Read Khiamniungan Naga Yohan 2 Bible Online

Yohan 2 - Khiamniungan Naga bible

Yohan 2

¹Samnyi nouko Galil ai noitsün Kana nokko haiyam sümai tsak noiküla, naiuso Yisu nyiu nungai noiküla;

²naiuso haiyam sümai nai Yisu naiuso apa sahoi lüko jon.

³Tilai theng kheman, Yisu nyiuüh apa tü ngiom, “Ngüso theng khemaniu.”

⁴Yisuüh apa tü thalan, “Nyiuhai, ngo ti chhi-e nung thaiutha langio.” “Ngü nou atao loüh mosao.”

⁵Apa nyiuüh tsamki hoi tü ngiom, “tilüsong apaüh asam tü ngio-e, nung lüchhi.”

⁶Nungai Yihuda hai saisile nai atsaowanao thaiutha nungko lung nou shantsün meng luok loktaiukü noiküla.

⁷Yisuüh ngüso tü ngiom, “Khiam meng nouso meankü khiam aleithio.” Nungtiphe ngüsoüh nung meankü leithio.

⁸Yisuüh ngüso tü ngiom, “Lo akhaiusan, naiuso sümai akhemkhu ahei dongai kankü lükhu.” Naiuso ngüsoüh nung kankü khu.

⁹Tilai sümai akhemkhu ahei nou lokü khiam thengao iulatsün shiulu (nung tsamki sauhaiüh khiam khaiusan ngüsoühlu ngen) nung ti ainou tsünge.

¹⁰Apaüh haiyam sümai paou jonkü ngiom, “Khaiunia apem nou aya nai amei senji; naiuso khaiunia nou piakü shiukü phiailu tsümeikü nou senshiji: ni losaokü theng amei nou taiuwan!”

¹¹Apa athanga chhi nouso yalutsün nung Yisuüh Galil ai noitsün Kana nok ko chhin, naiuso apa ajinka achiai sung-in, nai apa sahoiüh apa da monglam.

¹²Nungphiai Yisu naiuso apa nyiu, naiuso apa nioso, naiuso apa sahoiso Kapernaum ai sao küta ngüso nungai ajekhaiu intso noi.

¹³Lo Yihuda hai Aasantsün Sümai shimkü noiküla, naiuso Yisu Yirusalem ai sung.

¹⁴Apaüh Amkham Tsamai jangtso, onnemok, mükham jantsünso, naiuso tangka helutsünso moknoikü ep.

¹⁵Apaüh ashiuao auo nou shan naiuso onnemok si jangtso hakü thainian apem Amkham Tsam ainou komshi-an; naiuso tangka helu-etsünso tangka hongpengankiu naiuso ngüso then chaijan pou lek-hongankiu.

¹⁶Apaüh mükham jantsünso tü ngiom, “nungso nung ainou kankü lükhuwan! Jüpo tsam chaile oule tsam la-iula-i!”

¹⁷“O Goa, atsam da ngo mongkiutsün nou jümongai in nyaili jekji” ta asiongio nai ngiotsün sahoi nousoüh yangsan.

¹⁸Nungtiphe Yihuda haiüh thalakü apa tü ngiom, “Nung chhi chhi-ao shiom ta hanao ni sam tü ti ii chhi han-e?”

¹⁹Yisuüh thalakü ngüso tü ngiom, “Nung Amkham Tsam aluthe-an naiuso samnyi nai ngü nung shanshi-e.”

²⁰Yihuda haiüh ngiom, “Nung Amkham Tsam pon aopülekü luok simkü loukü shan, Ni nung samnyi nai lahshi-e süne?”

²¹Lüko apaüh Amkham Tsam ta ngiotsün meshen pem thaiutha chite.

²²Nungtiphe tilai apa ee ainou ahkü shin, apaüh nung thaiutha chiten ta apa sahoisoüh yangsan naiuso ngüsoüh asiongio naiuso Yisuüh ngiotsün da monglam.

²³Nungai Aasan Sümai taoko apa Yirusalem ai noinai, apaüh athanga chhi chhitsün nouso epkü apa nianko piakü nou monglam.

²⁴Lüko Yisuüh monglamkü meshen chija ngüso hao tsükiu,

²⁵tititenai apaüh khaiunia apem ngekü noiküla, naiuso sauüh khaiunia nouso thaiutha apa hao mitha kiuao apa da tsüpo; tititenai khaiunia da ti noin apaüh ngen.