Read Khiamniungan Naga Yohan 16 Bible Online

Yohan 16 - Khiamniungan Naga bible

Yohan 16

¹Asam tsüthekkatao thaiutha ngü asam tü ngio nung chiten.

²Ngüsoüh asam Yihuda kamthang ainou wane: ah, sauhaiüh asam luate apaüh goa chhi chhiji ta yangao atao shiji.

³Khaiunia hoi nou Po nou tsüdekünai ngü tsüngekün shioko asam da nung chhi-e.

⁴Lüko tilai nung chhi nou thaiutha atao shi-e, ngü asam tü nung thaiutha ngiomka ta asamüh yangsanao thaiutha ngü asam tü nung chikü ngioji. Ngü nung asam tü aya ainou tsüngio, tititenai ngo asam ko noiküla.

⁵Lüko lo ngo meshen hongtsün dongai khu-e; lüko asam ongko sauüh ni tai khu-e? ta ngü tü tsüsang.

⁶Asam mongpem amongkia nou meaniu ta lo ngo asam tü ngio-iu.

⁷Nungti lüko ngü asam tü atsüoting ngioji; ngo khunai asam thaiutha ameiting: tititenai ngo tsükhunai, Aalu-itsün asam dongai tsüshi-e; lüko ngo khunai ngü apa asam dongai honge.

⁸Naiuso apa tilai shi-e, apaüh angei thaiutha, naiuso asio thaiutha, naiuso mikhem thaiutha; goumchi ko atsüowan nou mitha kiu-e.

⁹Angei thaiutha, tiautenai ngüsoüh ngü da mong tsülam.

¹⁰Asio thaiutha, tiautenai ngo Po nou dongai khu-e, naiuso loto asamüh ngo tsüeppe;

¹¹mikhem thaiutha, tiautenai nung goumchi nokpao mi nou khemiu.

¹²“Ngü asam tü ngioao loüh ngio piakü noin, lüko asamüh nung lo tsüjeilu-e.

¹³Nungti lüko tilai ngiotsüo Onthso shi-e, apaüh chikü ngiotsüo nou dongai asam nia-e: tititenai apaüh meshen chija ainou tsüchite-e; lüko tilüsong apaüh lu-e, nung apaüh chite-e: naiuso ti ashiao noin, nungso thaiutha apaüh asam hao ngela-i-e.

¹⁴Apaüh ngo ajinka-i-e: tititenai apaüh ngü ainou lu-e, naiuso nung asam hao ngela-i-e.

¹⁵Po nou tilüsong taim nung chikü ngü nou: nungtiphe apaüh ngü ainou lu-e: naiuso nung asam hao ngela-i-e, ta ngü ngiom.

¹⁶“Atao letletkü noikütü nai loto asamüh ngo tsüeppe; naiuso loüh atao letletkü noikütü nai, asamüh ngo eppe.”

¹⁷Apa sahoi ongko ajantso ngüso si ngüso chitekü ngiom, “atao letletkü noikütü nai loto asamüh ngo tsüeppe; naiuso loüh atao ‘letletkü noikütü nai’ asamüh ngo eppe: ‘tititenai ngo Po nou dongai khu-e,’” ta ngiotsün nung ti?

¹⁸Nungtiphe ngüsoüh ngiom, Atao letletkü ta apaüh ngiotsün nung ti? Apaüh ti ngioji samüh tsünge!”

¹⁹Ngüsoüh apa tü sangao aiuji ta Yisuüh ngekü ngüso tü ngiom, ‘Atao letletkü noiküta,’ asamüh ngo tsüeppe, naiuso loüh atao letletkü noiküta asamüh ngo eppe, ta ngionai nung thaiutha asam ongko sangelatjiso?

²⁰Atsüoting ngü asam tü ngio-e, Asam shape naiuso mongsaiu-e, lüko goumchi nou monglinge: asam mongmate, lüko asam amongmat nou amongling iula-e.

²¹Tilai nyiuhai tsak thsohalo tao angjaji, tiautenai apa angja atao nou shisao-iu; lüko tilai apaüh methso nou haji, apaüh meshen angja beyanji, tiautenai methso tsak goumchi ko kihatsün thaiutha apa monglingji.

²²Nungtiphe lo asam amongsaiu taim: lüko ngü asam müjam epshi-e, naiuso asam mongpem monglinge, naiuso asam amongling sauüh tsütsolu-e.

²³“Nung ajekhaiu ko asamüh ngü tü ti tsüange. Atsüoting ngü asam tü ngio-e, Asamüh Po nou tü tso tsak saonai, apaüh nung asam hao jünian ko kiu-e.

²⁴Lo saokü asamüh jünian ko titsüo mosao: lüsao naiuso asamüh eppe, nungtiphe asam amongling saiukü iula-e.

²⁵“Ngü athatluao nou asam tü nung chiten: tilai ngü asam tü loto athatluao nou tsüchite-e, lüko Po nou thaiutha khakhakü asam tü ngio-e, nungtin atao shiji.

²⁶Nung ajekhaiu nou ko asamüh jünian ko sao-e: naiuso asam thaiutha ngü Po nou tü sange ta ngü asam tü tsüngio.

²⁷Tititenai Po nou asam tü tsüojinji. Apaüh asam tsüojinji, tiautenai asamüh ngü tsüojin naiuso ngo Goa ainou shin ta monglam.

²⁸Ngo Po ainou shin, naiuso goumchi ai shin; müjam ngü goumchi wane naiuso Po nou dongai khu-e.”

²⁹Apa sahoi nou ngioji, Athaplu, “lo ni athatluao nou tsüchitekü khakhakü chiteji.

³⁰Ni apem ngen, naiuso sauüh ni tü sangao tsünoi ta lo samüh ngen: nungüh ni Goa ainou shin ta samüh monglamji.”

³¹Yisuüh ngüso tü thala, “Lo asamüh mong lamji süne?

³²Athaplu, asam khaiunia pungkü meshen noitsün nai penge, naiuso jüpemsa wane, nungtin atao shiji, ah, nung shisao-iu; nungti lüko ngo jüpemsa tsüde, tititenai Po nou ngü ko han.

³³Ngü da asam aalu epao thaiutha ngü asam tü nung chiten. Goumchi ko asam angja omhe taim: lüko mong nou lüsong! ngü goumchi shio-iu!”