Read Khiamniungan Naga Hong 22 Bible Online

Hong 22 - Khiamniungan Naga bible

Hong 22

¹“Jü deisinioso Yihudahai, Ngo lo asam khako ngo pentsün ngio ngioko, ang sai!”

²Tilai apaüh Ibri ngio nai ngüsotü chitetsün ngüsoüh lula, ngüso tekkü tsamkü iula, naiuso apaüh ngiom:

³“Ngo Yihudahai tsak noin, Kilikia Tarsa noksong nai chet, naiuso nung noksong nai ngo song; Gamaliel khemko sam paosiposo ahatsün ngiokhem thaiutha chim, naiuso lonyi asam apemühli ngo Goa thaiutha thatü mongchiokü noiküla.

⁴Nung yamai tsakeitsünso khaiunia ee saokü omhe-in. Naiuso ngo pohai si nyiuhai thaloküta akhotsamai thio.

⁵Nung thaiutha Akhengteng Meson naiuso petchehoi lüko jü mitha noin. Ngüso ainoulu ngo deisinioso dongai thsam nouso lusan, naiuso nungai noinso lohatau thaiutha Yirusalemai kekü kankü shiau ngo Damaska ai khu.

⁶“Nai ngü tilai Damaska shimkü shisaom, ahnyi taoko alekta ngo lemkü aün ainou awon asong tsak thsalut.

⁷Nungaih ngo goh ai salian, naiuso sangh tsaküh ngütü chitekü ngiom, ‘Saul, Saul! tiau ni ngo omhe-iji?’

⁸Ngü thalan, ‘APAOU, ni sau?’ Nai apaüh ngütü ngiom, ‘Ni omhe-itsün Nazarethai nou Yisu Ngo.’

⁹Nai ngüko hansoüh awon nou atsüoting ep, lüko sauüh ngü tü chite apa sang ngüsoüh tsülula.

¹⁰Nai ngü ngiom, ‘APAOU, ngü ti chhi-e?’ APAOU nou ngü tü ngiom, ‘Atsalo, küta Damaska ai lünap. Athaiutha tilüsong chhiau thatsankü noin, nungso apem thaiutha nungai ni tü ngio-e.’

¹¹Tilai nung awon ajinka nai ngo thapau tsüshio, ngüko hanso pha nou jungkü ngo Damaska ai nap.

¹²Ngiokhem nai ngiotsün shikü don nai tsüojintsün naiuso nungai noitsün Yihudahai apemüh lomsankü chitetsün khaiunia tsak Anania jüdongai shin,

¹³naiuso apa ngü shimkü tsaküta ngiom, ‘Deisinio Saul, Goa nou müjam nihau epiji! Nungailu ngü apa ep.

¹⁴Apaüh ngiom, ‘Sam paosiposo Goa nou apa mongchiotsün ngeau, naiuso Asio nou epau, naiuso apa son ainou sangh tsak lula au, ni shingsaniu.

¹⁵Tititenai ni tilüsong epe naiuso lula-e, nung thaiutha khaiunia apem khako mitha nou ni the-e.

¹⁶Ni lo tiauta tsangkü noiji? Atsalo, naiuso apa nianko khiamai lülim, naiuso apim angei lütsaowan.’

¹⁷“Ngo Yirusalemai laokü shin, naiuso tilai ngo Amkham Tsamai misao lokü noiküla, ngü atsangshei tsak ep,

¹⁸apaüh ngü tü ngiom, ‘Lo Yirusalem ainou shakta lükhu, tititenai ngüsoüh ni ainou jüthaiutha mitha tsülo-e.’

¹⁹Nai ngü ngiom, ‘APAOU, Yihuda kamthang pungkü nai ni tü monglamtsünso ngo akhotsamai khothio naiuso shiuh ta ngüsoüh meikü ngen.

²⁰Tilai athaiutha mitha kiutsün Stephan she jatsan, ngo lüko shimkü tsakü jümong tsamkü noiküla, naiuso apa loattsünso neshe ngo shimkü noiküla.

²¹APAOU nou ngütü ngiom, ‘Lükhu,’ ‘tititenai Melemaohai dongai laiukü nai ngü ni honge.’”

²²Nai nung ngio ngiotsün ngüsoüh ang, naiuso sang asong nou vekü ngiom, “Nungtin khaiunia to goumchi ainou lükanlükhun! tititenai apa aa noiau tsümai!’”

²³Nai ngüsoüh vekü ngüso ne wan, naiuso maou ai pu soksan nai,

²⁴petche nou tiau ngüsoüh apa thako veen nung ngeau thaiutha naiuso apa da shiuhkü ngio sangau apa ehü tsamai niakü sungau ngiokhem kiu.

²⁵Nungaih ngüsoüh apa nyikhun auo nou keküta Paul shimkü tsakü noitsün tsom khako APAOU tü ngiom, “Ni Romhai tsak, sau aphio tsükiu, apa tü shiuh au ayam noi süne tsünoi?”

²⁶Tilai aniakei nou nung lula, apa tsom khako APAOU dongai khuküta nungti sang: “Ni ti chhiji? Nung khaiunia nou Romhai paopung tsak noin!”

²⁷Nungtiphe tsom khako APAOU nou Paul dongai khukü apa tü sang, “Ni Romhai paopung tsak süne, ngü hau achite?” “Ah,” ta Paulüh thashin.

²⁸Tsom khako APAOU nou ngiom, “Ngo chai piakü kiukü paopung tsak iulan.” “Lüko ngo to achet aita Rom paopung,” ta Paulüh thashin

²⁹Nungai sauhaiüh apa tü ngio sangau noiküla, nungailu ngüso apa ainou khuwan. Tilai aniakei nou apa Romhai ta ngela, apa hatkü iula, tiautenai apaüh Paul ke-ikü noiküla

³⁰Lüko nungthannyi nai Yihuda haiüh apa aphio kiutsün nung khakhakü ngeau aiukü asong khaiunia nou Paul soktham. Nai Akhengteng mesonhoi nouso naiuso achosanhoi nai noinso apem aikü kamau apaüh ngiokhem kiu, naiuso Paul nialokü ngüso khako taiukiu.