Read Khiamniungan Naga Hong 14 Bible Online

Hong 14 - Khiamniungan Naga bible

Hong 14

¹Ngüne Ikonia nai Yihuda kamthang nai sungkü chitenai nungko Yihudahai naiuso Grikhai hoi asong nemtsoüh monglam.

²Lüko tsümonglamkün Yihudahaiüh melemao nouso lotsüokü amonglam deisiniohoi thako phoklekü mongkiain.

³Nungtiphe ajekhaiu laiukü ngüsoüh sam tü APAOU nianko mongsongkü chite, naiuso ngüso pha tsangkü ii naiuso athanga chhi chhiau ngiokiukü, apaüh Yisu atsüojin ngio thaiutha mitha kiu.

⁴Noknio nai kihtsün khaiuniahoi ajantso Yihudahai ko, naiuso ajantso hongthonhoi ko ta janpekkü iula.

⁵Nai tilai melemaohoi naiuso Yihudahaiüh ngüso nokshing melemao nousoko meanikü kankeiau naiuso lung nou yakkau donsan,

⁶nung ngean, nai Lukonia si Derbi noksong nouso lemkü ngüso saokhuwan.

⁷Ngüsoüh nungko Ngem Amei chim.

⁸Lustra nai achet taoko aita atsakeiao tsüshiokün chiune khaiunia tsak noiküla.

⁹Apa nungko moknoikü Paulüh chitetsün tü ang, Paulüh apa lomeiau amonglam noitsün apaüh epsankü

¹⁰apa tü langlutkü thapkü sang asong nou vekü ngiom, “Ahok lukü lütsa!” Nai apa hamkü tsakei.

¹¹Tilai hoi nou Paulüh chitetsün ep, ngüsoüh Lukoniahai ngioko thsüokü vekü ngiom, “Sam dongai goa nouso khaiuniali iulakü saokü noin!”

¹²Ngüsoüh Barnaba tü Jupiter ta, naiuso Paul tü Merkuri ta jon, tititenai apa ngio chitetsün atengting noiküla.

¹³Noksong khaiuko noitsün amkham tsam mesonhoi nousoüh bekhan nouso shimkü jangtsopong nouso naiuso taoponlak kankü shikü hoi nouso hau chaithio thio-e ta noiküla.

¹⁴Lüko tilai hongthon Barnaba si Paul neüh nung lula, ngüneüh ne chipekküta hoi ongai hamkü napkü vekü ngiom,

¹⁵“Asonghoiso, tiau asamüh nungti chhiji? Asam titi noin nungti sam lüko khaiunialu noin! Goum, Aün, Khiamnok, naiuso nungai noitsün apem shantsün aa Goa dongai nung yaang chhisiya ainou phokleau samüh Ngem Amei asam dongai kankü shiji.

¹⁶Ayanan taoko apaüh khaiunia chikü meshenüh mongchiotsün yamai khu-i.

¹⁷Nungti lüko apaüh amei kankeikü aün ainou ahnaiuso atao amei asam hau kiu nou shioko, naiuso apaüh eheshiu si amongling nou asam mong meani nou shioko, apaüh meshen thaiutha mitha kiutsün tsüwan.”

¹⁸Nungso ngio ngiokü ngüso tü chai tsüthioau thaiutha hoi jeikü lolao.

¹⁹Lüko nungko Antiok naiuso Ikonia ainou Yihudahoi nouso shi, naiuso hoi nou lodanglokütünai, Paul tü lung nou yak, nungko apa eane ta yangkü noksong ainou tenlükhun.

²⁰Lüko hongthonhoi nouso apa lemkü tsakü noinai, apa chukü noksongai nap. Naiuso nungthannyi nai apa Barnaba ko hakü Derbi ai khu.

²¹Ngüsoüh nung noksong nai Ngem Amei chimküta sahoi piakü iula-ikü, ngüso Lustra, Ikonia, naiuso Antiok saokü yakü,

²²ngüsoüh sahoi nouso onthso nai mong lokongkiukü, naiuso amonglam nai tsülaokü lotsüokü, “angja omhe piakü yankü sam Goa nokshing nai napau noin,” ta tsande.

²³Ngüsoüh ngüso thaiutha donthe pungkü nai petchehoi shingsankü keithon misao saokütünai, ngüsoüh monglamtsün APAOU hau ngüso taiukiu.

²⁴Ngüso Pisidia thsatkü khuküta Pamfulia ai shin.

²⁵Perka nai ngio nou chitekütünai, ngüso Atalia ai sao.

²⁶Nung ainou ngüso Antiok nai Goa atsüojin chhi thaiutha taiukiu, naiuso ngüso chhi khemloküta Antiok ai kheng nouko khu.

²⁷Ngüso shingoiküta donthe nou aikü kamshikü, ngüsoko Goa nou chhitsün apem naiuso Melemaohai thaiutha apaüh titi amonglam kuo tsak sopkiu, nung apem ngüsoüh ngiom.

²⁸Nai ngüso sahoi nousoko atao laiukü shamkü noiküla.