüko apaüh ngüso tü ti ngiom nung ngüsoüh tsüngela.

⁷Nungtiphe Yisuüh ngüso tü müjam ngiom, “Atsüoting ngü asam tü ngio-e, Ngo Onnemok koukhan.

⁸Ngü tü chong shitsün apem kau naiuso laple nouso; lüko onnemok hoi nou ngüso ngio tsüang.

⁹Ngo koukhan; ngo tsangkü ajantso napnai, apa kipsane, naiuso nappe, sunge, naiuso eheshiu nou eppe.

¹⁰Kau nou akauloao, aluatao naiuso lotheankiuao thaiuthalu shiji; naiuso ngo to ngüsoüh aa nou eppao, naiuso nung chikü athapem nai eppao thaiutha shin.

¹¹“Ngo onnemok jimtsün amei, onnemok jimtsün amei nou onnemok hoi thaiutha meshen aa taiukiuji.

¹²Sau onnemok jimtsün tsüde, lüko chaichenlu, naiuso onnemok hoi apa ün tsüde, apaüh chiu shitsün epji, naiuso onnemok hoi wankü khuwanji, küta chiu nou ngüso thalouji naiuso khupeng-iji.

¹³Apa chaichen, naiuso onnemok hoi thaiutha tsüyang, nungtiphe apa khuwanji.

¹⁴Ngo onnemok jimtsün amei; naiuso Jüpoüh ngo titi ngen naiuso ngo titi Po nou ngen, nungti ngü Jü onnemok ngen, naiuso Jü onnemok nou ngo ngen;

¹⁵onnemok hoi thaiutha ngü jüpem aa taiukiuji.

¹⁶Nung onnemok hoi ai tsühakü nou ngü ün loüh amao onnemok noin: nungso lüko ngü nialoukü shiao noin, naiuso ngüsoüh Jüsang ange, naiuso ngüso hoi tsak, onnemok jimtsün tsak iula-e.

¹⁷“Nungtiphe Jüpoüh ngo tsüojinji, tititenai müjam laokü loshiao thaiutha ngü mongchiokü jüpem aa taiukiuji.

¹⁸Nung ngo ainou sauüh tsütsolu, lüko jü chija ngü nung taiu kiuji. Nung taiukiuao jü oukong noin, naiuso nung müjam laokü loshiao jü oukong noin. Nung Ngiokhem ngü Jüpo ainou ep.”

¹⁹Nungso ngio thaiutha Yihudahai ongko müjam ajanpek sungh.

²⁰Naiuso ngüso piakü nou ngiom, “Apa da angei onthso noin! naiuso, apa waiwai! tiao asamüh apa ngio angji?”

²¹Amaohaiüh ngiom, “Nung to angei onthso nou thaloutsün ngio tsüde. Angei onthso nou niopek hai niovei lusat kiu-e süne?”

²²Lo Yirusalemai amkham tsam lusiotsün sümai noiküla;

²³nung ahou tao; naiuso Yisu Solomon tsamsu ai tsakeikü noiküla.

²⁴Nungtiphe Yihudahaiüh apa lemlouküta apa tü ngiom, “Ni sam tilektso soisoilekleki-e? Ni Khrista naito, sam tü sasakü angio?”

²⁵Yisuüh ngüso tü thala, “Ngü asam tü ngio-iu, lüko asamüh mong tsülam: Jüpo nianko ngü ti chhi chhiji, nungüh jü thaiutha mitha kiuji.

²⁶Lüko asamüh mong tsülam, tititenai asam jü onnemok ongko tsüha.

²⁷Jü onnemok hoi nou jü sang angji, naiuso ngü ngüso ngen, naiuso ngüso jüphiai hoilutji:

²⁸naiuso ngüso hao asaita aa kiuji; naiuso ngüso laitsüo tsümo-e, naiuso jüpha mong ainou ngüso sauüh tsoloukü khuau tsüshio.

²⁹Jüpo sauüh ngü hau ngüso kiu, apa chikü tü asong; naiuso Jüpo pha ainou sauüh ngüso tsoloukü khuao tsüshio.

³⁰Ngo naiuso Jüpo je tsaklu.”

³¹Nungüh Yihuda haiüh apa da yakao lung nou sem.

³²Yisuüh ngüso tü ngiom, “Ngü asam noikü tisübao Jüpoüh ngü hau chhiao kiutsün ngo piakü chhin, nung mongko tisübao thaiutha asamüh ngü ta lung nou yakao aiuji?”

³³Yihuda haiüh apa tü thala, “Chhi amei thaiutha samüh ni da tsüyak, lüko Goa lotsaotsün shioko; naiuso ni khaiunia theküta achija Goa iulatsün shioko!”

³⁴Yisuüh thalan, “Nung asam Ngiokhemai Goa nou ngiotsün satkü taim, ‘asam goa nouso.’

³⁵Asiongio nou ti ngioji nung asaita atsüo ta samüh ngen, naiuso Goa nou apaüh ngiokiu taiu nouso khaiuniahoi tü goa ta jonji.

³⁶Jü haosonto, Jüpoüh chosanküta ngo goumchi ai hong. Naito, ngü Goa Thso ta ngiotsün Goa lutsaoji ta asamüh titi ngioji?

³⁷Ngü jüpo chhi tsüchhi nai, ngü da lamonglam.

³⁸Lüko ngü nungso chhi naito, asamüh ngü da tsümonglam lüko, ngü chhitsünso tü amonglam, nung thako asamüh apem thaiutha jamaolu ngeluao Po nou ngü da noin naiuso ngü Po nou da noin.”

³⁹Ngüsoüh müjam apa thalouao yam, lüko apa ngüso ainou soikü khuwan.

⁴⁰Yisu müjam Yordan Haiu etsai Yohanüh khiam aya limkiukü noitsün nai khukü noi.

⁴¹Khaiunia piakü Yisu dongai shikü ngiom, “Yohanüh ti athanga chhi tsüchhi, lüko nung khaiunia thaiutha apaüh ngiotsün atsüo noiküla.”

⁴²Naiuso khaiunia piakü nou nungai apa tü monglam.