Read Khiamniungan Naga Hong 2 Bible Online

Hong 2 - Khiamniungan Naga bible

Hong 2

¹Tilai aopungonyi ajekhaiu nou shin, amonglamhoi nouso chikü aikü athang tsak ko kamshin.

²Nungai alekta aün ainou asheih thsüokü shitsün ngemli shin naiuso nungko ngüso kamnoitsün tsam mean.

³Nungai ngüsoüh in nou lei khekkü pengkü saotsün ep naiuso nungko noitsün khaiunia pungkü da hülut.

⁴Nungko ngüso chikü Asio Onthso nou mean naiuso Onthso nou shingio-ikü ngüso chikü amaohai ngioko chitejikan.

⁵Lo goumchi shingkhannio chikü ainou shitsün, don nai paotsangkü tsüojintsün Yihudahai Yirusalemai kihkü noiküla.

⁶Tilai ngüsoüh nung ngem lula, nungko hoi asong tsak kamshi, ngüso soisoileklek, tititenai khaiunia pungkü nou momo ngioko chitekü ngüsoüh lula.

⁷Ngüso chikü soisoileklek naiuso ngakü ngiom, “nung ngio chitetsunso apem Galilhai tsüdeso?

⁸Naito titi thekü sam pungkü nou momo ngioko lulaji?

⁹Sam Partiahai, Mediahai, Elamhai, Mesopotamiahai, naiuso Yihuda, Kapadokia, Ponta, Asiahai noin.

¹⁰Frukia, Pamfulia, Ijip naiuso Kurini lemkü noitsün Libia ajantso ainou, naiuso Yihudahai tsüdekü melemaohai, naiuso Yihudahai don thetsün Rom ainou asailotsünso,

¹¹Kret naiuso Arabiahai, Goa athanga chhi samüh sam ngioko ngüsoüh chitekü luji!”

¹²Ngüso apem soisoileklek, naiuso yangelatkü tsaküh tsak tü ngiom, “Nung ti athat alat noin?”

¹³Lüko amaohaiüh lonyaikü ngiom, “Ngüso thengshe nou tokkatiu!”

¹⁴Nungai honghoi chekü tsak nouso ongko Peter tsaküta hoi asong nou tü sangh asong nou chimau yachu: “Deisinio Yihudahai naiuso asam Yirusalem nai kihtsünso apem, ngütü anglu naiuso nung ti thaiutha ngioji ngü nung asam hau chiteko.

¹⁵Tititenai asamüh yangtsünli nungso tü theng nou tsütok, tiautenai lo lükao baji thatsolu noin.

¹⁶Lüko nung thaiutha E-po Yoel tsangkü khapiam ngio chitekü noin:

¹⁷‘Goa nou ngiom, Athon ajekhaiu nai atsüojin thso apem hau jü Onthso kheplutkiu-e. Naiuso oumhoi nousoüh atsangshei eppe, naiuso petchehoi nousoüh mea meane.

¹⁸Ah, nungso ajekhaiu nai Ngo yathsüotsün nyiuhai naiuso pohai khako Ngo jü Onthso kheplutkiu-e.

¹⁹Akhengai aün nai athanga, naiuso akhemai goh ai ii, nungti she, in naiuso inkhao Ngo han-e.

²⁰Nung asong naiuso niansong APAOU ajekhaiu moshisaokünai, aje nou nyakhem iulakü naiuso alei nou sheli aseng iulakü khu-e.

²¹Naiuso nungti noi-e, sauhaiüh APAOU nianko jone ngüso kipsane.’

²²“Deisinio Israelhai, nung ngio nouso tü anglu! Goa mongtsamtsün Khaiunia Tsak Nazarethai Yisu, asam tü chhi asong athanga naiuso ii nouso sübao tsangkü Goa nou chhin nung han.

²³Goa mongthat naiuso ayang nou Apa thumkü kiukü ngiokhem tsüngekünso pha nou apa paiphu nai lalutkü loat.

²⁴Lüko Goa nou ee oukong sokkü Apa ahkü shi-in, tititenai ee oukong nou Apa thayangau tsüshiokü noiküla.

²⁵Tititenai Davidüh apa thaiutha ngiom, ‘APAOU jükhako ngü asai ep; ngo tsüangjakü hau apa ngo shimkü noin.

²⁶Nung shioko jümongpem monglengkü noiküla, naiuso jü le monglingat naiuso loüh jüpem eantsün lüko ayangtaiu apa da aalo nai noi-e.

²⁷Tititenai ni jüpem aa ee nok nai tsütaiu-e, tsüdekünai anyih asio choiankü tsükhu-e.

²⁸Aa yam nouso ni ngü tü han, ni ngo akhako amongling nou meani-e.’

²⁹“Deisinioso, Poteng David thaiutha apa ee naiuso khanan, naiuso apa etam lonyi saokü samko noin ta ngo asam tü atsüoteng ngioau shio.

³⁰Nungti E-po tsakphe, naiuso apa le ainou tsak apa nokpao noikham nai noi-e ta Goa nou apatü thalotsün ngekü:

³¹Goa nou khaai ti chhiau noiküla, nung Davidüh ep, nungtiphe apaüh Mesia ahkü shitsün thaiutha chitekü ngiom.

³²Nung Yisu Goa nou ahkü shi-in, nung khaiunia mitha sam chikü noin.

³³Nungtiphe Goa uai loksankü Asio Onthso thaloutsün Po ainou losanküta, asamüh sübao epji naiuso luji, nung apaüh kheplutkiu-e.

³⁴Tititenai David aün ai tsüsung, lüko apaüh meshen chija ngiom, ‘APAOU nou ngü nou APAOU tü ngiom,

³⁵Ngo ni ün eh ahok khemai motaiukün lektso Ni Ngüko uai anoi.’

³⁶“Nungtiphe nung Yisu sau asamüh paiphu nai lalut, Goa nou apa APAOU naiuso Khrista iula-i ta Israel shingkhan apem nou atsüoteng lüngelo!”

³⁷Tilai ngüsoüh nung lula, ngüso mongpemai pep, naiuso Peter si amao honghoi nouso tü ngiom, “Deisinioso, samüh ti chhi-e?”

³⁸Peterüh ngüsotü ngiom, “Asam angei wan epau thaiutha asam mong lüphokle, naiuso asam khaiunia pungkü Yisu Khrista nianko khiamai lülim, naiuso Asio Onthso paopei asamüh eppe.

³⁹Tititenai asam si asam thsoso, naiuso kumai noitsün apem APAOU sam Goaüh titso apa dongai jone nungtitso thaiutha athalotsün noin.”

⁴⁰Amao ngio piakü nou apaüh mitha kiu, naiuso ngüso tü lotsüokü ngiom, “nung akaosai vetao khako angja shitsün ainou asamüh asam chija lükipsanlo!”

⁴¹Nungaih apa ngio lutsünso limkiu naiuso nungnyi khaiunia haove heng 3, 000 thatso ngüsoko velut.

⁴²Naiuso honghoi nouso achimtsün naiuso jeiaitsün nai, themtsai ngeppekkü misao saokü ngüso thatü mongkü aikü noi.

⁴³Khaiunia pungkü hat naiuso nungko athanga si ii piakü honghoi tsangkü chhin.

⁴⁴Amonglamhoi apem aikü noi, naiuso jengtsaiu apem aikü ün iula.

⁴⁵Ngüsoüh momoüh taiu nou jengtsaiu nouso jan, küta khaiunia pungkü momo pohtsün yangkü apem hau sunkiu.

⁴⁶Ngüso mongyang tsakhau thekü ajekhaiu pungkü amkham tsamai noi. Naiuso amongling nou themtsai ngeppekkü tsamai saitha mongpem nou ngüsoüh heshiu.

⁴⁷Ngüso tü khaiunia apem nou Goa hau nianlom kiukü meikü yangkiu. Naiuso ajekhaiu tsütokü amonglamtsünso APAOU nou ngüsoko haove nai halut-i.