Read Khiamniungan Naga Hong 11 Bible Online

Hong 11 - Khiamniungan Naga bible

Hong 11

¹Melemaohaiüh lüko Goa Ngio lu-iu ta hongthonhoi naiuso Yihuda apemai noitsün amonglamhoi nousoüh lula.

²Tilai Peter Yirusalemai sungh, melemaohaiüh lüko atippantsün louau noin ta monglamtsünsoüh apa lochikü ngiom,

³“Ni tsütippankün melemaohai tsamai mesan tsak noiküla, naiuso ni ngüsoko aikü lüko heshiuhan!”

⁴Nungtiphe ayanai yakü ti thawaokü noiküla nung thaiutha ngiongem apem Peterüh ngüso hau kiu:

⁵“Tilai ngo Jopa noknio nai misaokü noiküla, Ngo atsangshei tsak ep. Nungaih thengkam tsak khekkü ne asong tsak anuo püle ai semkü aün ainou saotsün ngo ep, küta nung jüdongko laowan.

⁶Ngü nung tü tsüokü amongai thapnai nungko tsam thainian liuthainian, chajeen naiuso ajeikeitsün waio nouso ep.

⁷Nungaih ngo sangh tsaküh ngütü, ‘Peter, achu, küta nungso loatkü lühe!’ ta ngiotsün lula.

⁸Lüko ngü ngiom, ‘APAOU, nungti tsüde! Amkham yamko tsüsiokün tsüdekünai achinyan eheshiu tilaitso jüsonai monap.’

⁹Aün ainou sangtsaküh loühjam ngioshin, ‘Ti Goa nou losiokü taiukiu nungtü ni tsüsio ta lavesan.’

¹⁰Nung samjam ngoikü thawao, naiuso athon nai nungso apem aün ai tenkü sungan.

¹¹Nungtaotengko nai Kaisaria ainou khaiunia süme jüdongai hongshitsünso ngü noitsün tsamai shisaom.

¹²Onthso nou ngü ngüsoko tsühenyikü aikü lükhu ta ngiom. Nung Jopa ainou shitsün amonglam deisiniohoi khaiunia luok nouso ngüko hakü Kaisaria ai khu, naiuso sam apem Kornelia tsamai nap.

¹³Apaüh sam hau aünhong tsak apa tsamai titi tsakü noiküla nung chiten, nung hong nou apatü ngiom, ‘Simon Peter nian nou khaiunia tsak thaiutha Jopa nai khaiunia jantso ahong.

¹⁴Naiuso ti ngio nou ni naiuso atsammong apem kipsane, nung apaüh ni tü ngio-e.’

¹⁵Naiuso ngo tilai ngiochiteau tsalo, chongting nai sam chiai saotsünli Asio Onthso nou ngüso chiai saom.

¹⁶Nungaih ‘Yohanüh khiam nou limkiu, lüko asam Asio Onthso nou limkiu-e.’ Ta APAOU nou ngiotsün ngü yangsan.

¹⁷Nungtiphe tilai samüh APAOU Yisu Khrista da monglam, sam hau paopei kiutsünli Goa nou ngüso hau lüko wekü kiunaito Goa lolaoau shiotsün ngü sau!”

¹⁸Tilai ngüsoüh nung lula, ngüsoüh khengshitsün laoloküta Goa lomsankü ngiom, “Naito melemaohaiüh lüko aa epau thaiutha mongphokleau aküo nou Goa nou kiu!”

¹⁹Stephan loatkü ajeiat thawaotsünko amonglamhoi sauhai Fonika, Kupra, naiuso Antiok saokü nung ngem Yihudahai tü lu chitekü nok meankü pengkü khu.

²⁰Lüko amao amonglamhoi nouso sauhai Kupra naiuso Kurini ainou noiküla, ngüso Antiok nai khukü APAOU Yisu thaiutha Ngem Amei nou Melemaohai tü lüko chimkiu.

²¹APAOU oukong ngüsoko hakü noiküla, naiuso piakü nou monglamkü APAOU dongai phokle.

²²Nung ngiongem nou Yirusalem nai noitsün donthe shisaom, nungtiphe ngüsoüh Barnaba Antiok nai hong.

²³Tilai apa shisaokü Goa nou khaiuniahoi nouso titi oukkiu nung ep, apa monglingkü ngüso apem tü mong apem nou APAOU nouko mongkiukü noiau kojakü lotsüokiu.

²⁴Barnaba nung amonglam naiuso Asio Onthso nou meankü noitsün khaiunia amei tsak noiküla, naiuso khaiunia piakü APAOU dongai niakü shin.

²⁵Nungai Barnaba Tarsa ai Saul tü yamkü khu.

²⁶Tilai Barnabaüh apa epiu, apaüh Saul Antiok nai nialokü shin, küta ngüneüh donthe nouso tü naiuso hoi asong tsak tü tsandekü noi. Antiok nai nung amonglamhoi tü ayating Khristan ta jon.

²⁷Nungtao thatsokonai E-pohoi ajantso Yirusalem ainou Antiok ai saom.

²⁸Ngüso ongko Agaba ta niankü e-po tsak tsaküta Onthso oukong tsangkü goumchi apem nai athsüoting naiusile tsak shi-e ta ngiokiu. (Nung Klaudia vetaoko shithawao.)

²⁹Sahoi nouso khaiunia pungkü nou meshenüh shiotsün lektso Yihuda goumchi ai noitsün amonglam deisinioso tü hachuau thalo.

³⁰Ngüsoüh nung chhiküta tangka nou Yihuda goumchi ai noitsün donthe petche nouso dongai Barnaba si Saul ne tsangkü hong.