Read Khiamniungan Naga Yohan 7 Bible Online

Yohan 7 - Khiamniungan Naga bible

Yohan 7

¹Nungphiai, Yisu Galil, goumchi ko tsakei; tititenai apaüh Yihuda goumchi nai tsakeiao tsüaiu, tiautenai Yihuda haiüh apa luatao yam.

²Lo Yihuda hai kamnoi sümai shimkü noiküla.

³Nungtiphe apa niosoüh apa tü ngiom, “Asahoi nou lüko ni chhitsün epkü hao, nung ainou soikü Yihuda goumchi ai lükhu.

⁴Tititenai sauüh meshen chija achiai sungiao aiuji, apaüh titsüo akauai tsüchhi. Ni nungso chhikü naito, goumchi khako achija achiai sungi-e!”

⁵(Tititenai apa niosoüh apa da mong tsülam.)

⁶Nungtiphe Yisuüh ngüso tü ngiom, “Ngü nou atao loüh mosao, lüko asam atao asai khemluko noin.

⁷Goumchi nou asam lun chinyanao tsüshio; loto nungüh ngü lun chinyanji tititenai nung chhi nou tsümei ta ngü nung thaiutha mitha kiuji.

⁸Sümai nai asam lüsung: ngü to loüh sümai nai tsüsung-e; tititenai ngü nou atao loüh mosao.”

⁹Nungso ngüsotü ngioküta apa Galil goumchi nailu noi.

¹⁰Loto apa deisinio hoi sümai nai sungküta nai, khakhakü tsüdekü akauai apa lüko sümai nai sungh.

¹¹Nungtiphe Yihuda haiüh sümai nai apa yamkü ngiom, “Apa tai noin?”

¹²Naiuso hoi ongko apa thaiutha engeng nou thatü noiküla: ajantsoüh ngiom, “Apa khaiunia amei noin” amao haiüh ngiom, “Tsüde” “lüko apaüh hoi atsüotsüdekü nai niaji.”

¹³Nungti lüko Yihudahai hat nou shioko sauüh apa thaiutha khakhakü tsüchite.

¹⁴Lüko tilai sümai ahwemshisao Yisuüh amkham tsamai sungkü tsande.

¹⁵Yihudahai nokpao nokshing nouso thatü ngakü ngiom, “nung khaiunia nou laitsüo angelo tsükhukün nungti piakü titi ngen?”

¹⁶Nungtiphe Yisuüh ngüso tü thalakü ngiom, “Ngü tsandetsün jüngio tsüde, lüko ngo hongtsün ngio noin.

¹⁷Ajantsoüh apaüh mongchiotsün chhiao mongchio nai ngo tsandetsün nung Goa ngio süne, ngü meshen chija ainou chiteji, nung apaüh nge-e.

¹⁸Sauüh meshen chija ainou chiteji apaüh meshen nianlom yamji: lüko sauüh ngo hongtsün nianlom yamji apa atsüoting, naiuso atsüo tsüdekü nou apa da tsünoi.

¹⁹Mosaüh asam hao ngiokhem nou kiu, atsüo süne tsüde? Lüko asam sauühtso nung Ngiokhem tsüang. Asamüh ngo luatao tiauta koweji?”

²⁰Hoi nou thala, “Ni da biya noin!” “sauüh ni luatao yamji?”

²¹Yisuüh ngüso tü thalakü ngiom, “Ngü chhi nou tsak chhi, naiuso asam apemüh ngaji.

²²Nung thaiutha Mosaüh asam hao atippanao kiu (nung Mosa ainou ta tsüde lüko paosipo ainou); naiuso Yihuda Anounyi nai asamüh khaiunia tippan kiuji.

²³Mosa ngiokhem tsüluthekü hao thaiutha naito Yihuda anunyi nai ngü khaiunia tsak thatü meikü lumeikiu nai asamüh ngü da mongmatji süne?

²⁴Achiai aloao nou asamüh mi nou lakhem kiu; lüko ngiotsüo nou lükhem kiu.”

²⁵Nungtiphe Yirusalem nai noinso ajansoüh ngiom, “Ngüsoüh luatao yamtsün nung tsüdeso?

²⁶Athaplu! apaüh khakhakü chiteji, naiuso ngüsoüh apa tü ti tsüngio. Nung Khrista ta nokpao nokshing haiüh atsüo ngen so?

²⁷Nungti lüko nung khaiunia nou ti ainou ko sauüh tsünge-e.”

²⁸Nungtiphe Yisuüh amkham tsamai tsande nai wekü ngiom, “Asamüh ngo ngen, naiuso ngo ti ainou nung lüko ngen; ngo jü chija tsüshi, lüko sauüh ngo hong apa atsüoting: asamüh apa tsünge.

²⁹Ngü apa ngen; tititenai ngo apa ainou noin, naiuso apaüh ngo hong.”

³⁰Nungtiphe ngüsoüh apa thaluao yam: lüko sauüh apa da pha tsüpu, tititenai apa atao loüh mosao.

³¹Lüko hoi ongko piakü nou apa da monglam; naiuso ngüsoüh ngiom, “Tilai Khrista shi-e nung khaiunia nou chhitsün ii chhi nou tü tekkü chhi-e süne?”

³²Hoi nou apa thaiutha nungti tsonjektsün Farisi hoi nou lula; naiuso atengting mesonhoi si Farisi hoi nou apa thaluao nouso hong.

³³Nungtiphe Yisuüh ngiom, “Loto ngo asam ko intso noiküta ngo hongtsün dongai khu-e.

³⁴Asamüh yame, naiuso ngo tsüeppe: naiuso ngo tiai noin, nungai asam shiao tsüshio.”

³⁵Nungtiphe Yihuda haiüh ngüso si ngüso chitekü ngiom, “Samüh apa tsüepkü hao apa tai khu-e? Apaüh Yihuda hai pengkü Grik hai ko noitsün dongai khukü Grik hai tü tsande-e süne?

³⁶Asamüh yame, naiuso ngo tsüeppe: naiuso ngo tai noin, nungai asam shiao tsüshio-e ta apaüh ngiotsün ngio nung ti?”

³⁷Lo sümaitingnyi Yisuüh tsakü wekü ngiom, “Ajantso le nai, apa jüdongai ashi-i, naiuso lüshiu-i.

³⁸‘Sauüh ngü da monglame Asiongio nou ngiotsün li apa akhei ainou aa khiam tsange.”

³⁹Lüko sauhaiüh apa da monglam, ngüsoüh ti Onthso epao noiküla, nung thaiutha apaüh nung chite: tititenai Onthso nou loüh mokiu; tititenai Yisu ajin mokha.

⁴⁰Nungtiphe nung ngio lu nai, hoi ongko ajansoüh ngiom, “Atsüoting nung E-po!”

⁴¹Amao haiüh ngiom, “Nung Khrista!” Lüko ajantsoüh ngiom, “Khrista Galil ainou sunge süne?

⁴²David kau ainou naiuso David nokpao noitsün Betlehem ainou Khrista shi-e ta Asiongio nou tsüngio so?”

⁴³Nungti apa thaiutha ahoi ongko ajanpek sungh.

⁴⁴Ngüso ongko ajantsoüh apa thaluao aiu; lüko sauüh apa da pha tsüpu.

⁴⁵Nungtiphe hongthonhoi nou atengting mesonhoi naiuso Farisihoi dongai shin; naiuso ngüsoüh ngüso tü ngiom, “Asamüh tiao apa nialukü tsüshi?”

⁴⁶Hongthonhoi nou thala, “Nungti khaiunia nou laitsüo tsüchite!”

⁴⁷Nungtiphe Farisihoi nou ngüso tü thala, “Asam lüko atsüo tsüdekünai nia-iji süne?”

⁴⁸“Nokpao nokshinghoi tsüdekünai Farisihoi ongko ajantsoüh apa da monglam süne?

⁴⁹Nung hoi asong nousoüh Mosa Ngiokhem tsünge, nungtiphe ngüso Goa athesan khemai noin!”

⁵⁰Ngüso ongko tsak nou to Nikodema (sau kümi apa dongai shin) apaüh ngiom,

⁵¹“Sam Ngiokhem tsangkü samüh khaiunia tsaktso apaüh ti chhin nung tsüyamkü naiuso ngio tsüanglukü to awanao tsüshio.”

⁵²Ngüsoüh thalakü apa tü ngiom, “Mei,” “Ni lüko Galil ainou süne? Asiongio nouso lüyam naiuso asamüh nge-e tititenai Galil ainou E-po laitsüo mosungh.”