Read Khiamniungan Naga Yohan 13 Bible Online

Yohan 13 - Khiamniungan Naga bible

Yohan 13

¹Lo Aasantsün sümai mosaokü nai, Yisuüh nung goumchi ainou Po nou dongai pungeao atao sao-e ta ngekü, goumchi ko noitsün meshen ün tsüojin, nou ngüso athon saokü tsüojin.

²Naiuso asu chih henai loto Simon thso Yihuda Iskariot mongpemai Yisu janheao biya nou mongthat lothiowankü,

³Po nou apa pha mongko apem kiuwaniu naiuso apa Goa ainou shin, naiuso Goa dongai khuji ta Yisuüh ngekü,

⁴chih hetsün ko tsaküta apa ne losankü taiu; naiuso apaüh pem beiantsün ne tsak kankü shikü meshen om nai omthsa thsalo.

⁵Nungai apaüh chiukau nai khiam lothio, küta sahoi hok tsaowanao, naiuso pem peiantsün ne ti in nou apa oumthsa thsakü noiküla, nungüh ngüso peiankiuao yachu.

⁶Nungko Yisu Simon Peter dongai shinai Simon Peterüh Yisu tü ngiom, “APAOU, ni jühok tsaowan kiuji süne?”

⁷Yisuüh thalakü apa tü ngiom, “Ngü ti chhiji ni loto tsünge; lüko ni nung phiai nge-e.”

⁸Peterüh apa tü ngiom, “Ni laitsüo jühok tsütsaowankiu-e!” Yisuüh apa tü thala, “Ngü ni tsütsawan kiunai, ni ngüko ti haoson tsünoi.”

⁹Simon Peterüh apa tü ngiom, “APAOU, jühoklu tsüde, lüko jüpha naiuso jükhaiu lüko atsaowan kiu!”

¹⁰Yisuüh apa tü ngioji, “Sau khiam peng-iu, apaüh hok nou chiai tsaowanao tsünoi: apa chikü yanthsüokü noin; naiuso asam apem yanthsüokü noin lüko tsak tsüyanthsüo.”

¹¹(Tititenai sauüh apa janhe-e, nung apaüh ngen; nungtiphe apaüh nung ngiom, “Asam chikü yanthsüokü tsüde.”)

¹²Nungtiphe apaüh ngüso hok tsaowankiuküta, meshen ne tenkü moknoi, küta ngüso tü ngiom, “Ngü asam tü ti chhin nung asamüh ngejimo?”

¹³“Asamüh ngü tü Atsandetsün, naiuso APAOU, ta jonji: naiuso asamüh atsüo ngioji: tititenai nung ngo.

¹⁴Nai ngo, APAOU naiuso Atsandetsün nou asam hok tsaowankiu naito, asamüh lüko tsaküh tsak hok tsaowankiuao noin.

¹⁵Tititenai ngü asam tü chhitsünli asamüh lüko chhiao thaiutha, ngü asam hao athatluao tsak kiu-iu.

¹⁶Atsüoting ngü asam tü ngio-e, meshen tsampao nouko tsamki asong tsüde; naiuso meshen hongtsün nouko honghoi asong tsüde.

¹⁷Asamüh ngüso ngekü kankeinai asam thaiumei!

¹⁸“Ngü asam chikü thaiutha chiteji tsüde, ngü sauhai shingsan ngüso ngü ngen: lüko Asiongio shinapao thaiutha nung atsüo, ‘Sauüh ngü ko heshiuji apaüh jüthako meshen hok loksan.’

¹⁹Nung tilai shinape, ngo apa kha ta asamüh monglamao thaiutha moshinapkünai lo yakü ngü asam tü ngioji.

²⁰Atsüoting ngü asam tü ngioji, Ngo hongtsün khaiunia sauüh louji apaüh ngo louji; sauüh ngo louji; apaüh ngo hongtsün louji.”

²¹Yisuüh nung ngioküta apa mongkiakü sasakü ngiom, “Atsüoting ngü asam tü ngio-e, Asam ongko tsaküh ngo janhe-e.”

²²Apaüh sau thaiutha chiteji ta ngakü sahoi nou ngüso si ngüso thape.

²³Nungai sahoi ongko tsak, Sau Yisuüh tsüojin, apa Yisu kong nai niolutkü then dongko noiküla.

²⁴Nungtiphe Simon Peterüh apa tü thapkü ngiom, “Sau thaiutha nung chiteji.”

²⁵Apa noitsünli apaüh Yisu kong nai niolutkü apa tü ngiom, “APAOU nung sau?”

²⁶Nungtiphe Yisuüh thalaji, “themtsai ko kian khiam lao-ekü sau hao ngü kiu-e, nung apa.” Nungtiphe Yisuüh themtsai nou kian khiam lao-ekü Simon thso Yihuda Iskariot hao kiu.

²⁷Themtsai nou kiuküta, Biya apa da nap. Nungai Yisuüh apa tü ngiom, “Ni ti chhiao noin, shakta lüchhi.

²⁸Loto apaüh ti thako ngio nung apa tü ngiom, chih he nai noitsün ongko sauüh tsünge!”

²⁹Tititenai Yihuda dongko tangka hiu nou noiphe, Sümai thaiutha sam ti pokü noin nung lütuh ta tsüdekünai tsosilu hai hao tso tsak lükiu ta Yisuüh apa tü ngioji lamkü ajantsoüh yang.

³⁰Themtsai nou louküta apa nungailu kingchiai khu: naiuso nungai asu noiküla.

³¹Yihuda Iskariotüh hoi nou wankü khuwankütünai, Yisuüh ngiom, “Lo Khaiunia Thso ajinka nou achiai sungiu; Goa ajinka apa tsangkü achiai sungiu.

³²Naiuso Goa nou meshen da apa ajinkha-e, naiuso apaüh apa liukü ajinkha-i-e.

³³Ehen methsohoi, loto ajekhaiu thsaothsaokülu ngo asam ko noiküta, Asamüh ngü tü yame: naiuso ngü Yihudahai tü titi ngiom, nungti lo ngü asam tü ngio-e, ‘Ngo tiai khu-e, asamüh nungai shiao tsüshio-e.’

³⁴Ngioklhem ayan tsak ngü asam hao kiuji, nungti asamüh haisihai lütsüojine; ngü asam tü titi tsüojin nungti asamüh haisihaine lütsüojine.

³⁵Asamüh haisihai tsüojine naito, nungüh asam jü sahoi ta apemüh nge-e.”

³⁶Simon Peterüh apa tü ngiom, “APAOU, ni tiai khu-e?” Yisuüh thalan, “Ngo tiai khu-e, ni loto nungai jüphiai hoilutao tsüshio-e.” “Lüko ni phikü to hoilute.”

³⁷Peterüh apa tü ngiom, “APAOU, tiau loto ngü aphiai hoilutao tsüshio-e?” “Athaiutha ngü jüpem aa taiu kiuao khemkü noin!”

³⁸Yisuüh thalan, “Ni jü thaiutha apem aa taiukiu-e süne? Atsüoting ngü ni tü ngio-e, Waio nou mokokün khako ni ngo samjam tsüthalou-e.