Read Khiamniungan Naga Yohan 3 Bible Online

Yohan 3 - Khiamniungan Naga bible

Yohan 3

¹Yihuda hai aniakei khaiunia tsak Nikodema ta niankü Farisihoi ainou noiküla.

²Apaüh asu Yisu dongai shikü ngiom, “Atsandetsün, ni Goa ainou shitsün atsandetsün tsak ta samüh ngen; tititenai Goa tsühakü ni chhitsün athanga chhi nouso sauüh chhiao tsüshio.”

³Yisuüh thalakü apa tü ngiom, “Atsüoting ngo ni tü ngioko; Müjam tsüchetshikünai khaiunia nou Goa nokshing epao tsüshio.”

⁴Nikodemaüh apa tü ngiom, “Khaiunia tsak sonanküta apa titi thekü chetshi-e?” “Apa nyiu thai ai müjam napküta chetshiao tsüshioe!”

⁵Yisuüh thala, “Atsüoting ngo ni tü ngioko,” “Khaiunia nou khiam naiuso Onthso nai tsüchetshikünai Goa nokshing nai napao tsüshio-e.

⁶Khaiunia tsak posinyiu tsangkü shesinyih nai chetji, lüko apa Onthso nouto Asio Onthso tsangkü chetji.

⁷Ni müjam chetshiao noin ta ngo ni tü ngionai langala.

⁸Asheih tiai shei-e ta aiuji nungai sheiji, naiuso ni nung sangngem nou luji, lüko nung ti ainou shiji naiuso tiai khuji ni tsünge: Onthso nai chettsün apem nungti noin.”

⁹Nikodemaüh thalakü apa tü ngiom, “Nung titi thekü shio-e?”

¹⁰Yisuüh thalakü apa tü ngiom, “Ni Israel hai atsandetsün asong tsak thekü nung tsüngeso?

¹¹Atsüoting ngo ni tü ngioko, Samüh ti ngen nung chiteji naiuso samüh ti ep nung thaiutha mitha kiuji; lüko asam sauühtso samüh mitha kiutsün luao tsüaiu.

¹²Ngo goumchi ngiolat chitenai asamüh mongtsülam, nai ngo tilai aün ngiolat chite-e nai asamüh titi monglame?

¹³Aün ainou saotsün Khaiunia Thso, tü simkü khaiunia sau aün nai tsüsung.”

¹⁴Mosaüh titi liutsa nai pao sotsom loksan nungti Khaiunia Thso loksankü hao noin.

¹⁵Nungtiphe Khaiunia Thso da sauhaiüh monglam-e apaüh athontsüyang aa eppe.

¹⁶Tititenai Goa nou goumchi hoikü tsüojin shiko, sauhaiüh apa da monglamji tsümowane lüko asaita aa epao thaiutha apaüh meshen Thso kiu.

¹⁷Tititenai khaiuniahoi nou Thso hao aphio kiuao thaiutha tsüde, lüko apa tsangkü khaiuniahoi kipsanao thaiutha Goa nou meshen Thso goumchi ai hong.

¹⁸Sauüh apa da monglamji apa hao aphio tsükiuji; sauüh apa da tsümonglamji apa hao aphio kiuwaniu, tititenai apaüh Goa Thso nou nianko tsümonglam.

¹⁹Aphio kiutsün ngio nungti, awon nou goumchi ai shin lüko khaiunia nou awon tsüde anyakhem tübao tsüojin; tititenai ngüso chhi tsümeikü noiküla.

²⁰Tititenai sauüh tsümeikü chhiji, apaüh awon chinyanji, naiuso apa chhi nai aphio epküle ta apa awon dongai tsüshiji.

²¹Lüko sauüh ngiotsüo chhi chhiji apa chhi Goa da chhin ta achiai sung-iao thaiutha apa awon dongai shiji.

²²Nungphiai Yisu naiuso apa sahoiso Yihuda goumchi ai shi, nungai apa ngüso ko noi, naiuso khiamai limkiu.

²³Yohanüh lüko Salim shimkü Enon nok ko limkiukü noiküla; tiautenai nungko khiam piakü noiküla; naiuso khaiunia nouso apa dongai khu, naiuso apaüh ngüso limkiu.

²⁴(Nung Yohan akhou tsamai mothiukün tao noiküla.)

²⁵Nungai alusioao thaiutha Yihuda hai tsak Yohan sahoi nouko ngematkü noiküla.

²⁶Nungtiphe ngüsoüh Yohan dongai shikü apa tü ngiom, “Atsandetsün, Yordan Haiu etsai niko sau noiküla, sau thaiutha ni mitha kium, athaplu, apaüh limkiuji, naiuso khaiunia chikü apa dongai khuji!”

²⁷Yohanüh thalan, “Goa nou tsükiukü naito, sauüh ti jengtsaiulünou taiuao tsüshio.

²⁸‘Ngo Khrista tsüde, lüko ngü apa khako hongtsün ta ngo ngiotsün mitha kiuao asamlu noin.’

²⁹Sau thaiutha menyiu nou noin apa haiyampaou; lüko haiyampaou hai nou sauüh apa ngio angji apaüh apa sang lulakü thatü monglingji. Nung khekkü ngo monglingtsün saiukü iula-iu.

³⁰Apa to tekkü songkü iula-e lüko ngo to henlüshi-anao noin.”

³¹Sau aün ainou shiji apa chikü tü asong; sau goumchi ainou noin apa goumchi ün nou naiuso apaüh goumchi thaiutha chiteji: sau aün ainou shiji chikü tü asong.

³²Apaüh ti ep naiuso lula, nung thaiutha apaüh mitha kiukü nungti lüko apaüh mitha kiutsün sauühtso tsülo.

³³Sauüh apaüh kiutsün mitha luji apaüh Goa ngiotsüo nou losongkiuji.

³⁴Goa nou hongtsün khaiunia tsaküh Goa ngio chiteji, tiautenai Goa nou apa Asio Onthso nou mian-iji.

³⁵Po nou Thso tsüojinji naiuso apa phanai apem thumkü kiuwaniu.

³⁶Sauüh Thso nou da monglamji apa asai aa nou taim; lüko sauüh Thso nou da tsü-ang apaüh aa nou tsüeppe, lüko Goa mongmattsün apa khako noi-e.