Read Khiamniungan Naga Hong 10 Bible Online

Hong 10 - Khiamniungan Naga bible

Hong 10

¹Kaisaria nai khaiunia tsak nian nou Kornelia, sau Romhai süpai sübao tü lüko “Italia hai süpai” ta jonkü aniakei tsak noiküla.

²Apa don nai mongkiutsün khaiunia tsak; apa naiuso apa tsamkhaiu athumüh Goa amkhamkü noiküla. Apaüh lüko Yihudahai angja khaiuniahoi nouso tü hachukü piakü chhin naiuso Goa tü tsülaokü misaokü noiküla.

³Nyitso anyiwem yankü atao sümebaji thatso nai apaüh atsangshei tsak ep, nungko apaüh Goa hongthon tsak apa dongai shitsün tsangsheikü epkü apa tü nungti ngiom, “Kornelia!”

⁴Apaüh hong noutü ahatnai thapkü ngiom, “Nung ti noin, APAOU?” Nai hong nou apatü ngiom, “Ni misao saotsün naiuso hoikü kiutsün nou Goa monglingiu naiuso amisao thalaau khemkü noin.

⁵Lo Jopa nai khaiunia ahong, naiuso Simon sautü Peter ta jonji apa nialokü ashi.

⁶Khiamnok sainai kihtsün Simon nian nou nyikhun shantsün tsamai apa mesan tsak saokü noin.”

⁷Nungaih tilai apatü ngiotsün aünhong nou pungekü khu, apaüh tsamki nime naiuso süpaihoi ongko asai apa yathsüokü noitsün don nai mongkiutsün tsak jon,

⁸naiuso apaüh ngüne tü nungso ngio apem ngiokütün phiai ngüso Jopa ai hong.

⁹Nungthannyi, ngüso yamai tsakeikü khutsünko Jopa shimkü shin, nungko Peter anyiwem thatso nai tsamkhaiu ai misaoau sungh.

¹⁰Apa naiujikankü chih heau aiu, naiuso ngüsoüh khemlotsün taoko apaüh atsangshei khuwan.

¹¹Apaüh aün soppankü ep nungko thengkam tsak khekkü ne apon tsak ano püle ai hekü goumchiko saliantsün ep.

¹²Nung ne nouko ahok püle potsün thainian in apem goumchiko tsakeitsün naiuso koiai jeikeitsün waio nouso noiküla.

¹³Nungko sangh tsak nou apa tü ngiom, “Peter, achu, küta loatkü lühe!”

¹⁴Lüko Peterüh ngiom, “APAOU, nungti tsüde! Amkham yamko tsüsiokün tsüdekünai tsüyanthsüokün ngo tilaitso tsühe.”

¹⁵Nung sangh nou loüh apatü ngioshin, “Goa nou yanthsüokü noin ta ngiowantsün tilünou tsüyanthsüo ta lakankeishi.”

¹⁶Nung atao samjam ngoikü thawao, naiuso nungphiai nung ne nou aün ai laokü kankü sungan.

¹⁷Peterüh nung atsangshei ti alat ta ngalakü noitsünko, khaiunia sauhai Korneliaüh hongkü noiküla ngüsoüh Simon tsam epsan, naiuso ngüso lo bekhan khako tsakü noiküla.

¹⁸Nungaih ngüsoüh, “Simon Peter ta niankü nungko mesan tsak noimo?” ta jonkü sangh.

¹⁹Peterüh loüh nung atsangshei nou ti alat ta yanglukü noinai, Onthso nou apatü ngiom, “Anglu! Ni yamtsün khaiunia süme nungko noin.

²⁰Nungtiphe khemloküta lüsao, naiuso ngüsoko aikü khuau lahenyi.”

²¹Nungtiphe Peter saoküta nung khaiunia nouso tü ngiom, “Asamüh yamtsün khaiunia nou nung ngü noin. Asam titita shin?”

²²Ngüsoüh thalakü ngiom, “Sam tsom khaiuko APAOU Korneliaüh hongkü noin.” “Apa Goa tü amtsün Yihuda khaiunia chikü nou asuhat alomsan kiutsün, apa khaiunia amei tsak noin. Ni ngiotsün apaüh angluau Goa hong nou ni apa tsamai nialokü shiau apatü ngiom.”

²³Peterüh nung khaiunia nouso apa tsamai niathio küta ngüso tü nungsoh nou nungko ashaman ta koja. Nungthannyi apa tsalokü ngüsoko aikü khuha naiuso Jopa ai noitsün amonglamhoi ajantso apako khuha.

²⁴Nungthannyi nai apa Kasaria ai shingoinai, Kornelia apa tsammonghoi naiuso apaüh jonkamtsün haimeiteng nousoko aikü apa tü taiukü noiküla.

²⁵Peter tsamai naptaoko, Kornelia apako pheteküta apa khako kaukü am.

²⁶Lüko Peterüh apatü, “Atsa,” “Ngo lüko khaiunia tsaklu noin” ta ngiom.

²⁷Korneliako chitechitekü apa tsamai napnai apaüh khaiunia piakü kamshinoikü ep.

²⁸“Yihuhaiüh melemaohai tü sailuau tsüdekünai aikü kamkü tsakeiau apa donyam nai ayam tsünoi ta asamüh asam chija meikü ngen. Lüko ngo khaiunia ajantso amkham yamko tsüyanthsüo si tsüsio ta tsüvesanau Goa nou ngü hau haniu.

²⁹Nungtiphe tilai asamüh ngü jonau hong, ngü ti aletlo tsünoikü shin. Naito ti thaiutha asamüh ngo jonau hong ta ngü asam tü sangji?”

³⁰Korneliaüh ngiom, “Samnyi khako lotao thatsoko nai, sümebaji nouko ngo jütsamai misaolokü noiküla. Alekta neshe sheitho laplapkü thokü khaiunia tsak jükhako tsa

³¹kü ngiom: ‘Kornelia! Ni misaotsün Goa nou lula-iu naiuso ni mehau amai tsüyangkü kiutsün Goa khako yangsankü noin.

³²Jopa nai Simon Peter ta jonkü noitsün khaiunia tsak dongai khaiunia ajantso lühong. Apa nyikhun chiutsün khaiunia Simon sau khiamnok sainai kihji apa tsamai mesan tsak thekü noin.’

³³Nungtiphe nungailu ngo ni jonau hong, naiuso ni shitsün nung mei. Nungtiphe lo sam APAOU nou ayamhantsün tilünou luloau sam chikü Goa khako kamkü noin.”

³⁴Peterüh chiteau yachu: “Goa da phaphi phamong tsünoi ta lo ngo atsüoteng seisanji.

³⁵Sauhaiüh apa amkhamji naiuso ayamtha nou chhiji ngüso ti mele noilünou apa khako aloau tinkü naiuso maikü noin.

³⁶Sau apem khaiuko APAOU noin nung aalo Ngem Amei Yisu Khrista tsangkü Israel thsoso dongai apaüh hongtsün nung ngem asamüh ngen.

³⁷Yohanüh chimkü limkiutsün yanlükhunkütün phiai, Galil ai yakü Israel goumchi apemai ti chhi asong shinap nung asamüh ngen.

³⁸Nazaret hai nou Yisu tü Goa nou Asio Onthso naiuso Oukong titi kheplutkiu nungh thaiutha asamüh ngen. Apa chhi amei chhikü naiuso Biya oukong nai noinso lomeikiukü alumai tsakei, tititenai Goa apako hakü noiküla.

³⁹Apaüh Israelhai goumchi ai naiuso Yirusalem nai chhitsün apem thaiutha sam mitha noin. Küta ngüsoüh apa paiphu tsak ta lalutkü loatkü wan.

⁴⁰Lüko Goa nou apa samnyi phiai ean ainou ahkü shi-in, naiuso epi-in,

⁴¹nung khaiunia pungkü hau tsüde, lüko Goa nou sauhai mitha kiuau chosanankü noiküla, nungh sam apa ee ainou ahkü shiküta samko aikü he naiuso shiukü noiküla nungso dongai sungh.

⁴²Khaiuniahoi nouso tü Ngem Amei chimau naiuso ee si aa nouso tü mikhemau Goa nou oukong kiutsün tsak nou apa noin ta mitha kiuau sam tü thoilut.

⁴³Sauhaiüh apa da monglame apa nian oukong tsangkü ngüso apemüh chaithewan eppe ta ngiokü e-pohoi nouso apemüh apa thaiutha chiten.”

⁴⁴Peterüh ngio chitekü noitsünko apa ngio angkü noitsünso apem chiai Asio Onthso saom.

⁴⁵Yihudahai amonglamhoi nouso sauhai Jopa ainou Peterko hakü shikü noiküla ngüsoüh melemao hai chiai Asio Onthso kheplutkiutsün epkü ngüso ngawan.

⁴⁶Tititenai ngüsoüh lüko amaohai ngioko Goa Asong nou lomsankü chitekü lula. Peterüh ngiom:

⁴⁷“Samüh lokü shitsünli, nung khaiunia nousoüh lüko Asio Onthso nou lou-iu. Naito, ngüso khiamai limkiuau ainou lolaokü taiuau ajantsoüh shio-e süne?”

⁴⁸Nungtiphe apaüh ngüso Yisu Khrista nianko khiamai limau ngiokiu. Nungaih ngüsoko ajekhaiu intso noihaau ngüsoüh apatü koja.