Read Khiamniungan Naga Yohan 9 Bible Online

Yohan 9 - Khiamniungan Naga bible

Yohan 9

¹Yisu khu nai, achet nai yakü niopek chettsün khaiunia tsak ep.

²Apa sahoi nou apa tü sangkü ngiom, “Atsandetsün, nung khaiunia niovei pekkü chetao apaüh süne, apa posinyiu nou süne, sauüh angei kankei?”

³Yisuüh thala, “Nung khaiunia nou lüko, apa posinyiu nou lüko angei tsükankei; lüko apa da Goa chhi achiai sung-iao thaiutha noin.

⁴Awon nai ngo hongtsün chhi samüh chhiao noin; tilai sauüh chhiao tsüshiokü nou nungtin anyakhem shiji.

⁵Ngo goumchi ko noi nou ko yangkü ngo goumchi awon.”

⁶Apaüh nungti chiteküta, goh ai lei thuplut, naiuso lei nou puchet shankü, nung puchet nou apa niovei nai tsomlutkü,

⁷apa tü ngiom, “Khukü Siloam, khiamla nai akha lüpengan” (athat nou hong.) Nungtiphe apa khukü pengannai epkü laokü shin.

⁸Nungti phaohai sauhaiüh apa kümi asaohetsün tsak ta ngen ngüsoüh ngiom, “Moknoikü saohetsün nung tsüde so?”

⁹Ajantsoüh ngiom, “Nung kha,” Amao haiüh ngiom, “Nung tsüdeka, lüko apa khekkü,” Nungai apa pemüh ngiom, “Nung khaiunia nou ngo noin.”

¹⁰Nungai ngüsoüh apa tü sang, “Naito aniovei titi lusat kiu?”

¹¹Apaüh thala, “Yisu ta niankü khaiunia tsaküh puchet shan, naiuso jü niovei nai tsomkiukü ngü tü ngiom, Siloam nai khukü akha lüpengan! nungai ngü khukü pengan nai ep.”

¹²Naiuso ngüsoüh, “apa tiai noin?” ta sang. Nai apaüh thalan, “Ngü tsünge.”

¹³Sau niopek noiküla nung khaiunia ngüsoüh Farisihoi dongai nialoukü shin.

¹⁴Nung Yisuüh puchet shankü apa niovei lusat kiutsün ajekhaiu nou Yihuda Anonyi noiküla.

¹⁵Nungti Farisihoi nou lüko apaüh titi ep ta apa tü sang. Apaüh ngüso tü ngiom, “Apaüh jü niovei nai puchet tsomlut naiuso nung ngo pengan nai ep.”

¹⁶Nung thako Farisihoi ajantsoüh ngiom, “Nung khaiunia Goa ainou tsüde, tititenai apaüh Yihuda Anonyi tsükankei.” Lüko amao haiüh ngiom, “Khaiunia sau angei khaiunia noin, apaüh titi nungtin ii nou chhiao shio?” Nungai ngüso ongko ajanpek noiküla.

¹⁷Nungtiphe ngüsoüh müjam niopek khaiunia tü ngiom, “Apaüh aniovei lusatkiu nouko ni apa thaiutha ti ngioji?” Apaüh ngiom, “Apa E-po tsak noin.”

¹⁸Apa niopek noiküla naiuso epkü iulan, ta Yihuda hai nokpao nokshingüh epkü iulatsün posinyiu mojonkün lektso apa thaiutha atsüo ta tsüyang,

¹⁹naiuso ngüso tü sangkü ngiom, “Achet nai yakü niovei pekkü chet ta asamüh ngiotsün nung asam thso süne? Naito lo apaüh titi epji?”

²⁰Apa posinyiu nou thalakü ngiom, “Nung jethso, naiuso apa niovei pekkü chet ta samüh ngen;

²¹lüko lo apaüh titi epji, samüh tsünge; tsüdekünai sauüh apa niovei lusatkiu samüh tsünge; apa tü lüsang; apa songaniu apaüh meshen thaiutha chite-e.”

²²Yihudahai lun hatkü apa posinyiu nou nungti ngiom, tititenai ngüsoüh nungti ngiotsün lulan, khaiunia ajantsoüh apa Khrista ta thalou nai, Yihuda kamthang ainou apa wanan-e.

²³Nungtiphe apa posinyiu nou ngiom, “Apa songaniu; apa tü lüsang.”

²⁴Nungtiphe ngüsoüh müjam niopek khaiunia nou jonkü apa tü ngiom, “Goa hao nianlom lükiu; nung angei khaiunia ta samüh ngen.”

²⁵Nungtiphe apaüh thala, “Apa angei khaiunia süne tsüde, ngü tsünge; ngo niopek noiküla, lo ngo epji, nunglu ngü ngen.”

²⁶Nungai ngüsoüh apa tü ngiom, “Apaüh ni tü ti chhin? Apaüh aniovei titi lusatkiu?”

²⁷Apaüh ngüso tü thala, “Ngü lolu ngiowaniu, lüko asamüh tsüang. Tiau asamüh müjam angao aiuji? Asam lüko apa sahoi theao aiuji süne?”

²⁸Ngüsoüh apa tü atheshan kiukü ngiom, “Ni apa sahoi; lüko sam to Mosa sahoi noin.

²⁹Goa nou Mosa ko chiten ta samüh ngen; lüko nung khaiunia to, apa ti ainou samüh tsünge.”

³⁰Khaiunia nou apa tü thalakü ngiom, “Naito athanga ao nou nungko noin! apa ti ainou nung asamüh tsünge, lüko apaüh jüniovei lusatkiu.

³¹Goa nou angei hoi tü tsüange ta samüh ngen: lüko khaiunia tsak Goa tü amtsün noinai, naiuso apaüh mongchiotsün chhi nai apa tü Goa nou angji.

³²Niovei pekkü chettsün khaiunia tsak niovei ajantsoüh lusatkiu ta achetsinyim ainou laitsüo tsüluhakha.

³³Nung khaiunia Goa ainou tsüde tünto, apaüh ti chhiao tsüshio-ela.”

³⁴Ngüsoüh apa tü thalakü ngiom, “Ni angei nailu chet, naito ni sam tü tsandetsün süne?” Naiuso ngüsoüh Yihuda kamthang ainou apa nian wanan.

³⁵Ngüsoüh apa Yihuda kamthang ainou nian wananiu ta Yisuüh lula; nai apa epkü Yisuüh ngiom, “Ni Goa Thso da monglamji süne?”

³⁶Apaüh thalakü ngiom, “APAOU, ngü apa da monglamao apa sau?”

³⁷Yisuüh thalan, “Ni apa epiu, naiuso sau niko chiteji nung Apa.”

³⁸Nai alomei eptsün nou ngiom, “APAOU, ngü monglamji,” Nai apaüh Yisu tü amkham.

³⁹Nungai Yisuüh ngiom, “Sauhaiüh tsüep ngüsoüh epao naiuso sauhaiüh epji ngüso niopek iula-iao, mikhemao thaiutha ngo nung goumchi ai shin.”

⁴⁰Farisihoi sauhai apako noiküla, ngüsoüh nung ngio nou lulakü apa tü ngiom, “Sam lüko niopek süne?”

⁴¹Yisuüh ngüso tü ngiom, “Asam niopek tünto, asam angei tsünoi-ela; lüko lo asamüh ngioji, ‘Samüh epji,’ nungüh asam angei noin.”