Read Khiamniungan Naga Hong 16 Bible Online

Hong 16 - Khiamniungan Naga bible

Hong 16

¹Apa Derbi naiuso Lustra ai shin, nung amonglam Yihuda nyiuhai tsak thso sahoi tsak nian nou Timothi naiuso apa po to Grik hai noiküla.

²Lustra si Ikonia nai noitsün deisiniosoüh apa nianlomkü chite.

³Paulüh Timothi apako aikü tsakeiha-iau aiu, nungtiphe apaüh Timothi tippankiu. Tiautenai nungai noitsün Yihudahai chikü nou Timothi po Grik hai ta ngephe Paulüh nung thaiuthako chhikü noiküla.

⁴Ngüsoüh noksong nouso thsatkü khunai, Yirusalem ai noinso hongthon naiuso petchehoi nou ngiokiutsün ngio taiuau thaiutha ngüso hau kiu.

⁵Nungtiphe donthe nouso amonglam nai oukongkü iula, naiuso ajekhaiu pungkü haove nai shingjikan.

⁶Asia nai ngio tsüchiteau Asio Onthso nou lolao, nungtiphe ngüso Frukia si Galatia lemlokü thsatkü khu.

⁷Ngüsoüh Musia elung saokütünai, Bitinia ai khuau kowe, lüko Yisu Onthsoüh ngüso tsükhu-i.

⁸Nungai ngüso Musia e-ankü khukü Troa ai saom.

⁹Naiuso asoh Paulüh meamean tsak ep: Makedonia hai tsak tsakü apatü kojakü ngiom, “Makedonia ai ashi küta sam ahachu!”

¹⁰Nungtiphe apaüh meamean nou epküta, nungailu Goa nou apatü ngiom, amei chimau sam jonji ta yangkü sam Makedonia ai khuau kowe.

¹¹Nungtiphe Troa ainou kheng nai khukü, sam saitha yam nou Samodraka ai shin naiuso nungthannyi nai samüh Niapoli saongoi.

¹²Nung ainou Rom hai nokyan Makedonia goumchi nai noknio Philipi ai shi, naiuso nung noknio nai sam ajekhaiu intso shaman.

¹³Yihuda Anonyi samüh haiukou tsak ko misao saotsün noin ta yangkü, noknio yankü khu, naiuso sam aikü moknoikü kam nouso nyiuhai tü chite.

¹⁴Tiatira noknio ainou anyaching ne jantsün Goa amkhamtsün nyiuhai nian nou Ludiaüh samüh chitetsün ang, tititenai Paulüh chitetsün ngio angau APAOU nou apa mong sopkiu.

¹⁵Tilai apa naiuso apa tsammong limkiu, apaüh sam tü kojakü ngiom, “Asamüh ngo APAOU da monglamji ta lusan nai jütsamai sungkü anoi.” Naiuso apaüh sam tü thatü koja.

¹⁶Nyitso sam misao saotsün nai khukü noinai, angei onthso suntsün meso tsak, sauüh e-po chhi nou APAOU nouso hau amai piakü kanjikankiu, apa samko phete.

¹⁷Apaüh Paul naiuso sam phiai hoilutkü vekü ngiom, “Asam tü aasan yam hantsün khaiunia nungso Asongting Goa yathsüotsünso noin! ngüsoüh asam tü titi aasane nung chimji!”

¹⁸Apaüh nungti piakünyi chim. Lüko Paul mongthonkü iula nou shioko phoklekü shikü onthso nou tü ngiom, “Yisu Khrista nianko apa ainou sungau ngo ngiokhem kiuji!” Nungailu nung angei onthso nou apa ainou sungan.

¹⁹Lüko tilai apa ün APAOU nousoüh ngüso amai epau yangtsün titsünoi ta epsan, ngüsoüh Paul si Sila ne thalo, küta chaikam ainou nokshing nouso dongai ngüso tenlükhun.

²⁰Ngüso ngiokhem kiutsünso Romhai dongai niakü shishikütünai, ngüsoüh ngiom, “Khaiunia nungso Yihudahai sam noksong nai thatü ngematiji.

²¹Ti don nouso sam Romhaiüh loau tsüdekünai kankeiau ayam tsünoi, nung ngüsoüh tsandeji.”

²²Naiuso hoi nou aikü ngüso thako tsa. Naiuso mikhem kiutsünsoüh ngüso ne lowankiukü ngüso tü sonpailai nou shioau ngiokhem kiu.

²³Ngüsoüh piaküjam shiokü phiai akhotsamai khothio, nung akhothiotsün meikü taiuau ngüsoüh ngiokhem kiu.

²⁴Ngüsoüh ngiokhem nou loküta akhotsampai akhengting nai ngüso hok keshikü taiu.

²⁵Ah-wem thatso nai Paul si Sila neüh Goa tü misaokü naiuso jih hangkü noiküla, naiuso amao akhothiotsünsoüh ngüne tü angkü noi.

²⁶Alekta gohaiu shikü akhotsam thang apem da saiukei. Nungailu kou apem soppankü khaiunia pungkü aketaiutsün auo nou thaman.

²⁷Akhotaiutsünso tü jimtsün asai ainou chungekü, akhotsam kou nouso soppankü epkü akhotsamai noinso khuwaniu ta yangkü apaüh meshen sah tensankü chija loat louau kowekü noiküla.

²⁸Lüko Paulüh sang asong nou vekü ngiom, “Ni meshen da ti tsümeikü lachhi, tititenai sam apem nungko noin!”

²⁹Nungai akhothiotsünsoüh tson nouso kankü shiau thaiutha hamthiokü nap. Apaüh ahat nou ngaongaokü Paul si Sila ne khako kauthio.

³⁰Ngüso nialokü apaüh ngiom, “Asonghoi, aasanau thaiutha ngo ti chhi-e?”

³¹Ngüsoüh ngiom, “APAOU Yisu da lümonglam, naito ni naiuso atsammong aasane.”

³²Ngüsoüh apa naiuso tsamai noinso apem tü APAOU ngio chite.

³³Apaüh nung ghondao thatsoko nai ngüso nialoküta ngüsotü shiutsün müo nouso tsawankiu.

³⁴Küta apa tsamai ngüso nialokü sungkü ngüso hau eheshiu kiu, naiuso apaüh apa tsammong apem hakü Goa da monglam küta thatü mongling.

³⁵Lüko tilai ahom shin, mikhem kiutsünsoüh petchehoi hongkü ngiom, “Nung khaiunia nouso lükhu-i.”

³⁶Akhothiotsünsoüh Paul tü nung ngiom, “Mikhem kiutsünhoi nou asam sokau hong, nungtiphe lo shiküta nyankü lükhu.”

³⁷Lüko Paulüh ehü aniakeitsün tü ngiom, “Sam tü aphio ti epsankü tsünoi, lüko ngüsoüh sam tü nyung khako shiu-iu, naiuso sam Romhai paopungthsoso noin! Naiuso ngüsoüh sam akhotsamai khothio-iu, naiuso lo ngüsoüh sam akao ai honganau aiuji. Nungti tilaitso tsüde! Romhai aniakeihoi ngüso chija nungai shiküta sam aniasan-i.”

³⁸Nungai ngüso ngio petchehoi nousoüh mikhem kiutsünso hau thunkiushi, nungai tilai ngüso Romhai ta lula, ngüso hat.

³⁹Nai ngüsoüh shiküta ngüso lodanglo ngüso niasankütünai noknio ainou khuau sang.

⁴⁰Nungai ngüso akhotsam ainou shiküta Ludia tsamai sungnai deisinioso epkü ngüso alo-ikü mongling.