Read Khiamniungan Naga Yohan 19 Bible Online

Yohan 19 - Khiamniungan Naga bible

Yohan 19

¹Nungai Pailatüh Yisu nialükhunkü shiuh-in.

²Süpaihoi nou tsao nou thsa-ekü nokpao kandio tsak shan küta apa khaiu nai kei-i, naiuso anyakhao leng sheitho apa hao tho-in;

³ngüsoüh apa dongai shikü ngiom, “Yihudahai nokpao meikü lünoi!” Naiuso ngüsoüh apa da meshen pha nou la.

⁴Pailatüh müjam sungkü ngüso tü ngiom, “Ngü apa da ti tsümeikü tsüep ta asamüh ngeao thaiutha ngü apa asam dongai nialoukü sungji.”

⁵Nungtiphe Yisuüh thsao kandio keikü naiuso anyakhao leng sheitho tholoukü sung. Pailatüh ngüso tü ngiom, “Athaplu! Khaiunia nou nungai noin!”

⁶Tilai atengting mesonhoi naiuso nokshinghoi nou apa ep, ngüsoüh wekü ngiom, (Apa paiphu nai lülalut!) Pailatüh ngüso tü ngiom, “Asamüh asam chija apa nialoukü khukü paiphu nai lülalut: tititenai ngü apa da ti aphio tsüep.”

⁷Yihuda haiüh apa tü thala, “Sam ngiokhem nou apa ekühao noin, tititenai apaüh meshen chija Goa Thso ta ngiom.”

⁸Nungtiphe tilai Pailatüh nung ngio lula, apa tekkü hatkü noiküla;

⁹naiuso apaüh nokpao tsamai müjam napkü Yisu tü ngiom, “Ni ti ainou?” Lüko Yisuüh apa hao ti athalatsün tsükiu.

¹⁰Nungtiphe Pailatüh apa tü ngiom, “Ni ngü ko tsüchitejiso? Ni sokao ngü da oukong noin, naiuso ni paiphu nai lalutao ngü da oukong noin, ta ni tsüngeso?”

¹¹Yisuüh apa tü thala, “Halai nou ni hao tsükiu tünto, jü thako ni oukong ti tsü taiu-ela, lüko eh sauüh ni hao ngo thumkü kiu, apa angei songtso noin.”

¹²Nungüh Pailatüh apa sokao yam, lüko Yihuda haiüh wekü ngiom, “Ni nung khaiunia sok nai, ni Kaisar hai tsüde: sauhaiüh meshen chija nokpao iulaji, apaüh Kaisar thako chiteji!”

¹³Tilai Pailatüh nung ngio lula, apaüh Yisu nialoukü sung, naiuso lungpun nou lahtsün ta jontsün, (lüko Ibri ngio nou “Gabatha” ta thekü tsak ko mikhem kiutsün noikham nai apa noi.)

¹⁴Nung Aasantsün Sümai thaiutha akhemloutsünnyi noiküla; nai anyiwem chekü nime baji thatso noiküla. Nai apaüh Yihudahai tü ngiom, “Asam nokpao, athaplu!”

¹⁵Nungai ngüsoüh wen, “Apa lüluat! apa lüluat! apa paiphu nai lülalut!” Pailatüh ngüso tü ngiom, “Ngü asam nokpao paiphu nai lalute süne?” Atengting mesonhoi nou thala, “Kaisar chiai sam nokpao sau tsünoi!”

¹⁶Nungtiphi Paiphu nai lalutao thaiutha Pailatüh ngüso hao Yisu thumkü kiuwan. Nungtiphe ngüsoüh Yisu da pha nou pu.

¹⁷Nai ngüsoüh Yisu nialoukü khukü apaüh meshen Paiphu kankü Ibri ngio nou “Golgotha” khaiuo goh ta jontsün athang tsak ai khu:

¹⁸nungko ngüsoüh Apa paiphu nai lalut naiuso apako amao khaiunia nime, uai tsak, tsatai tsak, ta Yisu awem nai thekü lalut.

¹⁹Loüh Pailatüh angela ao thsamsat tsak sat, küta nung paiphu chiai leplut. Nai nungko nung satkü noiküla. “NAZARET HAI YISU, YIHUDA HAI NOKPAO.”

²⁰Nungtiphe Yihudahai piakü nou nung asat nou welu, tititenai Yisu paiphu nai laluttsün nok shimkü noiküla: naiuso nung Ibri, Grik naiuso Latin ngio nou satkü noiküla.

²¹Nungtiphe Yihudahai atengting mesonhoi nou Pailat tü ngiom, “Yihudahai Nokpao, ta lasat! lüko Ngo Yihudahai nokpao ta apaüh ngiom, nungti lüsat.”

²²Pailatüh thala, “Ngü ti satiu nung ngü satiu.”

²³Nungtiphe süpaihoi nou Yisu paiphu nai lalutküta apa nese püleao janekü ngüso pungkü haoson tsak tsak lou: lo nekhut nou achiotsünthang tsüpokü achi ainou athon saokü alatsün noiküla.

²⁴Nungtiphe ngüso tsaküh tsak tü ngiom, “Samüh nung lachipeko, lüko nung sau ün the-eko, nung thaiutha phung deluko.” “Ngüsoüh jü nese ngüso ongko janelou, naiuso jünekhut thaiutha ngüsoüh phung delu ta Asiongio nou ti ngiom, nung shinapao thaiutha nung sungh.” Nungti süpaihoi nou chhin.

²⁵Lüko Yisu paiphu shimkü apa nyiu naiuso apa nyiu ün nio, Klopa tsamko nou Mari, naiuso Mari Magdalin tsakü noiküla.

²⁶Tilai Yisuüh apa nyiu naiuso apaüh tsüojintsün sahoi shimkü tsakü ep, apaüh meshen nyiu tü ngiom, Nyiuhai, “athso athaplu.”

²⁷Nungai apaüh sahoi tü ngiom, “Anyiu athaplu! nung taoko sahoi nou apa meshen tsamai nialoukü khu.

²⁸Yisuüh loto chhi apem khemiu ta ngekü, Asiongio shinapao thaiutha, “Ngo leji” ta ngiom.

²⁹Nungko ehejek khiam nou meankü lak tsak noiküla: nungtiphe ngüsoüh ehejek khiam nou lüpoi tsak esop pai nai lolutkü apa son nai chilut kiu.

³⁰Nungti ehejek khiam nou shiukütü Yisuüh ngiom, “Nung khemlou-iu!” nai Apa khaiu ngamkü napkü ean.

³¹Nung sümai thaiutha akhemlutsünnyiphe, Yihuda Anonyi nai e mea nou paiphu nai tsütaiukü hao (tititenai nung Yihuda Anonyi ajekhaiu asong noiküla.) ngüso hok longekkü pem nou kankü khuao thaiutha Yihuda haiüh Pailat tü ngiokhem saolou.

³²Nungtiphe süpaihoi nou shikü ayating khaiunia nou naiuso amao sau apa ko paiphu nai lalut ngüso hok nou longek kiu:

³³lüko tilai ngüso Yisu dongai shi, ngüsoüh apa eankü ep, nungtiphe ngüsoüh apa hok tsülongek:

³⁴Nungti lüko süpaihoi ongko tsaküh lai nou apa tsoki nai chi, naiuso nungailu she naiuso khiam hongshin.

³⁵Sauüh ep, apaüh mitha kiu, naiuso apaüh mitha kiutsün atsüoting noin: naiuso asamüh lüko monglamao thaiutha, apaüh ti ngiom nung atsüoting naiuso apaüh nung atsüoting ngio chiteji ta ngen.

³⁶“Tititenai apa ou tsaktsüo tsülouthekiu,” ta Asiongio nou ngiotsün shinapao thaiutha nung chhin.

³⁷Naiuso loüh Asiongio ajantso ko ngiom, “Sau da ngüsoüh lai nou chi, ngüsoüh apa eppe.”

³⁸Nung phiai Yosep sau Arimathia noksong ainou noiküla, apaüh Pailat tü Yisu mea loao sang, (Yosep nung Yisu sahoi tsak noiküla, apa Yihudahoi nokpao nokshing lun hat nou asu ai sanglu.) Pailatüh loao shio-e ta ngioküta Yosep khukü Yisu mea lokloukü khu.

³⁹Nikodima sau ayanai Yisu dongai asu shiküla, apaüh lüko anganyam nyamtsün thangkoinek naiuso anganyam pai lao-etsün tsoi aupungo thatso kankü shin.

⁴⁰Nungtiphe ngüsoüh Yisu pem nou loukü Yihudahai khantsün saili, angannyamtsün jengtsaiu nouko nung ne ashethop nai tsan.

⁴¹Apa paiphu nai laluttsün athang tsakko aimong tsak noiküla; naiuso nung aimong nai loüh khaiunia laitsüo tsütaiutingkü etam ayan tsak noiküla.

⁴²Nung Yihudahai sümai thaiutha akhemlou ajekhaiuphe, naiuso nungko etam shimkü noiphe, ngüsoüh Yisu nungai taiukiu.