Read Khiamniungan Naga Hong 15 Bible Online

Hong 15 - Khiamniungan Naga bible

Hong 15

¹Khaiunia ajantso Yihuda ainou Antiok ai saokü amonglam deisiniohoi nousotü, “Mosa Ngiokhemüh pohtsünli asam tsütippankünaito asamüh aasan epau tsüshio,” ta tsande.

²Nung thaiuthako tilai Paul naiuso Barnaba ne ngüsoko ngio thatü tsüjeiaikü ngemmat, nungtiphe Paul naiuso Barnaba ne naiuso ngüneko amaohai ajantso hakü nung ngio thaiutha Yirusalemai hongthonhoi si petchehoi dongai sungau shingsan.

³Nungko donthehoi nou lamthiokü Melemaohai mongphokletsün thaiutha ngiopengkü ngüso Fonikia si Samaria thsatkü khu, naiuso nungko ngüsoüh deisinioso thatü monglingi.

⁴Ngüso Yirusalemai shisaonai, donthehoi, hongthonhoi, naiuso petchehoi nousoüh ngüso lo, naiuso Goa nou ngüsoko chhitsün apem thaiutha chite.

⁵Lüko Farisihoi ongko amonglamhoi ajantsoüh tsalokü ngiom, “Melemao nouso tippane naiuso ngüsoüh Mosa Ngiokhem kankeiau ngiokiuau noin.”

⁶Hongthonhoi naiuso petchehoi nouso nung ngio yangluau aikü kamshi.

⁷Ngio laiukü thaluekütünai Peter tsaküta Ajeiaikam hoi nousotü ngiom, “Jü deisinioso, atao laiukü nai yakü Goa nou Melemaohaiüh luküta, monglamau Ngem Amei chimau asam ongko ngo shingsan ta asamüh ngeji.

⁸Naiuso mongpem ngetsün Goa nou sam hau kiutsünli, ngüso hau lüko Asio Onthso kiukü ta ngüso mitha noin.

⁹Amonglam nou ngüso mongpem tsaowankiuküta, sam naiuso ngüso jetko apaüh ti amomo tsüchhi.

¹⁰Nungtiphe ti khe samüh tsüdekünai sam paosiposoüh kanau shio nung amonglamhoi sangdongkhaiu nai loklutkiukü tiau lo asamüh Goa liluau aiuji?

¹¹Lüko APAOU Yisu atsüojin tsangkü ngüso titi aasane, sam lüko nungti aasane ta samüh monglamji.”

¹²Hoi apem tsamkü iula, nai Barnaba si Paul ne tsangkü ti ii naiuso athanga Goa nou Melemaohai ongko chhin nung chitetsün ngüsoüh ang.

¹³Ngüsoüh chitekhemkütünai, Yakobüh thalakü ngiom, “Deisinioso, jüngio anglu!

¹⁴Loteng Simonüh Goa nou ayanai titi Melemaohai thaiutha apaotsang apa hau theau ngüso ong ainou khaiunia tsak lusan ta chiteiu.

¹⁵E-po nouso ngio nungko mongthiokü noin. Asiongio nai ngioji,

¹⁶“Nungphiai ngo laokü shi-e, naiuso David nokshing shanshi-e ta APAOU nou ngioji. Ngo nung alothean nouso loüh mongkü shanshi-e.

¹⁷Melemao nouso chikü ngü sauhai ngü ün theau jon, khaiuniale chikü jüdongai shi-e.

¹⁸Sauüh nung beta ngekü taim, nungh APAOU nou ngioji.”

¹⁹“Nungtiphe samüh Melemaohai ongko Goa dongai sauhai phoklekü shiji ngüso tsüangja-iau noin.

²⁰Nunglikoto, sotsom amkhamtsün ainou eheshiu tsüheau, tsütsüokü ainou thatsamau, ashe tsüloshikü loattsün thainian ainou, tsüdekünai she ainou, pungekü noiaubao thsamsat tsak satau noin.

²¹Tititenai Mosaüh kümi vetao ainou, noksong apemai Yihuda kamthang pungkü apa ngiokhem veluau achimtsünso taiukü shin.”

²²Nai dontheko hongthonhoi naiuso petche nouso kamküta, Antiok nai Paul naiuso Barnaba neko hakü hoi ong ainou khaiunia ajantso chosanküta hongau thalo. Ngüsoüh khaiunia nime: Yihuda sau tü Barsaba ta jon, naiuso Sila ne amonglamhoi tsangkü atengting asuhat kiutsün chosan.

²³Naiuso ngüso pha nou thsamsat nungti sat: “Antiok, Siria naiuso Kilikia apemai Melemaohai deisinioso dongai hongthonhoi, petchehoi, naiuso amonglamhoi nousoüh salam kiuji.

²⁴Samüh ngiokhem tsükiukün khaiunia ajantso sam ong ainou sunghkü ngio nou asam mong phokle-ikü asam ngemat-in ta samüh lu nou shioko,

²⁵sam apemüh mongchiokü khaiunia shingsane, naiuso asam dongai samüh tsüojintsün Barnaba naiuso Paul,

²⁶sauhai sam APAOU Yisu Khrista nian thaiutha ngüso aa angja nai nap-in, ngüso hakü hongnai mei ta yang.

²⁷Nungtiphe Yihuda naiuso Sila, sauhaiüh ngüso nungso ngelo, sonthamngio nou ngioau samüh ngüso hongiu.

²⁸Asio Onthso naiuso samüh nungso apoteng nouso, chiai amao thsale asam tü tsükanlutau mongchiokü noiküla.

²⁹Nungti sotsom nouso hau thiotsün chaithio jengtsaiu nouso ainou, she ainou, athippattsün naiuso tsütsamtsütsüo ainou asam pungekü lünoi; nungso ainou asam pungenai, asam meikü noi-e, Meikü lünoi.”

³⁰Nungti ngüso wonkütünai, Antiok ai sao, nungai hoi nou aikü kamiküta ngüsoüh thsam nou kiu.

³¹Naiuso ngüsoüh nung velukütünai, aalo ngio thaiutha ngüso thatü mongling.

³²Yihuda naiuso Sila ne E-po phe, ngüsoüh deisinioso tü ngio piakü nou lotsüo, naiuso ngüso oukong-in.

³³Nungko intso noikütünai, ngüso deisinioso ainou aalo nai ngüso hongtsünso dongai laokü khuau won.

³⁴Lüko Sila to tsükhuhakü nungko noian.

³⁵Lüko Paul naiuso Barnabaüh amao piakü hakü APAOU ngio chimkü naiuso tsandekü ngüne Antiok nai shaman.

³⁶Ajekhaiu intso noiküta, Paulüh Barnaba tü ngiom, “Samüh APAOU ngio chimtaiutsün noknio apemai deisinioso titi noin ta sailukü sam lo laokü khuko.”

³⁷Nungaih Barnabaüh Yohan sau tü Mark ta jon, ngüneko apa nialokü khuau aiu.

³⁸Lüko apa Pamfulia ainai ngüso chhi ainou pungekü noianküla, Paulüh nung thaiuthako apa nialokü khuau tsümongchio.

³⁹Nungaih thatü mongkiakü iula, nungtiphe ngüne tsak si tsak ainou momo ta won, küta Barnabaüh apako mark nialokü Kupra ai kheng tsakko saokü khu.

⁴⁰Lüko Paulüh Sila shinglokü, APAOU atsüojin nai deisinisoüh ngüso taiukiukü khu.

⁴¹Nai apaüh donthe nouso oukongishikü Siria naiuso Kilikia thsatkü khu.