Read Khiamniungan Naga Yohan 14 Bible Online

Yohan 14 - Khiamniungan Naga bible

Yohan 14

¹Yisuüh ngüso tü ngiom, “Asam mong laluthe.” “Goa da lümonglam, naiuso ngü da lüko amonglam.

²Jüpo tsamai tsampai piakü noin, naiuso ngo asam thaiutha athang tsak khemtaiuao khuji. Nungti tsüdetünto ngo asam tü nung tsüngio-ela.

³Naiuso ngo khukü asam thaiutha athang tsak khemtaiuküta ngo asam dongai laokü shikü jüdongai nialou-e, nungaito ngo tiai noi-e asasm lüko nungai noi-e.

⁴Ngo tiai khuji, nung yam nou ti athangai niaji asamüh ngen.”

⁵Tomaüh apa tü ngiom, “APAOU, ni tiai khu-e samüh tsünge; naito samüh yam nou titi ngen?”

⁶Yisuüh apa tü ngiom, “Yam nou, Ngiotsüo nou, naiuso Aa nou Ngo: Ngü tsangkü tsüdekünai sauüh Jüpo dongai tsüshi.

⁷Asamüh ngo ngetünto, Jüpo lüko nge-ela,” “loyakü asamüh apa ngen, naiuso apa eppe.”

⁸Philipüh apa tü ngiom, “APAOU, sam tü Po nou ahan, nungüh sam thaiutha saiuwane.”

⁹Yisuüh apa tü ngiom, “Philip, ngo asam ko nunglektso noi lüko, ni ngo tsüngeso? Sauüh ngo epiu, apaüh Po nou epiu; Sam tü Po nou ahan ta ni titi ngioji?

¹⁰Ngo Po nou da noin, naiuso Po nou ngo da noin, ta ni mong tsülamso? Ngü ti ngio asam tü ngioji nung jü chija ainou tsüchiteji: lüko Po nou ngü da noikü, apaüh meshen chhi chhiji.

¹¹Ngo Po nou da noin, naiuso Po nou ngü da noin ta jüngio nung da amonglam.

¹²Atsüoting ngü asam tü ngio-e, Sauüh ngü da monglamji, ti chhi ngü chhiji, apaüh lüko nung chhi-e; naiuso nung chhi nou tü tekkü apaüh chhi-e; tititenai ngo Po nou dongai khu-e.

¹³Asamüh jünianko tilüsong sao-e, nung ngü chhi-e, nungtiphe Thso nou da Po nou ajinka-e.

¹⁴Asamüh ngü tü jünian ko tso tsak saonai, nung ngü chhi-e.

¹⁵“Asamüh ngo tsüojin nai, jüngiokhem asamüh kankei-e.

¹⁶Ngo Po nou tü asam ko asaita noiao thaiutha, apaüh asam hao amao shioalu-itsün kiuao sao-e.

¹⁷Nung ngiotsüo Onthso; sauüh Goa thaiutha ngiotsüo hane; apa goumchi nou loau tsüshio; tititenai goumchi nou apa tsüep, naiuso ange lüko tsünge: asamüh apa ngen; tititenai apa asam ko noin, naiuso asam da noi-e.

¹⁸“Ngü tilai khu-e asam pemsa tsüwane: ngo asam dongai laokü shi-e.

¹⁹Letlettsokü noikütünai, loto goumchi nou ngo tsüeppe; lüko asamüh to ngo eppe: ngo aa noin, nungüh asam lüko aa noi-e.

²⁰Nung ajekhaiu nai ngo Jüpo da noin, naiuso asam da noin, naiuso ngo asam da noin, ta asamüh nge-e.

²¹“Sau ko jüngiokhem noin, naiuso nung kankeiji, apaüh ngo tsüojinji, Jüpoüh apa tsüojine naiuso ngo jü chija apa tü achiai sungkü hane.”

²²Yihudaüh (Iskariot tsüde) apa tü ngiom, “APAOU, titi thekü goumchi khako ni meshen chija achiai tsüsungkü sam khakolu achiai sunge?”

²³Yisuüh thalakü apa tü ngiom, “Ajantsoüh ngo tsüojin nai, apaüh jüngio ange; naiuso Jüpoüh apa tsüojine, naiuso sam apa dongai shi-e, naiuso apako noi-e.

²⁴Sauüh ngo tsütsüojin apaüh jüngio tsüang: naiuso asamüh ti ngio luji nung jüngio tsüde, lüko ngo hongtsün Jüpo ngio.

²⁵“Loüh asam ko noikü ngü nung ngio asam tü chite-iu.

²⁶Lüko shioalu-itsün, nung Asio Onthso sau Po nou jünian ko honge, apaüh asam tü apem tsande-e, naiuso ngü asam tü ngiotsün apem yangsani-e.

²⁷“Ngü asam ko shioalu taiukiuji; goumchi nou kiutsünli ngü asam hao tsükiu. Asam mong laluthe, naiuso hatkü lanoi

²⁸‘Ngo khuji, lüko asam dongai laokü shi-e,’ ta ngü asam tü ngiotsün asamüh lula. Asamüh ngo tsüojin tünto, asamüh lüko monglingela, tititenai ngo Po nou dongai khuji: tititenai Po nou ngü tü song.

²⁹Tilai atao shisao-e asamüh monglamao thaiutha, atao moshikünai ngü sasm tü ngio-iu.

³⁰Asam ko ngo loto piakü tsüchite-e, tititenai nung goumchi nokpao shiji. Apa ngüko ti haoson tsünoi.

³¹Lüko ngo Po nou tü tsüojinji, naiuso Po nou ti ngiokhem kiu nung ngü chhiji ta goumchi nou ngeao thaiutha apa shi-e. “Ashi, sam nung athang ainou tsaloukü khuko.”