Read Khiamniungan Naga Yohan 11 Bible Online

Yohan 11 - Khiamniungan Naga bible

Yohan 11

¹Bethani nai Lazar nian nou khaiunia tsak kiakü noiküla.

²(Nung Mari sauüh APAOU, hao anganyam nyamtsün khaiutsom tsomkiuküta meshen khaiuo nou apa hok beiankiu, apa nio Lazar kiakü noiküla.)

³Nungtiphe nosinio neüh apa dongai hongkü ngiom, “APAOU, ni sau tsüojinji apa kiakü noin.”

⁴Tilai Yisuüh nung lula, apaüh ngiom, “Nung akia nou Lazar eantsün athonting tsüde, lüko nung Goa Thso nou ajinka epao noi-e.”

⁵Nungtiphe tilai apaüh apa kiaji ta lula,

⁶nung taoko apaüh apa tai noiküla nungai nenyi shaman.

⁷Nung yankütünai apaüh sahoi tü ngiom, “Sam Yihuda goumchi ai khushiko.”

⁸Sahoi nou apa tü ngioji, “Atsandetsün,” “lome thatsolu Yihuda haiüh ni da lung nou yakao yamkü noiküla; naiuso ni nungai müjam khu-e süne?”

⁹Yisuüh thala, “Ajekhaiu tsakko ghontao chekü nime tsüdeso? Anyi tsakei nai khaiunia nou hok tsüthek-e, tititenai apaüh nung goumchi awon nou epji.

¹⁰Lüko khaiunia nou asu tsakei nai hokkha thekji, tititenai awon apa da tsünoi.”

¹¹Nung ngio chitenai, apaüh ngüso tü ngiom, “Sam hai Lazar saila-iu; lüko apa saitsün ainou chu-iao ngo khuji.”

¹²Nungtiphe sahoi nou apa tü ngiom, “APAOU, apa sailakü noi naito, apa mei-e.”

¹³Yisuüh apa ean nou thaiutha chite: lüko sailakü shioaloutsün thaiutha chiteji ta ngüsoüh yang.

¹⁴Nungai Yisuüh ngüso tü sasakü ngiom, “Lazar eaniu.

¹⁵Asam monglamiao thaiutha ngo nungai tsünoiküla, asam thaiutha ngo monglingji; nungti lüko sam apa dongai khuko.”

¹⁶Nungtiphe Toma, (sau tü thso-ib ta jonji) “apaüh meshen hai sahoi tü ngiom, Sam lüko apako hakü eao khuko.”

¹⁷Nungtiphe tilai Yisu shin, apa loto etam nai pülenyi ngoi-iu ta ep.

¹⁸Lo Bethani nok Yirusalem shimkü mail nime thatsolu pungekü noiküla;

¹⁹nio thaiutha mongsaiu ludang kiuao Martha si Mari ne dongai Yihuda hai piakü shikü noiküla.

²⁰Tilai Marthaüh Yisu shiji ta lula, apa Yisu tü wao khu, lüko Mari to tsamai noiküla.

²¹Nai Marthaüh Yisu tü ngiom, “APAOU, ni nungko noitünto, jünio tsü-e-ela!

²²Lüko ngü ngen, lo lüko ni tilüsong Goa tü sao-e, Goa nou ni hao kiu-e.”

²³Yisuüh apa tü ngiom, “Anio ahkü shi-e.”

²⁴Marthaüh apa tü ngiom, “athon ajekhaiu nai müjam ahkü shitsün taoko apa ahkü shi-e ta ngü ngen.”

²⁵Yisuüh apa tü ngiom, “Müjam ahshitsün naiuso aa ngo; sauüh ngü da monglame, apa e lüko, aa noi-e;

²⁶naiuso sauhai aa noikü ngü da monglame laitsüo tsü-e-e. Ni nung monglamjimo?”

²⁷Apaüh Yisu tü ngiom, “Ah, APAOU!” “goumchi ai ashiao noi nou Goa Thso, Khrista ni ta ngü yangji.”

²⁸Nung ngioküta apaüh khukü meshen nio Mari asu ai jonkü ngiom. “APAOU nungko noin naiuso ni jonji.”

²⁹Apaüh nung lulanai, shakta tsaloukü apa dongai khu.

³⁰(Loüh Yisu nokai moshikü Marthaüh apa phetetsün nailu noiküla.)

³¹Nungai Yihudahai sauhai apa alu-ikü apa ko tsamai noiküla, ngüsoüh Mari shakta tsaloukü sungtsün epkü, apa etam nai shapao khuji ta yangkü apa phiai hoilut.

³²Nungtiphe Yisu tai noiküla Mari nung saoküta apa epkü, apa khako kaukü ngiom, “APAOU, ni nungko noi tünto, jünio tsü-e-ela!”

³³Nungtiphe tilai Yisuüh Mari naiuso apako hakü shitsün Yihudahai shapkü ep, apa mongkia, naiuso mongtsüo,

³⁴kü ngiom, “Asamüh apa tiai wan?” Ngüsoüh apa tü ngioji, “APAOU, shikü athaplu.”

³⁵Yisu shap.

³⁶Nungtiphe Yihuda haiüh ngiom, “apaüh apa titengkü tsüojin athaplu!”

³⁷Lüko ngüso ajantsoüh ngiom, “nung khaiunia sauüh niopek nou niovei lusatkiu, apaüh nung khaiunia tsü-ean-i-e sau-i? Apaüh Lazar e ainou tsülou aa süne?”

³⁸Nungtiphe Yisu müjam mong kiakü etam nai shi, Nung etam nou lung etam tsak, naiuso koukhan nai lungpun tsak noiküla.

³⁹Yisuüh ngiom, “Asamüh lungpun nou alokan!” Sau e noiküla, apa nuüh apa tü ngiom, “APAOU, apa loto nyamji; tititenai apa eküta pülenyingoianiu!”

⁴⁰Yisuüh apa tü ngiom, “Ni monglam naito, Goa ajinka nou eppe, ta ngü ni tü tsüngio süne? Nungtiphe ngüsoüh lung nou lokan.”

⁴¹Yisuüh koyai thapkü ngiom, “Jüpo, ni jüngio lutsün tsangkü ngü anian lomji.

⁴²Ni jüngio asai angji ta ngü ngen: loto lemkü tsakü noitsün hoi nou ni ngo hong ta ayang taiu ao ngü ngeo nung ngiom,”

⁴³Apaüh nungti chiteküta, sang asong nou we, “Lazar, achüo!”

⁴⁴Sau e noiküla, apa phasihok meatsan ne nou nyingpokkü sung; naiuso kha lemkü beiantsün ne nou nyingpokkü noiküla. Yisuüh ngüso tü ngiom, “Apa asoktham,” “küta lükhu-i.”

⁴⁵Nungtiphe Yihudahai piakü sauhai Mari dongai shin naiuso Yisuüh chhitsün ep, nai ngüsoüh apa da monglam.

⁴⁶Lüko ngüso ajantso Farisihoi dongai khukü Yisuüh ti chhin nung ngüso tü ngiom.

⁴⁷Nungtiphe atengteng mesonhoi nouso naiuso Farisihoi nou ajeiaikam nai ngiom, “Samüh ti chhi-e? Tititenai nung khaiunia nou ii nou piakü chhiji!

⁴⁸Samüh apa nungtilu wan nai, khaiunia apem nou apa da monglame: naiuso Rom hai shiküta sam Amkham Tsam naiuso sam mele lomowane!”

⁴⁹Ngüso ongko Kaifa, nian nou tsak sau nung pon ko Akhengting Meson thekü noiküla, apaüh ngüso tü ngiom, “Asamüh ti tsünge!

⁵⁰Sam mele apem mowan nouko to apem thaiutha khaiunia tsak ean chen ta asamüh tsüyang!”

⁵¹Lo apaüh nung meshen mong chija tsüngio, lüko nung ponko apa Akhengting Meson the nou shioko, naiuso Yihuda mele thaiutha Yisu eao noin,

⁵²naiuso Yihuda mele thaiuthalu tsüde, lüko pengkeikü noi nouso Goa thsoso tsakao iulakü apaüh nialouao thaiutha, apaüh nung ngiokiu.

⁵³Nung ajekhaiu ko yakü ngüsoüh apa luatao mongkhem.

⁵⁴Nungtiphe Yisu loto Yihudahai ongko khakhakü tsütsakei, loto nung ainou liutsa shimkü noitsün goumchi Efraim ta jontsün nok ai soikü khu, naiuso nungai apa sahoi nouko noi.

⁵⁵Lo Yihudahai Aasantsün sümai shimkü noiküla: naiuso sümai nou mosaokü nai, kau ainou khaiunia piakü meshen chija lusioluao thaiutha Yirusalemai sungh.

⁵⁶Nungtiphe ngüsoüh Yisu yam, naiuso amkham tsamai tsakü ngüso si ngüso chitekü ngiom, “Asamüh ti yangji? Apa sümai nai tsüshi süne?”

⁵⁷Apa thaluau thaiutha, apa tai noianko, ajantsoüh nge naito, nung han nai meila, ta atengting mesonhoi naiuso Farisi hoi nou ngiokhem kiukü noiküla.