Read Khiamniungan Naga Yohan 8 Bible Online

Yohan 8 - Khiamniungan Naga bible

Yohan 8

¹(Nai ngüso khaiunia pungkü meshen tsamai khu, lüko Yisu to Olip king ai sungh.)

²Ahom beta apa amkham tsamai laokü shin, naiuso khaiunia apem apa dongai shi; naiuso apa moknoi, naiuso ngüso tü tsande.

³Ngiokhem tsandetsünso si Farisihoi nou nyiuhai tsak tsütsamtsütsüokü nai thalutsün apa dongai nialoukü shin; naiuso apa tilai ngüso awem nai taiukiu,

⁴ngüsoüh apa tü ngiom, “Atsandetsün,” “nung nyiuhai tsütsamtsütsüo chhi noikü thalou.

⁵Mosaüh Ngiokhem nai nungtin lung nou thupatao noin ta sam tü ngiom: naito ni lüko apa thaiutha ti ngio-e?”

⁶Apa phio-iao apa lilukü ngüsoüh nung ngiom, Lüko Yisuüh kaokü napküta meshen phakhathso nou goh ai sat.

⁷Lüko tilai ngüsoüh apa tü tsülaokü sang, apaüh ngüso tü ngiom, “Asam ongko sau da angei tsünoi, apaüh chong lung nou nung nyiuhai tü lüyak.”

⁸Nungai Yisu müjam kaokü napshikü apa phakha nou goh ai sat.

⁹Ngüsoüh tilai nung lula, petcheting ainou yakü aphiteng saokü tsakjam, tsakjam ta khuwan. Nai Yisu apa pemsa, naiuso nyiuhai nou apa tsanoitsün thangkolu tsakü noi.

¹⁰Yisuüh tsakü chukü nyiuhai tü ngiom, “Nyiuhai, ngüso tiai noin? Ni phio-iau ngüso nungko tsaktso poikü tsünnoi süne?”

¹¹Nyiuhai nou ngiom, “Ah APAOU,” sauüh phio-ikü tsüngio. Nungai Yisuüh ngiom, “Ngü lüko ni hau aphio tsükiuji. Lükhu, küta lo yakü angei lakankei.”

¹²Yisuüh loüh ngüso tü chitekü ngiom, “Ngo goumchi awon; sau jüphiai hoilute apa anyakhem nai tsütsakei-e, loto aa awon nou eppe.”

¹³Nungai Farisihoi nou apa tü ngiom, “Ni meshen thaiutha mitha kiuji; ni mitha kiutsün atsüo tsüde.”

¹⁴Yisuüh thalakü ngüso tü ngiom, “Ngü meshen thaiutha mitha kiu lüko ngü mitha kiutsün atsüo noin; tititenai ngo ti ainou shin, naiuso tai khu-e nung ngü ngen; loto ngo ti ainou shin naiuso tai khu-e nung asamüh tsünge.

¹⁵Asamüh nyih yangkü mikhem kiuji; ngü to sau mi tsükhemkiu.

¹⁶Lüko ngü mikhem kiu-e ta nai ngü mikhem kiutsün atsüo-e; tititenai ngo jüpemsa tsüde, loüh ngo lüko noin naiuso ngo hongtsün Jüpo lüko noin.

¹⁷Ah, naiuso khaiunia nime nou mitha kiutsün atsüo noin ta asam Ngiokhem nai satkü noin.

¹⁸Meshen thaiutha mitha kiutsün ngo noin, naiuso ngo hongtsün Po nou jü thaiutha mitha kiuji.”

¹⁹“Apo tiai noin?” ta ngüsoüh apa tü sangh. Yisuüh thalan, “Asamüh ngo naiuso Jüpo tsünge,” “asamüh ngo ngetünto, Jüpo lüko nge-ela.”

²⁰Yisuüh nung ngio nou amkham tsam tsampai nai chaishi paidan taiutsünai apaüh chitetsün li ngiom. Naiuso apa sauüh tsüthalu, tiautenai apa atao moshisao.

²¹Nungai apaüh ngüso tü ngiom, “Ngo khuji, naiuso asamüh ngo yame lüko asam to meshen angei nai e-e; ngo tai khu-e asam nungai shiao tsüshio-e.”

²²Nungtiphe Yihuda haiüh ngiom, “Ngo tai khu-e asamüh nungai shiao tsüshio-e ta apaüh ngiojiphe, apaüh meshen chija luat lo-e ta ngioji süne?”

²³Naiuso apaüh ngüso tü ngiom, “Asam akhem ainou, ngü to akheng ainou; asam nung goumchi ün nou; ngü to nung goumchi ün tsüde.

²⁴Nung thako ngü asam tü ngio-iu, asam to meshen angei nai e-e ta ngiom: tititenai asamüh ‘Ngo sau nung Ngo’ da tsümonglam kü nai asam meshen angei nai e-e.”

²⁵Nungtiphe ngüsoüh apa tü ngiom, “Ni sau?” Yisuüh ngüso tü ngiom, “Nungbao ngü lüko asam tü aya nai ngiokülamo.

²⁶Asam thaiutha ngü ngioau naiuso mikhemao piakü taim: nungti lüko sauüh ngo hong apa atsüo noin; naiuso ngü apa ainou ti lula, nung atsüojin thso khako chiteji.”

²⁷Apaüh ngüso tü Po nou thaiutha chiteji ta ngüsoüh tsüngela.

²⁸Nungtiphe Yisuüh ngiom, “Tilai asamüh Khaiunia Thso loksane, nungai ‘Ngo sau Ngo’ apaka ta naiuso ngü meshen chija nou ti tsüchhi, lüko Po nou ngü tü chimtsün li ngü nung chiteji ta asamüh nge-e.

²⁹Sauüh ngo hong apa ngü ko noin; apaüh ngo jüpemsa tsüwan; tititenai ngü asaita apa mongtsamao chhi chhiji.”

³⁰Apaüh nung chite nai, piakü nou apa da monglam.

³¹Nungtiphe Yisuüh Yihudahai sauhaiüh apa da monglam, ngüso tü ngiom, “Asam jüngio nai noi naito asam atsüoting jü sahoi;

³²naiuso asamüh ngiotsüo nou nge-e, naiuso ngiotsüo nou asam khaiuniatsüo iula-i-e.”

³³Ngüsoüh apa tü thala, “Sam Abraham le, naiuso laitsüo sau sua tsütheha. Asam khaiuniatsüo-au iula-e ta ni titi ngioji?”

³⁴Yisuüh ngüso tü thala, “Atsüoting, ngü asam tü ngioji, sauhaiüh angei kankei-e, apa angei sua noin.

³⁵Sua khaiunia tsak tsamai asaita hao tsünoiji lüko thso nou to asaita noiji.

³⁶Nungtiphe Thso nou asam khaiuniatsüo iula-i naito, asam atsüoting khaiuniatsüo noi-e.

³⁷Asam Abraham le ta ngü ngen; nungti lüko jüngio asam da meikü tsünoiphe, asamüh ngo luatao yamji.

³⁸Jüpo ko ngü ti ep nung ngü chiteji naiuso asamüh lüko asam po ainou ti lula nung chhiji.”

³⁹Ngüsoüh apa tü thalakü ngiom, “Sam po Abraham noin.” Yisuüh ngüso tü ngiom, “Asam Abraham thsoso tünto, asamüh Abraham chhi chhiela.

⁴⁰Lüko Goa ainou ngiotsüo ngo lulaküta asam tü ngiotsün ngo, naiuso lo asamüh ngo luatao yamji. Abrahamüh nung tsüchhi.

⁴¹Asamüh asam po chhi chhiji.” Ngüsoüh apa tü ngiom, “Sam peikhem thso tsüde; sam po tsak Goa noin.”

⁴²Yisuüh ngüso tü ngiom, “Goa asam po tünto, asamüh ngo tsüojinela; tititenai ngo Goa ainou shin tititenai ngo jü chija nou tsüshika, lüko apaüh ngo hong.

⁴³Tiao asamüh jüngio tsüngela? Tititenai nungti asamüh jüngio angao tsüshio.

⁴⁴Asam meshen po biya ün noin, naiuso asam poüh aiutsün chhiao asamüh mongchioji. Apa aya ainou khaiunia luattsün noiküla, naiuso ngiotsüo nai tsütsa, tititenai apa da ngiotsüo tsünoi. Apaüh tilai atsüo tsüdekü chiteji, apaüh meshen mong ainou chiteji: tititenai apa atsüo tsüdekü nou naiuso atsüo tsüdekün po.

⁴⁵Lüko, ngo ngiotsüo chite nai, asamüh ngü da mong tsülam.

⁴⁶Asam ongko sauüh ngo angei khaiunia ta mitha kiuao shioji? Ngü ngiotsüo ngio nai, asamüh tiao ngü da mong tsülam?

⁴⁷Sau Goa ün noin apaüh Goa ngio angji: asamüh nung tsüang, tititenai asam Goa ün tsüde.”

⁴⁸Yihuda haiüh thalakü apa tü ngiom, “Ni Samaria hai, naiuso ni da angei onthso noin ta samüh ngioao tsütha süne?”

⁴⁹Yisuüh thala. “Ngü da angei onthso tsünoi; lüko ngü Jüpo asu hatji, naiuso asamüh ngo asu tsühat.

⁵⁰Lüko ngü meshen nianlom tsüyam: nung yamao naiuso mikhemao tsak noin.

⁵¹Atsüoting, ngü asam tü ngio-e: Ajantsoüh jüngio kankei nai, apaüh laitsüo e nou tsüeppe.”

⁵²Yihuda haiüh apa tü ngiom, “Lo samüh ni da angei onthso noin ta ngen. Abraham naiuso E-po nouso ean-iu; naiuso ni ngioji, Ajantsoüh jüngio kankei nai, apa laitsüo tsüe-e.

⁵³Sam po Abraham sau ean-iu, apa ko ni song süne? Naiuso E-po nouso ean-iu! Ni meshen chija sau da ngioji?”

⁵⁴Yisuüh thala, “Ngo jü chija ajinka naito, ngo ajinkatsün ti tsüde: ngo ajinkatsün Jüpo noin: apa tü asamüh asam Goa ta chiteji;

⁵⁵naiuso asamüh apa tsünge: lüko ngü apa ngen: naiuso ngü apa tsünge ta ngio nai ngo asam li atsüotsüdekü noi-e; lüko ngü apa ngen, naiuso apa ngio kankeiji.

⁵⁶Asam po Abrahamüh jü ajekhaiu epao mongling; naiuso apaüh nung ep naiuso monglingkü noiküla.”

⁵⁷Nungtiphe Yihuda haiüh apa tü ngiom, “Ni chetküta loüh pon aopungo mongoi, ni to Abraham ep so?”

⁵⁸Yisuüh ngüso tü ngiom, “Atsüoting ngü asam tü ngio-e, Abraham mochetkü nai ngo noin.”

⁵⁹Nungtiphe ngüsoüh apa da yakao lung nou sem: lüko Yisuüh meshen chija tsang, naiuso amkham tsam ainou khuwan.