Read Khiamniungan Naga Yohan 15 Bible Online

Yohan 15 - Khiamniungan Naga bible

Yohan 15

¹“Ngo atsüoting Sainao naiuso eiu a tsün Jüpo.

²Ngü da noitsün sübao akia nouso eiu tsüeiu-e apaüh nung shapanji: naiuso sübao akia nouso eiu eiuji, tekkü eiu eiu-iao thaiutha apaüh nung losiokiuji.

³Ngü asam tü chitetsün ngio nou loto asam to lusiokü noin.

⁴Ngü da anoi naiuso ngo asam da noi-e. Paipem nou da tsünoi nai, titi akia nou eiu eiuao tsüshio: nungti ngü da tsünoi nai, asamüh lüko eiuao tsüshio.

⁵“Ngo paipem naiuso asam akia nou: Sau ngü da noin naiuso ngü sao da noin, nungüh eiu piakü eiuji: tititenai ngü ainou pungekü asamüh ti chhiao tsüshio.

⁶Ajantso ngü da tsünoi nai, apa akia nou li wanji, naiuso wonanji; naiuso ngüsoüh nung kamshiji, naiuso aokhan nai lothiokü jahji.

⁷Asamüh ngü da noi nai, naiuso jüngio asam da noi nai, asamüh tilüsong aiuji lüsao, naiuso nung asam tü chhi-e.

⁸Jüpo ajinka asam chhi singkü khutsün tsangkü hanji; naiuso nungli asam jü sahoi iula-e.

⁹Jüpoüh titi ngo tsüojin, ngo lüko nungti asam tsüojin: asam ngü tsüojintsün nai lünoi.

¹⁰Ngü titi Jüpo ngiokhem kankei naiuso apa atsüojin nai noiji; nungti asamüh jüngiokhem kankei nai, asam lüko ngü tsüojintsün nai noi-e.

¹¹“Ngo monglingtsün asam da noi-e naiuso asam monglingtsün saiukü iulaao thaiutha, ngü asam tü ngio nung chiten.

¹²Ngü asam titi tsüojin, nungti asam lüko hai si hai lütsüojine; nung ngü ngiotsün noin.

¹³Khaiunia nou hai thaiutha meshen aa taiu kiu-e, nungtü songkü sau atsüojin tsünoi.

¹⁴Ngü asam tü ti ngioji nung asamüh chhi nai, asam jü hai.

¹⁵Ngü loto asam tü tsamki ta tsüjon shi-e, tititenai meshen tsampao nou ti chhiji nung tsamki nou tsünge: lüko ngü asam tü hai ta jone; tititenai Jüpo ainou ngü ti lula nung apem asam hao ngü ngelu-i-e.

¹⁶Asamüh ngo shingsan tsüde, lüko ngü asam shingsan, naiuso asamüh khukü eiu eiuao thaiutha naiuso asam eiu noi ao thaiutha ngü asam thomthio: nungtiphe asamüh jünianko Po nou tü tilüsong sao-e, nung apaüh asam hao kiu-e.

¹⁷Asamüh hai si hai tsüojineao nung ngü asam tü ngioji.

¹⁸“Goumchi nou asam chinyan nai, asam mochinyan, khako aya ngo chinyan ta asamüh lüyangsan.

¹⁹Asam goumchi ün tünto, goumchi nou meshen ün tsüojinela: lüko asam goumchi ün tsüde, loto ngü asam goumchi ainou shingsan, nungüh goumchi nou asam chinyanji.

²⁰‘Meshen tsampao ko tsamki asong tsüde,’ ta ngü asam tü ngiotsün ngio lüyangsan. ‘Ngüsoüh ngo omheani, naito ngüsoüh asam omheani-e: ngüsoüh jüngio ang, naito ngüsoüh asam ngio lüko ange.

²¹Lüko ngüsoüh asam tü nung chikü chhi-e, tititenai asam ngü ün ngüsoüh ngo hongtsün tsünge.

²²Ngo shikü ngüso tü tsüchite tünto, ngüso angei tsünoiela: lüko loto ngüso angei thaiutha athakhuao tsünoi.

²³Sauüh ngo chinyanji apaüh Jüpo lüko chinyanji.

²⁴Sübao chhi amao sauüh tsüchhi, nung chhi nou ngüso ongko ngü tsüchhi tünto ngüso angei tsünoi-ela: lüko loto ngüsoüh epiu naiuso Jüpo je nemtso chinyaniu.

²⁵‘Lüko ngüsoüh yaang nai ngo chinyan,’ ta ngiokhem nai satkü noitsün ngio shinapao thaiutha nung sungji.

²⁶“Lüko Aalu-itsün nungti ngiotsüo Onthso, sau Po ainou asam dongai ngü honge, sau Po ainou shiji, apa tilai shi-e apaüh jüthaiutha mitha kiu-e.

²⁷Naiuso asamüh lüko mitha lükiu, tititenai asam aya ainou ngü ko noiküla.