Read Khiamniungan Naga Yohan 20 Bible Online

Yohan 20 - Khiamniungan Naga bible

Yohan 20

¹Anonyap ah shiothsan shakta, Mari Magdalin etam nai shi, naiuso etam khankiap lung nou lekkankü ep.

²Nungtiphe apaüh kopkü khukü Simon Peter, naiuso amao sahoi sau Yisuüh tsüojin ngüso dongai shin, küta ngüso tü ngiom, “Ngüsoüh APAOU etam ainou kankü khuwaniu naiuso ngüsoüh apa tai wan samüh tsünge!”

³Nungtiphe Peter naiuso amao sahoi nou nok ainou sungküta ngüne nung etam dongai khu.

⁴Nai ngüne nemtso aikü kop: nai amao sahoi nou Peter shelakü aya etam shisao;

⁵küta kaukü napkü akheiai thapnai, apaüh ne ashethop nou taiukü ep: lüko apa akheiai tsünap.

⁶Nungko Simon Peter lüko apa phiai shikü, saitha etamkhan nai nap. Apaüh nungko ne ashethop nou taiukü ep,

⁷nung ne üh Yisu khaiu lemkü khijeiküla, nung meatsan ne ashethop nou mothikü laikü khukü noiküla.

⁸Nungai amao sahoi sübao etam nai aya shin, apa lüko nap naiuso apaüh epkü monglam.

⁹(Apa e ainou müjam ahkü shiao noin ta ngiotsün Asiongio ngüsoüh loüh tsüngela.)

¹⁰Nungko sahoi nou meshen tsamai laokü khuwan.

¹¹Mari etamkhan chinai shapkü tsakü noiküla. Apa shapshapkün taoko etamkhankhei nai kauthiokü thapnai

¹²apaüh aün hong nime, tsak Yisu pem taiutsün khaiu dongai, naiuso tsak hok dongai ne athaiu tenkü moknoikü ep.

¹³Nai ngüsoüh apa tü, “Nyiuhai, ni tiau shapji?” ta sang. Apaüh ngüne tü thalan, “Ngüsoüh jü APAOU kankü khuwaniu, naiuso ngüsoüh apa tiai wan ngü tsünge!”

¹⁴Nung ngioküta, apaüh kha nou phiai sheikü shinai Yisu tsakü ep, lüko apaüh nung Yisu ta tsünge.

¹⁵Yisuüh apa tü, “Nyiuhai, ni tiauta shapji?” ta sang. “Ni sau ta yamji?” Mariüh apa nung aimong jimtsün ta yangkü, apa tü ngiom, “Asong hai, ni apa nung ainou kankü khuwankü noinai, apa tiai wan, ngü hau achite, küta ngo khukü apa kankü shi-e.”

¹⁶Yisuüh apa tü ngiom, “Mari!” Mariüh apa dongai lapkü shikü Ibri, ngio nai apa tü, “Rabboni!” (alat nou, “Atsandetsün.”) ta jon.

¹⁷Yisuüh Mari tü ngiom, “Ngü da lahelou.” “Tiautenai ngo loüh Jüpo dongai mosungh. Lüko jü deisinioso dongai khuküta, ngo Jüpo sau noin naiuso ngüso po, Jü Goa naiuso ngüso Goa nung dongai laokü khuji ta lüchite.”

¹⁸Mari Magdalinüh shikü, Ngü APAOU epiu; naiuso Yisuüh apa tü ngiotsün nung ngüso tü ngiom.

¹⁹Nung Anonyi ahsham, phikü Yihudahai lun hat nou, sahoi nouso kou kiapkü aikü kamshikü noinai, Yisu shikü ngüso ongko awem nai tsakü ngüso tü ngiom, “Asam ko aalu lünoi.”

²⁰Apaüh nung ngioküta, ngüso hau apa phakha naiuso tsoki nou han. Sahoi nousoüh APAOU epnai, amongling nou meankü noiküla.

²¹Yisuüh ngüso tü loüh ngiom, “Asam ko aalu lünoi. Po nou titi ngo hong nungti ngo lüko asam hongji.”

²²Nai apaüh nung ngioküta ngüso da ii matthio kiukü ngiom, “Asamüh Asio Onthso nou alou.

²³Asamüh amaohai aphio nouso wankiu naito, nung hao nung wankiuwaniu; asamüh ngüso hau tsüwankiu naito, ngüso hao nung tsüwankiu.”

²⁴Lüko Yisu shinai, Toma, chekü nime ongko tsak, (sau tü thsoip ta jonji) apa ngüso ko tsünoiküla.

²⁵Nungtiphe amao sahoi nou apa tü ngiom, “Samüh APAOU epiu!” Lüko Tomaüh ngüso tü ngiom, “Ngü apa phakha nai sonla mou nou tsüep nai, naiuso sonla muo nouko jüphakha tsüchinthiokü naito, ngü mong tsülame.”

²⁶Petjeinyi yankütünai, loüh sahoi nouso tsammongai kamshikü noiküla, naiuso Toma ngüso ko noiküla. Kou nou kiapankü noikü Yisu shikü ngüso ongko awem nai tsakü ngiom, “Asam ko aalu lünoi.”

²⁷Nungai apaüh Toma tü ngiom, “Nung ko aphakha achinthio, naiuso jüphakha athaplu, naiuso aphakha loshikü tsoki nai achinthio: küta mong tsülamkü lanoi. Ni henyitsün lülaolou küta monglamkü lüthe!”

²⁸Tomaüh thalakü apa tü ngiom, “Jü APAOU, naiuso Jü Goa!”

²⁹Yisuüh apa tü ngiom, “Ni ngo epnou shioko monglamji süne? Sauhaiüh ngo tsüep lüko monglamji ngüso thaiumei!”

³⁰Nung thsam nai tsüsattaiuhakün amao ii athanga piakü Yisuüh sahoi khako chhin.

³¹Lüko Yisu to Khrista, Goa Thso, ta asamüh monglamao thaiutha naiuso monglamkü, apa nianko asamüh aa nou epao thaiutha ngio nung satji.