Read Khiamniungan Naga Yohan 12 Bible Online

Yohan 12 - Khiamniungan Naga bible

Yohan 12

¹Nungtiphe Aasantsün Sümai loüh luoknyi noikü, Lazar sau Yisuüh e ainou ahkü shi-in, apa kihtsün Bethani nokai apa shin.

²Nungshioko nungai ngüsoüh apa thaiutha asu eheshiuao sümai tsak shan: naiuso Marthaüh yathsüokü kiu; naiuso Lazar apa ko chih hetsün nai noitsün ongko tsak noiküla.

³Nungtiphe Mariüh tangka piakü mai anganyam nyamtsün khaiutsom tsoi apaitso kankü shikü Yisu hok nai tsomkiu, naiuso meshen khaiuo nou Yisu hok beiankiu: naiuso khaiutsom anganyam nou tsam mean.

⁴Lüko Yihuda Iskariot, apa sahoi ongko tsak, sauüh apa janhe, apaüh ngiom,

⁵“Khaiutsom nung tangka apai tsom süme he janküta tiao tsosilu hai hao tsükiu?”

⁶Apaüh nung tsosilu hai yangkü tsüngio; lüko apa kau, naiuso apa dongko tangka tsop taiuphe, nungai ti taiu nung kankü khu.

⁷Lüko Yisuüh ngiom, “Apa nungti lütaiu! ngo etam nai khanao ajekhaiu thaiutha apa hao nung lütaiu-i.

⁸Tititenai tsosiluhai to asamko asai noin; lüko ngo to asamko asai tsünoi-e.”

⁹Nungtiphe Yihudahaiüh apa nungai noin ta lula: naiuso ngüsoüh Yisu thaiuthalu tsüde, lüko Lazar sau apaüh e ainou ahkü shi-in, apa tü loao thaiutha shin.

¹⁰Lüko atengting mesonhoi nouso Lazar lüko luatao thaiutha ngemloum;

¹¹tititenai apa thaiutha Yihudahai piakü khuwan, naiuso Yisu da monglam.

¹²Lühomli nai Yisu Yirusalemai shiji ta luküta, sümai nai shitsün hoi asong tsaküh

¹³mepai thsam nou kankü apa tü awao khu, naiuso wen, “Lükipsan! Sau Goa nian ko shiji, nung Israel nokpao nian lülomsan!”

¹⁴Yisuüh gado thso tsak epkü, Asiongio nai ngiotsün li nung chiai moknoi;

¹⁵“Zion thso lahat! athaplu, asam nokpao gado thso tsak ko moknoikü shiji.”

¹⁶Ngio nung apa sahoi nou aya naito tsüngela: lüko tilai Yisu ajin nou kha, nungai ngio nung apa thaiutha Asiongio nai sat, naiuso ngüsoüh apa tü nungti chhi-e ta yangsan.

¹⁷Nungtiphe tilai apaüh Lazar etam ainou jonkü, e ainou ahkü shiin, nungai sübao hoi apako noiküla, ngüsoüh mitha kiu.

¹⁸Nung thako hoi nou khukü apa ko pheten, tititenai apaüh nung ii nou chhi-e ta ngüsoüh lula.

¹⁹Nungüh Farisihoi nou ngüso si ngüso chitekü ngiom, “Athaplu, samüh titsüo ashio tsüep! Athaplu, goumchi athum apa phiai hoilutiu!”

²⁰Amkhamao thaiutha sümai nai sauhai sungh, ngüso ongko Grik hai ajantso noiküla:

²¹Nungtiphe ngüsoüh Galil nai noitsün Betsaida hai Philip dongai shikü sang, “Asong hai, samüh Yisu epao aiuji.”

²²Philip khukü Andria hau chite, naiuso Andria si Philip ne khukü Yisu hau chite.

²³Yisuüh ngüso tü thalakü ngiom, “Khaiunia Thso ajinkaao atao sao-iu.

²⁴Atsüoting, ngü asam tü ngio-e, Jinyak woipem tsak goh ai sawanji, nai apa meshen pemsa noiji; lüko apa e naito, apa eiu nou piakü eiuji.

²⁵Sauüh meshen aa tsüojinji, nung mowanji; sauüh nung goumchi ko meshen aa chinyanji, apaüh nung asaita aa saokü taiu-e.

²⁶Ajantsoüh ngo yathsüoao aiunai, apa jüphiai ohoilut-i; naiuso ngo tiai noi-e, nungai ngo yathsüotsün lüko noi-e: ajantsoüh ngo yathsüo naito, Po nou apa nian lome.

²⁷“Lo jümongai kiajikanji; naiuso ngü ti ngio-e? ‘Jüpo, nung taoko ngo akipsan.’ Lüko nung thaiutha ngo nung tao nai shin.

²⁸Jüpo, anian ajin lükha-i!” Nungtiphe aün ainou sang tsak sungkü ngiom, “Ngü nung ajinkai-iu, naiuso nung müjam ajinkha-i-e.”

²⁹Nungtiphe shimkü tsakü noitsün hoi nou nung lulanai ahmok-iu ta ngiom, amao haiüh ngiom, “Aün honghoi tsaküh apa ko chete-iu.”

³⁰Yisuüh thalakü ngiom, “Nung sang nou jüthaiutha tsüde, lüko asam thaiutha shin.

³¹Lo nung tao nouko nung goumchi thaiutha mikhemao noin, nung goumchi nokpao nou lo sawane.

³²Tilai ngo goumchi ainou loksane, ngü khaiunia chikü meshen chija jüdongai tenshi-e.”

³³(Lüko titi in angja omhe nou apa e-i-e, nung nge-iao thaiutha apaüh nung ngio nou ngiom.)

³⁴Nungtiphe hoi nou apa tü thala, “Khrista to asai noiji ta samüh ngiokhem Asiongio nai nou lula: naito Khaiunia Thso loksanao noin ta ni titi ngioji? Nung Khaiunia Thso nou sau?”

³⁵Nungtiphe Yisuüh ngüso tü ngiom, “Loto atao letletkülu awon nou asam ongko noin.” Anyakhem nou asam tsüthaao thaiutha, asam ko awon noi nai lütsakei: sauüh anyakhem nai tsakeiji apa tiai khuji tsünge.

³⁶Awon asam ko noi nai, asam awon thsoso iulakü hao, awon da lümonglam. Yisuüh nung ngio chite nai soikü khukü ngüso ainou pamkü noi.

³⁷Lüko apaüh ngüso dongko ii nungtitso chhi lüko, ngüsoüh apa da tsümonglam.

³⁸Nungtiphe E-po Isaiaüh chitetsün ngio nung atsüo shinap: “APAOU, sauüh sam ngem da monglam? Sauhai hao APAOU nou apa oukong tsangsheikü han?”

³⁹Nung thaiutha ngüsoüh mong tsülam, tititenai Isaiaüh lüko ngiom,

⁴⁰“APAOU nou ngüso niopek iula-in naiuso ngüso mongpem kongkü iula-in, nungtiphe ngüso niovei nou tsüeppe, naiuso ngüso mongpem nou tsüngela-e, ngüso ngo lomeikiuao thaiutha jüdongai phoklekü tsüshi-e ta Goa nou ngioji.

⁴¹Isaiaüh nung ngio ngiom, tititenai apaüh Yisu ajinka ep; naiuso apaüh apa thaiutha chite.

⁴²Nungti nokpao nokshing ongko lüko piakü nou apa da monglam; lüko ngüso Yihuda kamthang ainou wanküle ta hat nou shioko, Farisihoi khako ngüsoüh nung tsüthalou.

⁴³Tititenai ngüsoüh Goa nianlom nouko to khaiunia nianlom tekkü tsüojin.

⁴⁴Naiuso Yisuüh wekü ngiom, “Sauüh ngü da monglamji, nung ngü da tsüde, lüko ngo hongtsün da monglamji.

⁴⁵Naiuso sauüh ngo lou-e apaüh ngo hongtsün louji.

⁴⁶Sauhaiüh ngü da monglame, apa anyakhem nai tsünoi-ao ngo goumchi ai awon tsak shin.

⁴⁷Naiuso ajantsoüh jüngio lulakü nung tsükankei naito, ngü apa mi tsükhem kiu-e tititenai goumchi mi khemao tsüde lüko goumchi kipsanao thaiutha ngo shin.

⁴⁸Sauüh ngo tsülou-e naiuso jüngio tsüange, apa mi khemao tsak noin: ngü ti ngio chite nungühlu athon ajekhaiu nai apa mi kheme.

⁴⁹Nung atsüo tiautenai ngü meshen mongchija nou tsüchite; lüko ngü ti ngio-e, naiuso ti chite-e, nung ngo hongtsün Po nou ngü hao ngiokhem kiu.

⁵⁰Apa ngiokhem asaita aa ta ngü ngen: nungtiphe ngü ti chiteji, nung Po nou ngü tü titi ngioji nungti ngü chiteji.”