Read Khiamniungan Naga Hong 20 Bible Online

Hong 20 - Khiamniungan Naga bible

Hong 20

¹Angem laoküta Paulüh sahoi nouso ajon hongkü ngüso lotsüoküta ngüso hau salam kiuküta apa Makedonia ai khuau punge.

²Apaüh nung goumchi nouso thsatkü yanlükhunküta ngüso hau alotsüo kiukü Grik goumchi ai shin,

³nungko apa alei süme noi. Apa Siria ai khuau khemlokü noinai Yihudahaiüh apa thako mongthat tsak that ta lulo, nungtiphe apa Makedonia thsatkü khuau thatlu.

⁴Pira thso Bereahai nou Sopater, Thesalonika hai nou Aristarka, naiuso Sekunda, Derbi hai nou Gaya, naiuso Timothi, Asia hai nou Tukika, naiuso Trofima, so apa phiai Asia saokü hoilut.

⁵Lüko nungso piamkü khukü Troa nai shamkü noiküla.

⁶Phoplao tsüthiokün themtsai sümai ajekhaiu yanlükhunkütü sam Philipi ainou kheng nai khukü ajekhaiu pungo phiai sam ngüsoko Troa nai halut, nungko sam anuojet tsak shaman.

⁷Chinyatnyi nouko asham sam themtsai ngeppekkü kamtsün akam thaiutha kamshikü noiküla. Paulüh apa nungthannyi ngüso ainou pungeau noiphe ngüsotü ah-wem saokü tsülaokü chim.

⁸Sam kamshitsün asongthon tsampai nai tson piakü sontaiukü noiküla.

⁹Nai Eutuka nian nou oum tsak koukhantso nai moknoikü niongaongam. Nai Paulüh atao laiukü chim nou shioko sailakü tsampai süme ainou apa salikü tenchu nai nung eankü noiküla.

¹⁰Lüko Paul saokü apa chiai paolutkü apa tü pipkü ngiom, “Asam shaptsün alaowan” “tititenai apa da loüh aa nou noin!”

¹¹Nai Paulüh tsampai asongthon nai laokü sungküta themtsai ngeppekkü he. Ngüsoko atao laiukü ajepektü thalutkü chite küta apa punge.

¹²Nai ngüsoüh oum khaiunia nou tsamai aa nialokü khukü ngüso mong thatü ah-lu-i.

¹³Sam kheng khako khu küta Asos ai shin, naiuso nungai Paul nialüthioau yang, tititenai apa chija hok nou keiau yangkü apaüh nungti thatlu.

¹⁴Tilai apaüh sam Asos ai pheten, samüh apa nialüthio küta Mitilini ai shin.

¹⁵Nungthan nyi kheng nai khukü Kia shimkü shisao, nenyi nai Samos sao, naiuso nung ajekhaiu yanküta sam Milita ai shin.

¹⁶Tititenai Paulüh Asia nai atao tsüwankü hau Ephesa kumkü kheng nai khuau apa mongchiosankü noiküla. Shionaito aopungonyi sümai apa Yirusalem nai noikü theau liuliukü noiküla.

¹⁷Milita ainou Ephesa nai noitsün donthe petchehoi dongai Paulüh apako pheteau ngiongem tsak hong.

¹⁸Tilai ngüso shingoin apaüh ngüso tü ngiom, “Ngo Asia shingtap nai jühok ngamthiotsün ayanyi yanou lonyi saokü asamko atao apem nai titi noiküla nung asamüh ngen.

¹⁹Thatü ehenlüshi nouko, niochekhiam saotsün nouko, naiuso Yihudahai mongthat tsangkü jüdongai angja shitsün nouko, ngü titi APAOU yathsüo nung asamüh asam chija ngen.

²⁰Asam hachukü ngü asam tü nyung nai naiuso tengkhaiu nai chimkü naiuso tsandekü shitsün ko ngo titso tsangpokkü tsütaiu ta asamüh ngen.

²¹Naiuso Goa dongai mongphokleau si sam APAOU Yisu Khrista dongai mongphokleau thaiutha Yihuda si Grik hai tü ngü mitha kiu, nung lüko asamüh ngen.

²²Naiuso lo ngo Asio Onthso nou tü angio angkü ngü tü nungai ti thawao-e nung tsüngekü Yirusalemai khuji.

²³Noknio pungkü nai jüthaiutha au akhotsam si angja nou taiuji ta Asio Onthso nou lotsüotsünlu ngü ngen.

²⁴Lüko ngo athattaiu nou thasaoau thaiutha, naiuso Goa atsüojin Ngem Amei thaiutha mitha kiuau APAOU Yisu ainou ayathsüoau lusantsün khemloau thaiutha shan, ngü jüpem aa nou jüchija chaiou ta ti vesankü tsünoi.

²⁵Lo, asam sauhai ongko ngo Goa nokshing thaiutha chimkü tsakei, loto asam apemüh jükha tsüepshi-e ta ngo ngen.

²⁶Nungtiphe ngo lonyi nung ajekhaiuko kojakü ngioji: “Asam ajantso mowan nai, nung ngü tsünge.

²⁷Tititenai ngo asam tü Goa mongthat apem chimtsün ainou tsülaplap.

²⁸Nungtiphe Asio Onthso nou asamüh paotsangau Onnemok hoi sübao taiukium nungso chiai asamüh jiokü lünoi. APAOU nou meshen Thso ün she tsangkü meshen ün shan nung Goa donthe tü lüjim.

²⁹Ngo pungekütün phiai, ahating chiu nouso Onnemokhoi tsüpoishikü heau asam ongai nappe ta ngü ngen.

³⁰Asam hoi ong ainou khaiunia ajantsoüh yaang ngio chitekü amonglamhoi nouso ngüso phiai nialokü khuwane nung atao nou shi-e.

³¹Nungtiphe pon süme chikü asam khaiunia pungkü tü niochekhiam saokü ngü ah-nge ah-nya tsülaokü tsande ta yangsankü asamüh jiokü lünoi.

³²Sübao nou asam shejikan-iau shioji naiuso Goa nou apa khaiuniaso thaiutha oukkiuji, nung lo ngü asam Goa ün onnemok paotsangau thoilutji.

³³Ngü sau khaiunia ün chaiou tangkason sheitho tsüdekünai neshe tsüchinek.

³⁴Jüpha nou ngüko ha nouso naiuso ngo pohkü noitsün alum epao ngo yathsüo ta asamüh asam chija ngen.

³⁵Nungti shankü asamüh outsükongkünso tü hachuau noin ta naiuso APAOU Yisuüh, “alotsün koto akiutsün tekkü ouk,” ta apa chija ngiotsün ngio nouso yangsanau thaiutha ngü asam hau apem nai athatluau tsak kiu.

³⁶Tilai Paulüh nung ngio chitekhem, apaüh ngüsoko singkao langthiokü misao sao.

³⁷Ngüso apemüh apa tü apungeau pipkü son nai chep, naiuso shapkü noiküla.

³⁸Apaüh ngüso tü apa tilaitso tsüepshi-e ta ngio nou shioko ngüso mothikü mongsaiukü noiküla. Nungti ngüso apako hakü kheng nai nap.