Read Khiamniungan Naga Hong 17 Bible Online

Hong 17 - Khiamniungan Naga bible

Hong 17

¹Lo ngüso Amfipoli si Apolonia thsatkü khuküta Thesalonika ai Yihudahai kamthang tsak noitsün ai shin.

²Paul apa saisileli ngüso dongai sungküta anojet süme chikü apa ngüsoko Asiongio ainou tsangsheikü chimkü noian.

³Naiuso Asiongio ainou losankü, Khrista angja au noin naiuso ee ainou ahkü shiau pohkü noiküla ta, naiuso ngo asam tü ngiokiutsün “Yisu Khrista” noin ta apaüh thsüokü chite.

⁴Ngüso ajantso monglamikü don nai tsüojintsün Grikhai hoi asong tsak, naiuso nyiuhai piakü Paul si Sila neko halut.

⁵Lüko Yihudahai ngüso tü niokia nou khaiunia tsümeikünso sonkeng ainou taikam küta hoi asong tsak shan. Nung Paul si Sila ne khaiuniahoiso dongai niakü shiau yamkeitsün yamko khaiunia tsak Jason ta jontsün tsam lemlowan, noknio thapekkü angem losankü ngemat-in.

⁶Lüko tilai ngüsoüh Paul si Sila ne tsüep, Jason naiuso deisinioso ajantso noknio nai nokshinghoi dongai tenkü khukü vekü ngiom, “Goum, aün phoklean-itsün khaiunia nouso nungai lüko shikü noin!

⁷Jasonüh ngüso nialüthiokü nungso apem Yisu ta jontsün amao nokpao tsak Kaisar ngiokhem thako kankeitsün noin ta chite.”

⁸Tilai hoi nouso naiuso nokshinghoi nousoüh nung lula, ngüso tsümonglam.

⁹Ngüsoüh Jason naiuso amao ainou atuhsantsün tangka losankütünai, ngüso sok.

¹⁰Nungailu deisiniohoi nou Paul si Sila ne anyakhem nouko Berea ai hongan, naiuso tilai ngüso nungai shisaom, Yihuda kamthang nai sungh.

¹¹Thesalonika nai noitsünso konaito Berea nai noitsün khaiuniahoi mong sasakü noiküla. Ngüsoüh achimtsün ngio tü thatü mongchiokü ang, naiuso Paulüh ngiotsün atsüoting naito ta ajekhaiu pungkü Asiongio nai yam.

¹²Nungtiphe ngüso piakü nou naiuso Grik hai asong nyiuhai si pohai piakü nou monglam.

¹³Thesalonika nai noitsün Yihudahaiüh Paulüh Berea ai lüko Goa Ngio chimiu ta lula, ngüsoüh nungai shikü hoi asong nouso lotsüoküta angemat-iau yachu.

¹⁴Lo deisinio Paul, khiamnok kou saokü nungailu hongan, lüko Sila si Timothi neto nungai noi.

¹⁵Paul yanthiotsünsoüh apa Atena saokü niakü shin, naiuso Sila si Timothi netü apa dongai ashiotsün lektso shakta ashi ta ngiotsün ngem luküta ngüso punge.

¹⁶Paulüh ngüso tü taiukü Athena nai noi nai noknio nung sotsom nou meankü epkü apa mongmat.

¹⁷Nungtiphe apaüh Yihuda kamthang nai naiuso Melemao nouso sauhaiüh Goa don nai mongkiu, naiuso ajekhaiu pungkü sonkeng chaikam nai khaiunia sauhai yanlükhune ngüso tü mitha kiukü chim.

¹⁸Epikurion naiuso Stoik angehoi lüko apako phete. Ajantsoüh ngiom, “Nung son tsütsamkü nou ti ngioau aiuji?” Amaohaiüh ngiom, “Apa Melemao goa nouso chimtsün tsak saola.” Tititenai apaüh Yisu ahkü shitsün thaiutha chim.

¹⁹Ngüsoüh apa niakü Mar kingai sungkü ngiom, “Ni chitetsün atsande ayan nung tikü samüh ngeau aiuji.

²⁰Tititenai athanga ngio ajantso ni sam dongai kankü shiji. Nungtiphe nungso athat tikü samüh ngeau aiuji.”

²¹(Lo Athena hai naiuso nungai noitsün mesanhai apem nou ajekhaiu thum ti tsüchhikü, lüko ngio ayan tsak chite au tsüdekünai lulaau lümongchio.)

²²Paulüh Mar king nai tsakü ngiom, “Athenahai, asam don nai thatü mongkü noin ta ngo epji.

²³Tititenai ngo asam noknio thsatkü tsakeinai asamüh amkhamtsün athang nai thapnai ngü asiothang tsak nai, ‘Tsüngekün goa tsak thaiutha ‘ta satkü ep. Nung asamüh sübao tsünge lüko amkhamji, nung thako ngü asam tü ngioji.

²⁴Goumchi naiuso nungai noitsün apem shantsün Goa, apa aün naiuso goumchi khako APAOU shioko, pha nou shantsün amkham tsam nousoko apa tsünoi-e.

²⁵Tsüdekünai apa tsotsak pohkü noinli, khaiunia pha nou apa tsüyathsüoji, tititenai apaühbao apem hau aa, ii, naiuso jengtsaiu kiuji.

²⁶Khaiunia tsak ainou Goa nou kau chikü khaiuniale naiuso goumchi apemai kih au thaiutha shan. Aya aita Goa nou atao tongtü thatsankü ngüso kih au athang nouso thattaiukiu.

²⁷Apaüh nung ngüsoüh apa tü yangkü yamnaito, apa eppe ta ayang thaiutha chhin. Lüko Goa nouto sam saukotso laiukü pungekü tsünoi.

²⁸Khaiunia ajantsoüh ngiom, ‘Apa da sam noikü lemlemji naiuso aa kihji.’ Nung asam ajantsoüh jihang nai ngiotsünli, ‘sam lüko apa thsoso noin.’

²⁹Nungti Goa da eiusantsünphe, Goa to chaiou, tangkason, chaiou lung, tsüdekünai khaiunia mongthat ngio alatha nou thiosanli samüh tsüyangkü hau noin.

³⁰Nungtiphe tsüngekün taoto Goa nou tsümongtsüokü taiukiu, lüko loto apemai khaiunia apem nou mong phoklekü hau noin ta apaüh ngiokhem kiuji.

³¹Tititenai apaüh shingsantsün khaiunia nou asio nai goumchi mikhemau thaiutha apaüh ajekhaiu tsak thatsaniu, naiuso nung thaiutha apaüh ee ainou ahkü shi-iphe, khaiunia apem tü mitha kiu-iu!”

³²Lo ee ainou ahkü shitsün thaiutha, ngüsoüh tilai lula, ajantsoüh lochi. Lüko amaohaiüh ngiom, “Nung thaiutha ni ainou loühjam samüh angshi-e.”

³³Nungtiphe Paul ngüso ong ainou khuwan.

³⁴Lüko khaiunia ajantso apako hoilut, küta monglam, ngüso ongko Grikhai ajeiaikam nai mepem haove tsak nou Dionusia, naiuso nyiuhai nian nou Damari, loüh ngüso ongko amaohai lüko haküla.