Read Khiamniungan Naga Yohan 5 Bible Online

Yohan 5 - Khiamniungan Naga bible

Yohan 5

¹Nungphiai, Yihuda hai sümai tsak nai Yisu Yirusalem ai khu.

²Yirusalem ai Onnemok Bekhan shimkü Ibri ngio nou Bethzatha ta jontsün kamnoi pungo noitsün khiamla tsak noin.

³Nung kamnoi nouso ko akiahoi niopek hoi, hokngek hoi, naiuso tsopai-ekiahoi piakü saikü noiküla. Ngüsoüh khiamla lemlem nou ta taiukü noi,

⁴tititenai lolokü aün hong nou khiamla nai saokü khiam nou lemlem-ikü, Akia hoi nouso tilai khiam lemleme ayating khiamla nai sau hamthio-e apa ti akia sunlünou alomei epepkü noiküla.

⁵Nungko pon aosam kü petjei kiatsün khaiunia tsak noiküla.

⁶Yisuüh apa nungai saikü noitsün epkü, lotü apa nungti laiukü noitsün ngekü, apa tü sangkü ngiom, “Ni meilaao aiujimo?”

⁷Akia khaiunia nou apa tü thala; “Asonghai, tilai khiamla lemleme nungai ngo nialüthioao khaiunia sau tsünoika; tilai ngo nappao koweji amaohai chong jükhako nappanji.”

⁸Yisuüh apa tü ngiom, “Atsa, athenshim lülailo, küta lükomlükhun.”

⁹Nungailu khaiunia nou meila; küta apa thenshim lailo küta komlükhunao tsalo. Nungnyi Yihudahai Anounyi noiküla.

¹⁰Nungtiphe Yihuda hai petchehoi nousoüh alomeitsün khaiunia tü ngiom, “Lonyi sam Anounyi, naiuso ni athenshim kanao sam Ngiokhem nouko ayam tsünoi.”

¹¹Lüko apaüh ngüso tü thalan, “Ngü lomeikiutsün khaiunia nou ngo tü jü thenshim lailoküta lütsakei ta ngiom.”

¹²Ngüsoüh apa tü sang, “Athenshim lülailo küta lütsakei ta ni tü ngiotsün khaiunia nou sau?”

¹³Lüko alumei eptsün khaiunia nou nung Yisu sau ta tsünge; tititenai nungai khaiunia piakü noiphe, Yisu soikü khuwankü noiküla.

¹⁴Phikü Yisuüh apa Amkham Tsamai epkü apa tü ngiom, “Anglu, ni lomei-iu; tekkü tsümeikü nou ni ta tsüshiao, lotü ni angei nou lakankeishi.”

¹⁵Nungai alumei eptsün khaiunia nou khukü, apa lumeikiutsün nung Yisu noiküla ta Yihuda petchehoi nouso tü ngiom.

¹⁶Nungtiphe Yisuüh nung alumei nou Yihuda Anounyi chhi nou shioko ngüsoüh Yisu jeiatkiuao tsalo.

¹⁷Yisuüh ngüso tü thalan, “Jüpoüh asaita chhi nou chhiji nungti ngo lüko chhiao noin.”

¹⁸Nung ngio lukü Yihuda haiüh apa luattao tekkü yam, tititenai apaüh Yihuda Anounyi lothetsünlu tsüde, lüko apaüh meshen chija Goa ko wekü iulakü naiuso Goa tü meshen po ta jon.

¹⁹Nungtiphe Yisuüh thalakü ngüso tü ngiom, “Atsüoting ngü asam tü ngioko, Thso nou meshen chija ti chhiao tsüshio; Po nou tilüsong chhikü epji Thso nou lüko nungti chhiji.

²⁰Tititenai Po nou Thso nou da tsüojinji, naiuso apaüh meshenüh chhitsün apem apa hao hanji; nung tü songkü Po nou apa hao han-e, naiuso asam ngala-e.

²¹Tititenai Po nou titi ee nou ahshi-ikü ngüso aa iula-iji, nungtilu Thso nou lüko apaüh mongchiotsünso aa iula-iji.

²²Tititenai Po nou khaiunia sau hao mikhem tsükiuji, lüko apaüh Thso nou hao mikhemtsün apem kiuwaniu;

²³nungtiphe ngüsoüh Po nou lon hattsünli Thso nou lon lüko hatao noin. Sauüh Thso nou lon tsühatji apa hongtsün Po nou lon lüko tsühatji.

²⁴“Atsüoting ngü asam tü ngioji; sauüh jüngio angji, naiuso ngo hongtsün da monglamji apaüh asai aa nou taim, naiuso mikhem nai tsüshi-e, lüko ee ainou aa nai khu-iu.

²⁵“Atsüoting ngü asam tü ngioji; Atao shiji naiuso nung lo noin-tilai ee nousoüh Goa Thso, sang lula-e, ngüso aa noi-e.

²⁶Po nou meshen da titi aa nou noin, nungti apaüh Thso hao lüko meshen chija aa noiao kiu,

²⁷naiuso Po nou apa hao mikhemao oukong nou kiu, tiautenai apa Khaiunia Thso noin.

²⁸Nungthako langala, atao shiji tilai etam nai noinso apemüh apa sang lula-e,

²⁹naiuso etam ainou sunge; sauhaiüh amei chhin aa nai ahkü shi-e, naiuso sauhaiüh tümeikü chhin, ngüso ahkü shi-e lüko amowan nai taiu-e.

³⁰“Ngü jü chija oukong nou ti chhiao tsüshio; ngü lutsünli mikhem kiuji; naiuso ngü kiutsün mikhem atsüoting noin, tiautenai ngü mongchiotsün tsüde lüko ngo hongtsün mongtsamiao yamji.

³¹“Ngü meshen thaiutha mitha kiunai, ngü kiutsün mitha atsüo tsüde. Amaohai tsaküh jü thaiutha mitha kiuji.

³²Naiuso apaüh mitha kiutsün atsüoting ta ngü ngen.

³³Asamüh asam hongthonso Yohan dongai hong, naiuso apaüh ngiotsüo thaiutha mitha kiu.

³⁴Lüko ngo khaiunia ainou mitha tsüyamji; nungti lüko asam aasanao thaiutha ngü ngio nung ngioji.

³⁵Yohan nung nyaikü noitsün tson nouli awonkü noiküla: naiuso asam apa awon nai monglingkü mongchiokü noiküla.

³⁶Lüko ngü mitha jü chija kiulutsün nung Yohanüh mitha kiutsün tü songkü noin; ngo ti chhiji nung Po nou chhiao kiutaiutsün, nungüh jü thaiutha mitha kiuji naiuso ngo Po nou hong ta hanji.

³⁷Naiuso nung chhi nouso ngü chhiji, nungüh ngo hongtsün Po nou jü thaiutha mitha kiuji. Asamüh laitsüo apa sang tsülu, tsüdekünai apa kha tsüepte.

³⁸Apa ngio asam da napkü tsünoiphe; sau apa hong, apa da asamüh tsümonglamji.

³⁹Asamüh Asiongio yamji, tititenai nungai asaita aa nou eppe ta asamüh yangji; naiuso nung Asiongio nou jü thaiutha mitha kiuji.

⁴⁰Lüko asai aa epao thaiutha jüdongai shiao asamüh tsümongchio.

⁴¹“Ngü khaiunia ainou nianlom tsüyamji.

⁴²Lüko ngü asam ti khaiunia nung ngen, naiuso asam mongpemai Goa atsüojin tsünoi ta ngü ngen.

⁴³Ngo Jüpo nianko shin, naiuso asamüh ngo tsülu; amaohai tsak meshen nianko shinai, asamüh apa lu-e.

⁴⁴Asamüh tsaküh tsak ainou nianlom epao aiuji, lüko nianlom atsüoting tsak Goa ainou asamüh tsüyam, naito, titithekü asamüh ngü da monglame?

⁴⁵Po nou dongko ngü asam tsüphiokiu-e ta layang; asam phiokiuao nou nung Mosa, sau da asamüh asam amonglam taim.

⁴⁶Asamüh Mosa da monglam tünto ngü da lüko monglamela; tititenai apaüh jü thaiutha sat.

⁴⁷Lüko apaüh sat nou da asamüh mongtsülam naito jüngio da asamüh titi monglame?”