Read Khiamniungan Naga Yohan 18 Bible Online

Yohan 18 - Khiamniungan Naga bible

Yohan 18

¹Nung misao saoküta Yisuüh meshen sahoi nou ko Kidron haiu etsai khun, nungai aimong tsak noiküla, nung mongai apa naiuso apa sahoi nap.

²Lo Yihuda sauüh apa janhe, apaüh lüko akhutsün ngen: tititenai Yisuüh meshen sahoi nou ko piakü jam nung ko pheten.

³Nungai Yihuda akong hoi naiuso nokshing nouso atengting meson nouso si Farisi nouso ainou lusankü khaiutsom tson, tsonke, naiuso sah si lai kankü nungai shi.

⁴Nungtiphe Yisuüh apa da tilüsong shinape nung chikü ngekü, kha-ai khukü ngüso tü ngiom, “Asamüh sau yamji?”

⁵Ngüsoüh apa tü thala, Nazaret hai Yisu. Yisuüh ngüso tü ngiom, “Ngo apa,” Yihuda sauüh apa janhe, apa lüko ngüso ko tsakü noiküla.

⁶Nungtiphe tilai apaüh ngüso tü “ngo apa” ta ngiom, ngüso phiai soikü khukü goh ai khia-an.

⁷Nungtiphe apaüh müjam ngüso tü sang, “Asamüh sau yamji?” Ngüsoüh ngiom, “Nazaret hai nou Yisu.”

⁸Yisuüh thala, “Ngo apa ta ngü asam tü ngio-iu.” “Nungtiphe asamüh ngo yamji naito, nung khaiunia nouso lükhu-i.”

⁹(“Jüpo, nung ni ngao kiutsün ongko tsaktsüo tsümowan, ta apaüh ngiotsün ngio shinapao thaiutha noiküla.”)

¹⁰Nungai Simon Peterüh sah kankü noiküla, nung tensankü akhengting meson tsamki da he, naiuso apa noukhan uai nou heankiu. Nung tsamki nou nian Malka noiküla.

¹¹Nungai Yisuüh Peter tü ngiom, “Asah sahsop nai lüsop! thengkam sübao Po nou ngü hao kiu, nung ngü tsüshiu-e süne?”

¹²Nungai Rom akong hoi naiuso ngüso leng, naiuso Yihudahai nokshing haiüh Yisu thaloukü ke,

¹³naiuso aya nai Ana dongai nialokü khu; tititenai apa Kaifa tsammongnyiu po, naiuso Kaifa nung pon ko, Akhengting meson noiküla.

¹⁴Khaiunia chikü thaiutha ko khaiunia tsak eao noin ta Yihudahai nokpao nokshing nouso ta alutsüo kiutsün nung Kaifa noiküla.

¹⁵Simon Peter Yisu phiai hoilut, loüh amao hai tsaküh hoilut. Lo nung sahoi nou Akhengting meson nou ngekü noiküla, naiuso apaüh Yisu ko Akhengting meson kamai nap; lüko Peter to kengai kuokhan nai tsakü noiküla.

¹⁶Nungtiphe Akhengting meson nou ngetsün sahoi nou sungkü kuokhan jimtsün ko chiteküta Peter nialüthio.

¹⁷Kuokhan nou ko nai meso nou Peter tü ngiom, “ni nung khaiunia sahoi ongko tsak süne?” Apaüh ngiom, “Ngü tü tsüde.”

¹⁸Nungai tsamki nouso naiuso ehü nousoüh chongphe in jahkü, nungai in lamhekü tsakü noiküla: naiuso Peter lüko tsakü in lamhekü ngüso ko noiküla.

¹⁹Akhengting Meson nou Yisu tü apa sahoi naiuso apaüh tsandetsün thaiutha sang.

²⁰Yisuüh apa tü thala, “Ngü khakhakü goumchi tü chite-iu; Yihudahai aikü kamshitsün amkhamtsam naiuso Yihuda kamthang nai ngü asai tsande; naiuso tsamsu ai ngü ti tsüchite.

²¹Ni lüko tiao ngü tü sangji? Ngü chitetsün sauhaiüh lu ngüso tü lüsang: athaplu, ngü ti ngiom ngüsoüh ngen.”

²²Tilai apaüh nung ngiom, shimkü tsakü noitsün nokshinghoi ongko tsaküh Yisu da meshen pha nou la kü ngiom, “Ni Akhengting Meson tü nungti thalajiso?”

²³Yisuüh apa tü thala, “Ngü tsümeikü chitekü noi nai, tsümeikü nou mitha akiu: lüko amei chitekü noi nai, ni tiao ngü da lahji?”

²⁴Nungtiphe Anaüh apa kekü Akhengting Meson Kaifa dongai hong.

²⁵Lo Simon Peter tsakü in lamhekü noiküla. Nungtiphe ngüsoüh apa tü ngiom, “Ni apa sahoi ongko tsak süne?” Apaüh tsüthaloukü ngiom, “Ngü tü tsüde.”

²⁶Peterüh sau noukhan heankiu, apa tsammong Akhengting Meson tsamki ongko tsaküh ngiom, “Ngü ni Yisu ko aimongai tsüep so?”

²⁷Nungtiphe Peterüh müjam “tsüthalou” naiuso nungailu waio nou ko.

²⁸Ahom ngüsoüh Yisu Kaifa dongai nou nokpao tsamai nialoukü khu; naiuso ngüso tsüngela-iau aasan sümai heao thaiutha ngüso to nokpao tsamai tsünap.

²⁹Nungtiphe Pailat ngüso dongai sungkü ngiom, “Nung khaiunia thako asamüh ti tsütsüokü kankü shiji?”

³⁰Ngüsoüh thalakü apa tü ngiom, “nung khaiunia tsümekü chhitsün tsak tsüdetünto, samüh apa ni hao thumkü tsükiu-ela.”

³¹Nungtiphe Pailatüh ngüso tü ngiom, “Asamüh asam chija apa nialoukü khukü, asam ngiokhem nai noitsünli apa mi lükhem. “Yihuda haiüh apa tü ngiom, “Khaiunia luatao sam ngiokhem nai ayam tsünoi.”

³²(Nung ngio Yisuüh apa tisübao aküo in tsangkü eao noin ta ngiotsün ngio atsüoting shinapao noiküla.)

³³Nungtiphe Pailat müjam nokpao tsamai napkü Yisu jonkü apa tü ngiom, “Ni Yihudahai nokpao süne?”

³⁴Yisuüh thala, “Ni nung achija ngioji süne tsüdekünai amao haiüh jü thaiutha nung ni tü ngiom?”

³⁵Pailatüh thala, “Ngo Yihudahai süne? Ni meshen kau nou naiuso atengting mesonhoi nou ngühau thümkü kiu: ni ti chhin?”

³⁶Yisuüh thala, “Jü nokshing nung goumchi nokshing tsüde, jü nokshing nung goumchi nokshing tünto, Yihudahai pha nai ngo tsükiuao thaiutha jütsamki nousoüh lihe-ela: lüko lo jü nokshing to nung ainou tsüde!”

³⁷Nungtiphe Pailatüh apa tü ngiom, “Naito ni nokpaoka yi?” Yisuüh thala, “Ngo nokpaoka ta ni ngioji. Ngo ngiotsüo thaiutha mitha kiuao chet, naiuso nung thaiutha ngo goumchiai shin. Ngiotsüo ün nou sauhai noin ngüso apemüh jüngio angji.”

³⁸Pailatüh sang, “Ngiotsüo nou ti?” Nai Pailat kengchiai shiküta khaiuniahoi nouso ta ngiom, “Ngü nung khaiunia da ti tsümeikü tsüepsan.

³⁹Lüko Aasan Sümai taoko ngü asam dongai khaiunia tsak sokao asam sai tsak noin: nungtiphe ngü asam dongai Yihudahai nokpao sokao asamüh mongchiojimo?”

⁴⁰Nungai ngüsoüh müjam wekü ngiom, “Nung khaiunia tsüde! lüko Baraba!” (Nung Baraba laple khaiunia noiküla.)