Read Khiamniungan Naga Yohan 6 Bible Online

Yohan 6 - Khiamniungan Naga bible

Yohan 6

¹Nung phiai, Yisuüh Galil sheasong (Tiberia ta lüko jonji) etsai khu.

²Naiuso hoi asong apa phiai hoilut, tititenai apa athanga chhi tsangkü akia nouso lomeitsün ngüsoüh ep.

³Nungai Yisu kheng nai napkü apa meshen sahoi nousoko moknoi.

⁴Nungai Yihuda hai Aasantsün Sümai tao shimkü noiküla.

⁵Yisuüh lemkü lunai apaüh hoi asong apa dongai shitsün epkü Philip tü sang, “Nungso saiukü heshiuao thaiutha samüh themtsai tai tuh-e?”

⁶(Apa liluao thaiutha Yisuüh nung ngiom, tititenai apaüh ti chhiao noin nung ngeankü noiküla.)

⁷Philipüh apa tü thala, “Khaiunia pungkü nou thsaothsaokü he lüko tangka apai tsom nime mai themtsai nou ngüso tsüsaiu-e.”

⁸Apa sahoi ongko tsak Simon Peter nio Andriaüh apa tü ngiom,

⁹“Nungko methso tsak phamongko themtsai pungo naiuso ngou nime taim; lüko khaiunia nungtitso thaiutha titi saiu-e?”

¹⁰Yisuüh ngiom, “Khaiunia nouso mokkü anoi-i,” (nungko khengliu piakü noiküla,) nungtiphe khaiunia nouso mokkü noi, ngüso haove heng pungo thatso noiküla.

¹¹Yisuüh themtsai nou lukü, Goa hao nianlom kiu, naiuso mokkü noitsün khaiuniahoi hao sunkiu. Apaüh ngou lüko lokü nungtilu chhin, naiuso ngüso apemüh aiutsünli mongtsamkü heshiu.

¹²Tilai ngüso toklu, apaüh sahoi nouso tü ngiom, “Ti tsükhemsuwankü apoi anelang nou lükamshi.”

¹³Nungtiphe ngüsoüh nung kamshi naiuso barli tso themtsai pungo ainou khaiunia hoi nou heküta apoi nou kim chekü nime mean.

¹⁴Nungtiphe apaüh athanga chhitsün epkü khaiuniahoi nou ngiom, “Atsüoting goumchi ai ashiao noitsün E-po nou nung noin!”

¹⁵Nungtiphe ngüsoüh apa thaloukü nokpao the-iao yangtsün Yisuüh ngekü, apa pemsa müjam king nai sungan.

¹⁶Tilai ahsham shin, apa sahoiso sheasong ai sao;

¹⁷kü ngüso kheng tsak ai nap, naiuso sheasong thsatkü Kapernaum ai khu. Ah-nya shinai Yisu loüh ngüso dongai moshikü noiküla.

¹⁸Naiuso asheih athsüoting sheitsün tsangkü sheasong nai khiampek nou songjikan.

¹⁹Nungtiphe ngüso mail süme tsüdekünai püle thatso kheng nai keiküta, Yisu khiam chiai keikü kheng shimkü shitsün ngüsoüh epnai ngüso hatkü noiküla.

²⁰Lüko Yisuüh ngüso tü ngiom, “Lahattat, nung Ngo kha!”

²¹Nai sahoi nousoüh Yisu kheng mongai monglingkü nialu, naiuso kheng nou ngüso khuao noitsün athang nai shak ta sao-iu.

²²Nungthan nyi nai khaiuniahoi sheasong etsai noi nounsoüh nungai kheng tsak nou lu noiküla ta ngekü, naiuso kheng nai Yisu apa sahoiko tsükhuha, lüko apa sahoi pemsalu khun ta ngen.

²³Lotü tiai APAOU nianlom kiuküta ngüsoüh themtsai nou he, nung shimkü Tiberia ainou kheng nouso shin.

²⁴Nungtiphe hoi nou Yisu naiuso apa sahoiso nungai tsünoi ta ngekü, ngüso kheng nai nap, naiuso Yisu yamkü Kapernaum ai shin.

²⁵Tilai ngüsoüh Yisu sheasong etsai ep, ngüsoüh apa tü sang, “Atsandetsün, ni nungai tilai shin?”

²⁶Yisuüh ngüso tü thalakü ngiom, “Atsüoting ngü asam tü ngio-e; Asamüh athanga chhi epnou shioko tsüde, lüko themtsai heküta toklu nou shioko ngo yamji.

²⁷Lotheanao noitsün eheshiu thaiutha layang, lüko ti eheshiu asai aa thaiutha noin, nung eheshiu thaiutha lüyang; nung eheshiu Khaiunia Thso tsangkü asam hao kiu-e; tititenai Po nou Goaüh apa da ii nou thanglut kiu-iu.”

²⁸Nungtiphe ngüsoüh apa tü sangkü ngiom, “Goa nou mongchiotsün chhi chhiao thaiutha samüh ti shan-e?”

²⁹Yisuüh thalakü ngüso tü ngiom, “Goa nou mongchiotsün chhi nung apaüh hongtsün da monglamao noin.”

³⁰Ngüsoüh apa tü thashikü ngiom, “Samüh monglamao thaiutha ni ti athanga chhi chhikü han-e?

³¹Sam paosiposoüh liutsa nai manna nou he; asiongio nai satkü nointsünli, ‘Apaüh ngüso hao aün ainou eheshiu kiu.’”

³²Nungtiphe Yisuüh ngüso tü ngiom, “Atsüoting ngo asam tü ngio-e, asam hao aün ainou eheshiu kiutsün nung Mosa tsüde, nung, Jüpoüh asam hao aün ainou eheshiu atsüoting nou kiuji.

³³Tititenai Goa nou kiutsün eheshiu nung sau aün ainou saom naiuso goumchi hau aa kiuji, nung apa noin.”

³⁴Ngüsoüh apa tü jon, “Asonghai” “nung eheshiu nou sam hao asaita akiu.”

³⁵Yisuüh ngüso tü ngiom, “Aa eheshiu nou Ngo” “sau jü dongai shi-e apa tsünaiu-e; naiuso sauüh ngü da monglame apa tilaitso tsüle-e.

³⁶Asamüh ngo eplüko ngü da tsümonglame ta ngo asam tü ngio-iu.

³⁷Sauhai Po nou ngü hao kiuji ngüso jü dongai shi-e; naiuso sau jü dongai shi-e ngü apa tilaitso tsüwan-e.

³⁸Tititenai ngo ngü mongchiotsün chhiao thaiutha tsüde lüko ngo hongtsün nou mongchiotsün chhiao thaiutha aün ainou saom.

³⁹Naiuso ngo hongtsün nou mongchiotsün nung noin, nungti apaüh ngü hao kiu nouso apem tsümowan-ikü lotü athon ajekhaiu nai apem ahkü shi-iao noin.

⁴⁰Tititenai Jüpoüh mongchiotsün nung sauhaiüh Thso nou ep, naiuso apa da monglame asai aa nou epe; naiuso athon ajekhaiu nai ngü ngüso ahkü shi-i-e.”

⁴¹“Ngo aün ainou saotsün eheshiu,” ta apaüh ngionai Yihudahai apa tü namnamkü chite.

⁴²Ngüsoüh ngiom, “Nung Yosep thso Yisu tsüdeso? Apa po naiuso nyiu samüh tsüngeso? Naito, Ngo aün ainou saotsün ta apaüh titi ngioji?”

⁴³Yisuüh thalakü ngüso tü ngiom, “asam ongko lanamnam.”

⁴⁴Ngo hongtsün Po nou tsütenshikü nai sauüh jüdongai shiao tsüshio: naiuso athon ajekhaiu nai ngü apa ahkü shi-i-e.

⁴⁵E-po thsam nai nungti satkü noin, ‘naiuso ngüso chikü tü Goa nou chime.’ Sau haiüh Po ainou lula-iu naiuso ngelu-iu, apa jüdongai shiji.

⁴⁶Khaiunia ajantsoüh Po nou epiu ta tsüde, nungti sau Goa ainou noin apaüh lu Po nou ep.

⁴⁷“Atsüoting ngü asam tü ngio-e, Sauüh monglamji apa asai aa noin.

⁴⁸Ngo aa eheshiu.

⁴⁹Asam paosiposoüh liutsa nai mana hekü ngüso ean.

⁵⁰Khaiunia nou heküta tsü-eao thaiutha nung aün ainou saotsün eheshiu.

⁵¹Ngo aün ainou saotsün aa eheshiu: ajantsoüh nung eheshiu he naito, apa asai aa noi-e: loüh goumchi aa thaiutha ngü sübao eheshiu kiu-e, nung jünyih.”

⁵²Nungtiphe Yihuda haiüh ngüso si ngüso lihekü ngiom, “Nung khaiunia nou titi eheao thaiutha sam hao meshen nyih kiu-e?”

⁵³Nungtiphe Yisuüh ngüso tü ngiom, “Atsüoting ngü asam tü ngio-e: Asamüh Khaiunia Thso nyih tsühekü nai naiuso apa she tsüshiukü nai asam meshen chija da aa tsünoi.

⁵⁴Sauüh jünyih heji naiuso jüshe shiuji apa asai aa taim; naiuso athon ajekhaiu nai ngü apa ahkü shi-i-e.

⁵⁵Tititenai jünyih eheshiu atsüoting nou naiuso jüshe ashiuao atsüoting nou.

⁵⁶Sauüh jünyih heji naiuso jüshe shiuji apa ngü da noiji, naiuso ngo apa da noiji.

⁵⁷Aa noitsün Po nou titi ngo hong, naiuso Po nou ngo aa noiji; nungti sauüh ngo he-e, apa lüko aa noi-e.

⁵⁸Aün ainou saotsün eheshiu nou nung paosipo haiüh heküta eantsün li tsüde: sauüh nung eheshiu he-e, apa asai aa noi-e.”

⁵⁹Kapernaum nai tsandekü noi nai apaüh nung Yihuda kamthang nai chiten.

⁶⁰Nungtiphe nung lulanai apa sahoi ongko piakü nou ngiom, “Ngio nung to achek; sauüh nung ngela-e?”

⁶¹Lüko nung thaiutha sahoi nou tsonjekji ta Yisuüh meshen mongai ngekü ngüso tü ngiom, “Nungüh asam tü cheki-ji süne?

⁶²Athatlu nai, Khaiunia Thso apa aya tiai noiküla nung ai laokü khukü asamüh ep nai titi the-e?

⁶³Aa kiutsün ti nung to Goa Onthso; khaiunia oukong to laitsüo atheao tsünoi, nung ngü ngiotsün ngio nou asam hao Goa aa Onthso kanjikan kiuji.

⁶⁴Tititenai sau haiüh tsümonglame, (naiuso apa sapthio-e nung Yisuüh aya ainou ngen.)

⁶⁵Apaüh ngiom, “Nung thaiutha Po nou tsükiu nai, sauüh jüdongai shiao tsüshio ta ngü asam tü ngio-iu.”

⁶⁶Nung ainou apa sahoi piakü laokü khu, naiuso lotü apa ko tsütsakei.

⁶⁷Nungtiphe Yisuüh chekü nime nouso tü ngiom, “Asam lüko khu-e ta aiuji süne?”

⁶⁸Simon Peterüh apa tü ngiom, “APAOU, sam sau dongai khu-e? Ni da asai aa ngio noin.

⁶⁹Ni Asio Goa nou ta samüh yangji naiuso ngen.”

⁷⁰Yisuüh ngüso tü thala, “Ngü asam chekü nime nou tsüsingsan süne? Lüko asam ongko tsak to biya thso noin!”

⁷¹Nung ngio Simon Iskariot thso Yihuda thaiutha apaüh ngiom, tititenai chekü nime ongko sauüh apa sapthio-e nung apa noiküla.