Read Khiamniungan Naga Yohan 4 Bible Online

Yohan 4 - Khiamniungan Naga bible

Yohan 4

¹Farisi haiüh Yohan konaito Yisuüh sahoi apia shioluwanji naiuso limkiuji ta lula.

²(Atsüoting naito Yisuüh to sau haotso tsülimkiu, lüko apa sahoisoühlu limkiu.)

³Nung luküta apaüh loüh Yihuda wankü Galil ai müjam khu.

⁵Nungko Yakobüh apa thso Yosep hao goh ehenthso kiutaiu, nou shimkü Samaria nai noitsün Saikar ta niankü nok tsakai apa shin.

⁶Yakob temkhao nungai noiküla. Nai Yisu yamai tsakei nou tankü nung temkhao dongko moknoi. Nung chekü nime baji thatso noiküla.

⁷Nungai Samaria nyiuhai tsak khiamkhaiu shin, Yisuüh apa tü ngiom, “Ngü hao khiam ashiuao akiu.”

⁸(Nung taoko Yisu sahoiso nokai eheshiu tuh-ao khukü noiküla.)

⁹Samaria nyiuhai nou apa tü thashin, “Ni Yihuda hai thekü ngo Samaria nyiuhai tü khiam ashiuao titi saoji?” (Yihuda haiüh Samaria haiüh kankeitsün thengkam naiuso chiu tsükankeiji.)

¹⁰Yisuüh thalan, “Nilu Goa nou ti kiuji naiuso ni tü khiam ashiuao sauüh saoji, nung ngetünto apa tü saonai apaüh ni hao aa kiutsün khiam kiu-ela.”

¹¹Nyiuhai nou apa tü ngiom, “APAOU,” “ni khiam khaiuloau tsükan naiuso temkhao nou aokü noin, naito ni aa kiutsün khiam nou ti ainou?

¹²Sam paosipo Yakob, sauüh sam hao temkhao nou kiu, nungko apa pem, thsoso, naiuso thainian nousoüh shiu, naito apako nai ni songtso süne?”

¹³Yisuüh thalakü apa tü ngiom, “Sauhaiüh nung khiam shiu-e müjam leshi-e;

¹⁴lüko sauhaiüh ngü kiutsün khiam shiu-e laitsüo tsüleshi-e. Ngü kiutsün sübao khiam noin nung apa mongpemai aa khiam iula-e naiuso athontsüyang aa kiu-e.”

¹⁵Nyiuhai nou apa tü ngiom, “Asonghai,” “ngo tsüleao naiuso nungai khiam khaiu tsüshishiao nung khiam nou ngü hao akiu!

¹⁶Yisuüh apa tü ngiom, “Khukü atsammongpo lüjon,” küta “nungai nialokü ashi.”

¹⁷Nyiuhai nou thalakü apa tü ngiom, “Jü tsammongpo tsünoi,” Yisuüh thashin, “Jü tsammongpo tsünoi ta ni thakü ngio-iu;

¹⁸tititenai atsammongpo pungo noiküla, naiuso lo niko sau noin apa atsammongpo tsüde nung ngio ni atsüo ngio-iu.”

¹⁹Nyiuhai nou apa tü ngiom, “Asonghai, ni Goa E-po tsak ta ngü ngeji,”

²⁰“Jü paosiposo Samaria haiüh nung king nai Goa tü amkham, lüko asam Yihuda haiüh sam Goa amkhamthang Yirusalem noin ta ngioji.”

²¹Yisuüh apa tü ngiom, “Nyiuhai, ngü da amonglam, asamüh nung king nai lüko, Yirusalem nai lüko Po nou da tsüamkhamao atao shiji.

²²Asamüh ti tsünge nung amkhamji, samüh ti nge-en nung amkhamji, tititenai Aasanao nou Yihuda hai ainou noin.

²³Tilai khaiunia nou Goa amkham-e Onthso nai atsüoting Goa lütsüotsüokü amkhamao noin, apa hao apaüh mongchiotsün amkham kiukü hao atao shiji, nung lo noin.

²⁴Goa to Onthso; naiuso sauhaiüh apa amkham-e Onthso nai naiuso atsüoting nai amkhamao noin.”

²⁵Nyiuhai nou apa tü ngiom, “Mesia (sau tü Khrista ta jonji) nung shiji ta ngo ngen; apa tilai shi-e nungai apaüh sam hao apem ngela-i-e.”

²⁶Yisuüh apa tü ngiom, “Niko sau chiteji nung Apa.”

²⁷Nungai apa sahoiso shinai Yisu nyiuhai nouko chitetsün epkü ngüso ngawan; lüko “Ni ti yamji, tsüdekünai, ni tiau nyiuhaiko chiteji?” ta sauüh tsüngio.

²⁸Nungtiphe nyiuhai nou apa khiam meng taiukü nokai khu, naiuso khaiuniahoi tü ngiom.

²⁹“Ngo tilüsong chhin nung chikü ngü hao chite-iu, nung khaiunia Messiah nou süne?”

³⁰Sahoi nouso nok ainou sungkü Yisu dongai shi.

³¹Nung jetko sahoi nou apa tü kojakü ngiom, “Atsandetsün, lüheshiu!”

³²Lüko Yisuüh thalan, “Ngo asamüh tsüngekün eheshiu taim.”

³³Nungtiphe sahoi nouso chitekü ngiom, “Apa hao ajantsoüh tso eheshiu kanjikan süne?”

³⁴Yisuüh ngüso tü ngiom, “Jü eheshiu,” nungto “Ngo hongtsün mongtsam-ikü chhiao naiuso apa chhi shinap-iao nou noin.

³⁵Loüh ‘alei püle noiküta, nungai be-eiuyam shi-e’ ta asam tsüchiteji süne? Lüko ngü asam tü ngioko, Ngukü thsüokü eiu nou dongai athaplu, lou be-eiuyamao meikü nyankü noin!

³⁶Sauüh yamheji apaüh amai nou epji, naiuso asai aa thaiutha khülam nou kamshiji, nungtiphe le shiutsün naiuso ayam hetsün ngüne nemtso aikü monglingeji.

³⁷‘Khaiunia tsaküh lethioji naiuso tsaküh yamheji’ ta ngiotsün ngio nung atsüo noin.

³⁸Tiai asamüh tsüchhi nung eiu-ai be-eiuyam yamheao ngü asam hong; amaohaiüh nungai chhi, naiuso ngüsoüh chhitsün ainou asam alesan epji!”

³⁹“Ngü tilüsong chhin nung chikü apaüh ngo tü ngio-iu, ta nyiuhai nou mitha kiukü ngiophe, nung nok ainou Samaria hai piakü nou apa da monglam.

⁴⁰Nungti tilai Samariahai apa dongai shin, ngüsoüh apa ngüsoko noihaao koja; naiuso apa nungai nenyi noi.

⁴¹Loüh piakü nou Yisu ngio tsangkü monglam; naiuso ngüsoüh nyiuhai tü ngiom,

⁴²“Lo samüh monglamtsün nung ni ngiotsün nou tsüde; tititenai samüh sam chija lu-iu, naiuso nung atsüoting goumchi Aasantsün ta samüh ngen.”

⁴³Ajekhaiu nenyi noiküta, Yisu nung ainou Galil ai khu.

⁴⁴“Tititenai E-pohoi meshen goumchiko nianlom tsünoi ta Yisuüh mitha kiu.”

⁴⁵Nungtiphe apa tilai Galil goumchi ai shin, Galil haiüh apa Yirusalem ai sümai taoko chhitsün apem epkü apa lu; tititenai ngüso lüko sümai nai khukü noiküla.

⁴⁶Nungtiphe Galil ai noitsün Kana nok tiko apaüh khiam nou theng iula-in, nungai apa müjam shin. Nung taoko asonghai thso tsak Kapernaum ai kiakü noiküla.

⁴⁷Tilai apaüh Yisu, Yihuda ainou Galil ai shikü noin ta lula, apa nungai khu, naiuso Yisu saoküta apa thso alomeikiu ta koja; tititenai methso nou eao noiküla.

⁴⁸Nungtiphe Yisuüh apa tü ngiom, “Asamüh athanga chhi nouso tsüepnai laitsüo mong tsülam-e.”

⁴⁹Asonghai nou apa tü ngiom, “Asonghai, jüthso mo-eankünai asao.”

⁵⁰Yisuüh apa tü ngiom, “Lükhu, athso aa noin!” Yisuüh ngiotsün ngio da nung khaiunia nou monglam, küta apa khu.

⁵¹Naiuso apa yamai saokü noitsün tao apa tsamki nousoüh “apa thso meianji ta ngiokü apa ko pheten!”

⁵²Nungtiphe apaüh ngüso tü apa tilai yakü meiao yachu ta sang. Nai ngüsoüh apa tü ngiom, “münyi tsak baji thatso nai kiashi nou apa le-an.”

⁵³Nungtiphe, “athso aa noin” ta Yisuüh apa tü nung taoko ngiom ta po nou ngen; naiuso apa pemüh naiuso apa tsammong apem nou monglam.

⁵⁴Loüh nung Yisu Yihuda ainou Galil ai shiküta athanga chhi müjam nou noiküla.