Read Khiamniungan Naga Hong 24 Bible Online

Hong 24 - Khiamniungan Naga bible

Hong 24

¹Ajekhaiu pungo noikütün phiai petchehoi ajantso naiuso Tertula nian nou ngiolekü chitetsün khaiunia tsak nouko Akhengteng Meson Anania saom, naiuso ngüsoüh Paul thako Nokshingpaou Felik dongai ngio nou kan.

²Tilai Tertula jon, apaüh Paul phiu-ikü ngiom; “Apem tü asongteng! Felik, ni tsangkü samüh aalu asong epnou shioko, naiuso ni nung thaiutha paotsangtsün nou tsümeikü nou lothakiu nou shioko,

³samüh nung yam apemai naiuso apemai thatü mongtsamkü lusanji.

⁴Lüko ngo loüh ni tsümongthon-iau thaiutha nitü kojaji:

⁵Tititenai nung asiusong kiutsün khaiunia tsak, naiuso goumchi apemai Yihudahoi nouso apem loksantsün tsak, naiuso Nazarin hoi aniakeitsün atengting tsak ta samüh epkü shi-iu.

⁶Nungtü simkü apaüh amkham tsam longeiau kowe, küta samüh thalo.

⁷Lüko Lusia aniakeitsün nou shin, naiuso sam ainou apaüh angem thsüokü lusan. Nungphiai Lusiaüh apa phiu-itsünso asam khako shiau ngiokhem kiu.

⁸Samüh ti thako apa tsüo-i, nungso apem ni achija apa lilukü ngeau shio-e.”

⁹Nai Yihudahoi nousoüh lüko nung atsüo ta ngiokü, apa tsüo-itsün nouko hakü tsa.

¹⁰Nai nokshingpaou Feliküh Paul hau chite-iau pha nou panküta apaüh thala, “Pon piakü nung mele thaiutha ni mikhem kiutsün tsak thekü shiji ta ngü nge nou shioko, ngü ngo pentsün ngio ngioau monglengji.

¹¹Tititenai ngo Yirusalemai amkhamau sungküta lonyi nou ajekhaiu chekü nime tü simkü mokhu ta ni ngeau shio.

¹²Amkham tsamai lüko, Yihuda kamthang nai lüko, naiuso noknio nai lüko ngü sauko ngematkü, tsüdekünai ngematikü ngüsoüh tsüep.

¹³Naito lo tiau ngüsoüh ngü tsüo-iji, nung ni tü ngiotsüo ta hanau tsüshio.

¹⁴Lüko ngiokhem nai noitsün ngio nousoli, naiuso E-po thsam nai tilüsong satkü noin, nungso apem monglamkü ngüsoüh sübao tü hoi ta jonji nung yamli ngü sam paosipo Goa yathsüoji, nungto ngü nitü thalouji.

¹⁵Naiuso asiohoi si chaithe suntsün hoi nemtso ahkü shi-e ta ngüsoüh lüko yangkü noitsünli, ngü Goa da yangji.

¹⁶Nung thako Goa naiuso khaiunia dongai asai mongyang amei taiuau thaiutha ngü lüko jüchija koweji.

¹⁷“Yirusalem ainou pungeküta pon intso phiai, jümele thaiutha tangka ajantso loküta aa chaithio kiuau ngü nungai khu.

¹⁸Nungso kiukü noinai ngüsoüh amkham tsamai ngo losiotsün ep, lüko hoi nouko tsüde, tsüdekünai loüh ngematkü tsüde. Lüko Asia nai Yihudahai ajantso noiküla;

¹⁹ngüsoüh jüthako ngiongem naito, nungai adongai shi-ela, naiuso ngüsoüh ngüso chija ngo tsüo-i-ela.

²⁰Nung tsüdekünai tilai ngo achosanhoi khako tsakü noiküla,

²¹nung ee nouso ahkü shitsün thaiutha lonyi asam khako jüngio mikhemji ta sübao ngio nou ngüso ongko tsaküh veen, nungtü simkü ngüsoüh ti aphio ep nungso thaiutha ngüso chija angio-i.”

²²Lüko Feliküh yam nou thaiutha loüh atsüoting ngekü, ngüso ngio jam lao-ekü ngiom, “Tilai asongting Lusia sao-e,” “ngü asam mikheme.”

²³Apaüh tsom khako APAOU tü apa akhotsamai taiu-ela, lüko apaüh mongchiotsünli lüthe-i, naiuso apa hai saulünou apa yathsüoau lalolao ta ngiokiu.

²⁴Lüko ajekhaiu intso yanlükhunkütünai, Felik apa tsammongnyiu Yihuda nyiuhai nou Drusila hakü shin, naiuso Paul jonthiokü Yisu Khrista da amonglam thaiutha apa ainou ang.

²⁵Naiuso amei nou meshen chija taimetsün, naiuso ashiau mikhem thaiutha apaüh mitha kiukü chitenai, Felik thatü hatjikankü thala, “Lo thaiutha to nungti lükhu, ngo atao amei tsak ko ni jüdongai jonko.”

²⁶Paulüh apa hau tangka kiu-e ta apaüh yang nung thako apa jonau honglutkü apako ngio chitelu.

²⁷Pon nime yanküta phiai, Porshia Festaüh Felik nokshingpaou noithang lilo. Feliküh Yihudahai ainou atsüojinyang epau aiu nou shioko apaüh Paul akhotsamai taiu.