Read Khiamniungan Naga Hong 19 Bible Online

Hong 19 - Khiamniungan Naga bible

Hong 19

¹Apolo Korint nai noi nai, Paulüh singtap thapekkü tsakeiküta Ephesa nai shisaom. Nungko apaüh sahoi ajantso epsankü

²ngüso tü sangkü ngiom, “Tilai asamüh monglam, asamüh Asio Onthso lolümo?” “Samüh Asio Onthso noin ta to alutso tsülukha” ta ngüsoüh thala.

³Nungai Paulüh ngüsotü sang, “Naito asam titi limtsün nou limkiu?” “Yohanüh limtsün nai limkiu” ta ngüsoüh thala.

⁴Paulüh ngiom, “Yohanüh limkiutsün nung sauhai angei ainou phoklekü shiji ngüso thaiutha noiküla; naiuso apaüh Israel khaiuniahoi nouso tü, apa phiai shitsün tsak nou nung Yisu da -ngüsoüh monglamau ngiom.”

⁵Tilai ngüsoüh nung lula, nungai ngüso APAOU Yisu nianko limkiu.

⁶Paulüh apa pha ngüso da thanglut naiuso ngüso dongai Asio Onthso shin, nungko ngüsoüh amaongioko chite naiuso loüh Goa ngiongem ngiopeng.

⁷Nungko ngüso apem nai chekü nime thatso noiküla.

⁸Paul, Yihuda kamthang nai sungh küta Goa nokshing ngio nouso thaiutha thalukü naiuso shiolokü alei süme ngoikü mongsongkü chite.

⁹Lüko tilai ajantso henyi naiuso angem tsülukü iulan, hoi nou khako yam thaiutha tsümeikü chite, nungko apa ngüso ainou punge, naiuso sahoi mothikü iula-ikü Turana tsam nai ajekhaiu tsütokü mitha kiukü chim.

¹⁰Nungti apa pon nime ngoikü noiphe, Asia nai Yihudahai naiuso Grikhai apemüh APAOU ngio lula.

¹¹Goa nou Paul tsangkü ii nouso mothikü chhin.

¹²Nungti Paulüh lemlu peianau kankeitsün nematso naiuso phakhut nouso akiahai dongai kankü khukü akia nouso lomeikiu naiuso angei onthso nouso koman.

¹³Nungko Yihudahai ajantsoüh APAOU Yisu nian kankeikü angei onthso nouso komanau lemkü tsakeikü noiküla. Ngüsoüh angei onthso nouso tü ngiom, “Paulüh chimtsün Yisu nianko ngo ni sungiau ngiokhem kiuji.”

¹⁴Yihudahai Akhengting Meson tsak nian Shua thsoso chinyat nousoüh nungti chhikü noiküla.

¹⁵Lüko angei onthso nousoüh ngüso tü ngiom, “Ngo Yisu ngeji, naiuso ngo Paul thaiutha ngeji; lüko asam tsüngeasam sauhai?”

¹⁶Angei onthso suntsün khaiunia nou ngüso tü thsüokü hamlutkü ngüso apem shiolowan. Ngüso apa tsam ainou müo pokü naiuso ngüso neshe chipekkankü kopkü khuwan.

¹⁷Ephesa nai kihtsün Yihudahai naiuso Melemaohai apemüh nung thaiutha lulanai; ngüso apem ahat nou mean, naiuso APAOU Yisu nian tekkü asuhat asong kiukü iula.

¹⁸Ngüsoüh ti chhikü noiküla nung khakhakü pheksankü chitekü amonglamhoi piakü shin.

¹⁹Khaiunia piakü sauhaiüh alonga chhisiya chhikü noiküla ngüsoüh ngüso thsam nouso kamshikü kankü shiküta apin khako jahwan. Ngüsoüh nung thsam mai nou apem kamkünai son tangka heng 50, 000 mai lingsankü noiküla.

²⁰Nungti APAOU Ngio oukong nai tekkü shingkü naiuso pengkü khu.

²¹Nungso thawaokütün phiai, Paulüh Makedonia si Akaya thsatkü khuküta Yirusalemai khuau yangkü ngiom, “Ngo nungai khuküta, ngo Rom lüko luau noin.”

²²Nungtiphe apaüh apa hachutsün Timothi si Erasta ne Makedonia ai hongküta, apaüh Asia shingtap nai atao laiukü noian.

²³Nungtaoko Ephesa nai APAOU yam thaiuthako angem thsüokü sung.

²⁴Tangkason langtsün khaiunia tsak nian Demetriaüh Artema menyiu goa sotsom amkham tsam shanküta nung chhisiyatsünso tsangkü amai alesan asong kankü shin.

²⁵Nungtiphe apaüh chhi nung emlu chhitsünso amaohaiko apem aikü kamkü jonküta ngüso tü ngiom, “Khaiuniaso, sam tsüomeitsün nung chhi tsangkü shiji ta asamüh ngeji.

²⁶Nung Paulüh Ephesa nailu tsüde, lüko Asia apem tüli, pha nou shantsün goa nouso tsüde, ta ngiokü tailükhunkü khaiunia piakü phoklekü khuwane ta asamüh epji, naiuso lulaji.

²⁷Sam chhi nung lonyapau angjalu tsüde, lüko goa asongting Artema amkham tsam lüko tsüvesane, naiuso Asiako apem naiuso goumchi nou amtsün apa ajinkakü alengmeitsün lüko khenge-i-e!”

²⁸Tilai ngüsoüh nung ngio nouso lula, ngüso thatü mongmat sungküta vekü ngiom, “Ephesahai ün Artema Asong noin!”

²⁹Nungai noksong nung ngem nou mean, Paul süme tsakeinai hai nouso Makedoniahai Gaya naiuso Aristarka neüh thaloküta mongtsak hau thekü alomtsün nai kopkü kamshin.

³⁰Tilai Paulüh hoi ongai napau aiu, sahoi nou apa lolao.

³¹Apa haiso shingkhan nouko ajantsoüh lüko apatü alomtsün nai napau lakowe ta kojakü apa dongai ngem hong.

³²Nungtiphe ajantsoüh ngio tsak, naiuso ajantsoüh tsak ta wen, tititenai akamshitsün angem nai noiküla, naiuso apia nou tiau chinyanji tsünge.

³³Yihudahaiüh Alekander khako thoisankü taiukiukü ngüsoüh apa hoi ainou niasan. Nai Alekanderüh pha nou lolaokü khaiunia nouso tü penkü ngio chitee ta noiküla.

³⁴Lüko tilai ngüsoüh apa Yihudahai ta seisan, apemüh gontao nime thatso sang tsak hau thekü “Yihudahai Artema Asong!” ta ween.

³⁵Tilai noksong asattsün nou hoi tsamkü iula-iküta apaüh ngiom, “Oh Ephesahai!” “Ephesahai noksong nou Artema Asong amkham tsam jimtsün naiuso sotsom nouso aün ainou saom ta tsüngekü khaiunia sau noin?

³⁶Nungtiphe ngüso thaiutha ti thaluau tsüshio-e ta ngekü asam tsamkü noiau noin naiuso ti liuliukü tsüshan nai mei.

³⁷Tititenai amkham tsam nouso ainou jengtsaiu tsolutsün tsüdekünso si sam goa tsülotsaotsünso khaiunia nungso asamüh nungai nialokü shi-e.

³⁸Nungtiphe Demetria naiuso apako chhi chhitsünsoüh khaiunia ajantso thako mi ngem nai mikhemtsün sopkü noin naiuso mikhemtsünso lüko noin, ngüso si ngüso lotsüoe-e.

³⁹Lüko asamüh ngio amao thaiutha yamshinai, nungto paopungthso hoi asaita kamtsün nai thakü kheme.

⁴⁰Tititenai lonyi ti shithawao nung thaiutha nungphiai angem nou sam phio-i-e ta ahat noin. Nung angematitsün chikü thaiutha awankiu tsünoi, asamüh nung angem thaiutha ti ayam amei kiuau tsüshio-e.”

⁴¹Nung ngioküta apaüh ngiokam wonan-in.