Read Khiamniungan Naga Hong 21 Bible Online

Hong 21 - Khiamniungan Naga bible

Hong 21

¹Samüh ngüso tü meikü lükhu ta ngiokü punge. Kheng nai saitha khuküta, sam Kos ai shin, nungthannyi nai samüh Roda shisaom, naiuso nung ainou sam Patara saokü khu.

²Nungko samüh Foinika ai khuau kheng tsak epkü, nungko sam naploküta shilokü khuwan.

³Samüh Kupra khiamjet epküta nung thsatkü ajepekki nai noitsün Siria ai khu. Nung ainou sam Tair ai khu, tiautenai nungai kheng thsa yamanau noiküla.

⁴Nungko samüh sahoi ajantso epkü ngüsoko ajekhaiu chinyatnyi shaman. Nai nungso sahoi nou Onthso tsangkü Paul tü Yirusalem nai apa hok tsüngamthiokü hau noin ta ngiom.

⁵Lüko tilai sam ngüsoko noihatsün atao yankü shin, sam ngüsoko pungekü sam yamai khuwan. Nungko thsohai si nyiuhai ko ngüso apem noksong moyanlükhunkün lektso sam yanthio, nungko sam apemüh kauthiokü misao sao.

⁶Nungai sam meikü lüyasai ta tsak si tsakko salam kiu-eküta sam khengnai nap naiuso ngüso tsamai laokü yakhu.

⁷Sam Tair ainou kheng nouko khutsün thonküta Tolemai shisaokü deisinioso hau salam kiukü ngüsoko ajekhaiu tsak shaman.

⁸Nungthannyi nai sam pungekü Kaisaria ai shin. Nungai achimtsün Philip sau dikon chinyat ongko tsak noiküla, sam apa tsamai sungkü shaman.

⁹Nung khaiunia thso meso asangting Goa khapiam ngio chitetsün püle noiküla.

¹⁰Nungko sam ajekhaiu piakü shamnoi nai, Yihuda ainou Agaba nian nou E-po tsak saom.

¹¹Apa sam dongai shiküta, Paul ün omkhi loküta apa phasihok kekü ngiom, “Asio Onthso nou nungti ngioji, nung omkhi sau ün noin, nung khaiunia nou Yirusalem nai Yihuda haiüh nungti ke-e, naiuso Melemaohoi pha mongko thumkü kiu-e.”

¹²Tilai samüh nung lula, sam si nungai noinsoüh apatü Yirusalemai tsüsungau koja.

¹³Nungai Paulüh thalakü ngiom, “Asamüh tiau shapkü jümong lothe-iji? Tititenai ngo ke-iaulu tsüde, lüko APAOU Yisu nian thaiutha Yirusalem nai eao lüko khemlokü noin.”

¹⁴Tilai apa lolaoau tsüshio sam laokü ngiom, “APAOU mongchio lüthe.”

¹⁵Nung ajekhaiu nouso yanküta, samüh sam thsa kankü Yirusalemai sungh.

¹⁶Kaisaria ainou lüko sahoi ajantso samko khuha naiuso sam sansaoau noitsün khaiunia nou tsamai nialükhun. Nung Mnason, sau Kupra ainou piamkünai yakü amonglamtsün khaiunia tsak noiküla.

¹⁷Tilai sam Yirusalem nai shingoi, amonglam deisiniohoi nousoüh sam monglingkü lou.

¹⁸Nungthannyi Paul Yakob dongai khu; naiuso nungai petchehoi apem kamshikü noiküla.

¹⁹Apaüh ngüso hau salam kiuküta, apa tsangkü Melemaohai ongko Goa nou chhitsün apem ngiom.

²⁰Apa ngio angkütün phiai ngüso chiküüh Goa hau nianlom kiu. Nai ngüsoüh apatü ngiom, “Deisinio Paul, Yihudahai ongko amonglam nai heng titso naiuso Ngiokhem nou ta ngüso chikü nou titi mong thumkü kiu nung ni eppe.

²¹Melemaohai ongko noitsün Yihudahai apem tü ngüso thsoso tsütippane tsüdekünai don nai tsütsakeiau ngiokü ni Mosa wanau chiteji ta athaiutha ngüso hau ngela-i-e.

²²Naito titi the-e? Ni shikü noin ta ngüsoüh atsüoting lula-e.

²³Nungtiphe samüh ngiotsün nung ni lükankei. Vesankü noitsün khaiunia püle samko noin.

²⁴Ngüso niakü lükhu, küta ngüsoko achija lülosiolo, küta ngüso khaiu iuwanau lümeikü ni ngüso thaiutha tangka lükiu. Nungaito ti athaiutha ngüso tü ngela-ikü taim nung yaang, naiuso ni lüko ngiokhem kankeikü thakü tsakeiji ta apemüh nge-e.

²⁵Lüko monglamkü noitsün Melemaohai thaiutha to sotsom nouso hau thiotsün chaithio jengtsaiu ainou, athippattsün ainou, naiuso tsütsamtsütsüokü ainou pungekü lünoi ta sam ngemlo nou satkü kiu.”

²⁶Nungtiphe Paulüh khaiunia nouso niakü nenyi nai ngüsoko alosiotsün atao shan. Nai apa Amkham Tsamai sungkü ngüso khaiunia pungkü thaiutha aa chaithio thio-i, nung alosiotsün atao mothonkün lektso ajekhaiu titso noi-e nung nge-in.

²⁷Tilai ajekhaiu chinyatnyi nou thonjikan, Asia ainou Yihuda haiüh amkham tsamai apa epkü hoi apem ngemat-in.

²⁸Ngüsoüh vekü ngiom, “Israelhai!” “Ahalu! Mosa Ngiokhem naiuso nung Amkham Tsam nai Israel khaiunia apem thako apemai chitekü tsakeitsün nung khaiunia nou noin. Naiuso lo lüko apaüh Melemaohai ajantso nung Amkham Tsam nai niakü shiküta nung Asio Thang nou longei-iu!”

²⁹(Ngüsoüh Paulko Ephesahai Trofima noknio nai hakü ep, naiuso Paulüh apa Amkham tsam mongai nialokü napiu-e ta yangküta nung ngiom.)

³⁰Noknio apem ngem nou mean, naiuso khaiunia apem shakta kamshin, nungko ngüsoüh Paul thaloküta Amkham Tsam ainou kengchiai tenshi-an. Alekta Amkham tsam kou nouso kiappan.

³¹Nungti ngüsoüh apa loatau kowenai, Yirusalem apemai angem noin ta petchehoi dongai ngem shin.

³²Nungailu apaüh apako ehü nouso naiuso tsom khako APAOU nouso niakü ngüso dongai kopkü shin. Tilai ngüsoüh ehü naiuso petche nouso ep, Paul tü shiuhtsün lao.

³³Nungaih petche nou shimkü shiküta apa tü pha nou lah, küta apa ta sonkhiang auo nime nou ke-au ngiokhem kiu. “Apa sau naiuso apaüh ti chhin?” ta apaüh sang.

³⁴Hoi ongko ajantsoüh in tsak, naiuso ajantsoüh in tsak ta vekü ngiom. Tilai angem nou atsüoting ngio lulaau tsüshio, apaüh apa ehü tsamai niakü sungau ngiokhem kiu.

³⁵Tilai apa hokthengphu nai sungh, hoi nou thatü ha nou shioko, ehü nousoüh apa kankü sungau iula.

³⁶Ngüso apemüh apa phiai, “apa lüloat!” ta vekü hoilut.

³⁷Paulüh ehü tsamai niakü napau taoko petche tü ngiom, “Ngü nihau tso tsak chiteko sai?” Apaüh thalan, “Ni Grik ngen süne?”

³⁸“naito kümi khaiunia loatküta heng püle ngemat-ikü liutsa ai niakü khutsün Ijip hai nou ni lemo?”

³⁹Lüko Paulüh thashin, “Ngo Kilikia nai Tarsahai Yihuda khaiunia tsak, yaang noksong nokpao tsaklu to tsüde. Ngü hoi nou tü ngio chiteau ngü tü angio ta nitü kojaji.”

⁴⁰Süpai ahei nou apa hau angioau ayam sopkiu, nungtiphe Paul tsaküta apa pha nou lahkü khaiuniahoi nouso tü tsamkü noiau ngiom. Tilai ngüso tsamkü iula, Paulüh ngüso tü Ibri ngio nai chite: