Read Khiamniungan Naga Hong 18 Bible Online

Hong 18 - Khiamniungan Naga bible

Hong 18

¹Nungphiai Athena ainou apa pungekü Korint ai shin.

²Pontahai Akula nian nou Yihudahai khaiunia tsak apaüh ep. Klaudiaüh Yihudahai apem Rom ainou lüsoian ta ngiokhem kiunou shioko apa naiuso apa tsammongnyiu Priskila Itali ainou lolu shikü noiküla, nai apa ngüso dongai shin.

³Naiuso ngüsoko apa chhi tsakluphe, apa ngüsoko noikü ngüsoüh chhin, tititenai ngüso chhi nejenkhio shantsün noiküla.

⁴Yihuda Anonyi pungkü apaüh Yihuda kamthang nai mitha kiukü chim, naiuso Yihudahai si Grik hai lodangau kowe.

⁵Lüko tilai Sila si Timothi ne Makedonia ainou saom, Yisu to Khrista ta Yihudahai tü mitha kiuau Paulüh lotsüokiu.

⁶Tilai ngüso Paul thako tsümeikü ngiom, apaüh apa ne ainou ngüso thako pukhao sowankü ngüso tü ngiom, “Asam mowan nai nung thaiutha asam chija thsale louau noin! Ngü aphio tsünoi, lonai yakü ngo melemaohai dongai khu-e.”

⁷Nungtiphe apaüh ngüso wankütü sau Goa amkhamtsün Melemaohai khaiunia tsak nian nou Tita Justa tsam sübao Yihuda kamthang nouko phao-ekü noiküla, nungko apa noi.

⁸Yihuda kamthang APAOU Krispaüh apa tsamai noinso apemko aikü APAOU da monglam; loüh Korint hai piakü nou lulakü monglam naiuso limkiu.

⁹Asoh meamean tsak ko APAOU nou Paul tü ngiom, “Lahat, lüko lüchite, naiuso tsamkü lanoi.

¹⁰Tititenai ngo niko noin, naiuso ni tawaiau sauüh ni tsükome. Tititenai nung noknioko jükhaiunia piakü noin.”

¹¹Naiuso apa nungko pon tsak alei luok ngoikü ngüsotü Goa Ngio tsandekü shaman.

¹²Tilai Akaya nai Galio Nokshingpaou noiküla, Yihudahaiüh mong tsak hau thekü Paul thako tsalokü mikhem kiutsün dongai apa nialokü shikü ngiom,

¹³“Nung khaiunia nou ngiokhem tü khengshikü khaiuniahoi Goa tü amkhamau nialükhunau koweji!”

¹⁴Tilai Galioüh Yihudahai tü ngiom, Paulüh ngio chite-e ta noiküla, “Yihudahai nung atsüoting aphio suntsün chhi tsak tsüdekünai lapletsün thaiutha naito, atengting nung jü thaiutha asamko angkü noiau ayamlela.

¹⁵Lüko nung ngio nouso, nian nouso naiuso asam ngiokhem thaiutha sangetsün naito, asam chija lükhemlo. Nungsoli nou thaiutha ngo mikhem tsükiu-e!”

¹⁶Nai mikhem kiutsün thang ainou apaüh ngüso koman.

¹⁷Ngüso apemüh Yihuda kamthang APAOU Sostena thalo, küta mikhem kiutsün kengchiai apa tü shiuh, nungso thaiutha Galio intsotso ti ayangelat tsünoi.

¹⁸Paul Korint nai amonglam deisiniosoko ajekhaiu piakü shamanküta Priskila si Akula ne hakü Siria ai kheng tsak ko khuwan. Kenkria ainou kheng nai mokhukünai apaüh khaiu eiuwan, tiautenai apaüh ngiomongshing tsak lokü noiküla.

¹⁹Nung ainou ngüso Ephesa ai shin, naiuso apaüh ngüso nungko taiukiu, lüko apato pemsa Yihuda kamthang nai sungkü Yihudahai tü mitha kiukü chim.

²⁰Tilai ngüsoüh apatü ngüsoko ajekhaiu piakü noiha au koja, lüko tsümongchio.

²¹Lüko ngüso ainou pungekü ngiom, “Goa nou mongchio naito ngo asam dongai müjam shi-e.” Naiuso apa Ephesa ainou kheng nai khu.

²²Kaisaria sungngoiküta, apa sungkü donthe hau salam kiukü Antiok ai saom.

²³Nungko atao intso wankütün phiai, apa amonglam deisinioso apem oulokongkü Galatia naiuso Frukia goumchi thsatkü khu.

²⁴Nung taoko Yihudahai tsak nian nou Apolo, sau Alekandria ai chet, apa Ephesa ai shin. Apa ngiochite montsün naiuso Asiongio thanekü ngetsün khaiunia tsak noiküla.

²⁵Apaüh APAOU thaiutha ayamhan nou thakü han, naiuso apa amongchio asongting nou Yisu thaiutha atsüoting nouso thakü tsandekü ngiopeng. Tititenai apaüh Yohanüh limkiutsünlu ngekü noiküla.

²⁶Apaüh Yihuda kamthang nai mongsongkü chiteau yachu. Lüko tilai Priskila si Akula neüh apa ngio chitetsün lula, ngüneüh apa ngüso dongai nialükhun, naiuso Goa yam tekkü sasakü chim.

²⁷Tilai apaüh Akaya ai khuau yang, deisiniohoi nou apa oulokongkiu, küta apa nialoau khaiunia nouso dongai thsamsat sat. Naiuso apa shingoiküta atsüojin tsangkü amonglamhoi tü apaüh thatü hachu.

²⁸Tititenai Asiongio nou Yisu to Khrista noiküla ta chimkü apaüh Yihudahai nyung khako shiolowan.