Read Khiamniungan Naga Hong 25 Bible Online

Hong 25 - Khiamniungan Naga bible

Hong 25

¹Nungtiphe Festa nung goumchi ai shikü, samnyi noiküta, apa Kaisaria ainou Yirusalemai sungh.

²Akhengteng mesonhoi nouso naiuso Yihudahai atengting khaiuniahoi nou apa hau Paul thako ngio nge-in.

³Ngüsoüh apa yamai loatau thaiutha mongkhemkü thatkü apaüh Yirusalemai jonkü shiau ngüsoüh apatü ngiokhem saolo.

⁴“Nungti lüko Festaüh Paul Kaisaria nai khothiokü noin naiuso nungai apa laiukü tsünoikü khu-e ta thatkü,

⁵apaüh ngiom, nungtiphe asam ongko sauhai atengting khaiuniahoi noin ngüso ngüko asao-i, naiuso khaiunia nou ta tso tsak lüko aphio noinai, ngüsoüh apa aphio lüthe.”

⁶Festa ngüso ongko ajekhaiu petjei tsüdekünai che nyi shamküta Kaisaria ai khu. Nungthannyi apa mikhem noikham nai moknoi, küta Paul niakü shiau ngiokhem kiu.

⁷Tilai apa shin, ngiotsüo ta hanau tsüshiokün ngio nouso piakü apa thako kankü shikü Yirusalem ainou shitsün Yihudahai apa lemkü tsa.

⁸Nungai Paulüh apa penkü ngiom, “Yihudahai ngiokhem thako lüko, amkham tsam thako lüko, tsüdekünai Kaisar thako lüko ngü intso lüko aphio tsülep.”

⁹Lüko Festaüh Yihudahai mongling-iau aiukü Paul tü thalakü ngiom, “Ni Yirusalemai sunge küta nungai jükhako nungso mikhemau mongchiokü noimo?”

¹⁰Paulüh thashikü ngiom, “Nokshingpaou khako mikhemtsün kengai tsakü noin, nungai ngü tü lilu-e. Ngo Yihudahai tü ti aphio tsüchhi, nung asamüh asam chija meikü ngen.

¹¹Ngü ngiokhem lotheankü noinai, naiuso tso angjakü eau maikü chhitaiu nai, ngü nungko asoloau tsüngio-e. Lüko ngüsoüh ngü thako ngiokantsün atsüo tsüdekünaito, sauüh ngüso hau ngo thumkü kiuau tsüshio. Ngü Kaisar saokü chite-e.”

¹²Nungai achosanhoi nousoko ngemloküta Festaüh thala, “Ni Kaisar saokü chiteshi-e ta ngio-iu, ni Kaisar saokü khuau noin.”

¹³Atao intso khukütünai, nokpao Agriba naiuso Bernika ne Kaisaria ai saoküta Festa hau salam kiu.

¹⁴Nungai ngüso ajekhaiu piakü shamkü noinai, Festaüh nokpao khako Paul ngio thaiutha kankü ngiom, “Feliküh nungai khaiunia tsak akhotsamai taiukiuküta khuwan.

¹⁵Apa thaiutha ngo Yirusalemai noinai, Yihudahai akhengteng mesonhoi naiuso petchehoi nousoüh ngütü ngio nge-ikü, apa thako mikhemau sang.

¹⁶Atsüo-itsünsoko khasikha phetekü ngio thaiutha mipao nou apa tsüo-itsün naiuso pentsün chiteau atao amei moepkün lektso khaiunia sau thumkü kiuau Romhai sai nai tsünoi ta ngü ngüso tü ngiom.

¹⁷Tilai ngüso nungai aikü kamkü noiküla, ngo tsütsangkü lühomli nailu mikhemtsün nai moknoi, küta khaiunia nou niakü shiau ngiokhem kiu.

¹⁸Lüko tilai apa tsüo-itsünso tsa, ngü yangtsünli tsümeikü ngio thaiutha ti atsüo-itsün ngüsoüh kankü tsüshi.

¹⁹Lüko ngüso meshen don thaiutha ngio ajantso, naiuso Yisu sau een lüko Paulüh aa noin ta ngiom, nungtin thaiuthalu apa thako ngio ngiom.

²⁰Ngü nungso thaiutha titi ngio yame, soisoileklekkü apa Yirusalemai khukü nungai nungso mikheme süne ta sang.

²¹Lüko Paulüh nokpao mikhemtsün taiukü chiteshi-e ta ngioküta, ngü apa Kaisar dongai mohongkün lektso taiukü noiau ngiokhem kiu.”

²²Agribaüh Festa tü ngiom, “Ngo lüko jüchija khaiunia nou ngio angluau aiujilünja.” Festaüh ngiom, “Ni lühom apa ngio lula-e.”

²³Nungtiphe lühomli nai Agriba si Bernika ne thatü ajinka nai shikü noiküla, naiuso ngüsoüh asongting petche nouso si noksong nai atengting khaiunia nousoko ngio angtsün nai Festa ngiokhem nou Paul niakü nap.

²⁴Festaüh ngiom, “Oh Agriba nokpao, naiuso nungai samko hakü noitsün khaiunia apem, Yirusalem nai naiuso nungai lüko Yihudahai apem nou apa loto aa tsünoi-ela ta vekü jüdongai ngio kan, nung khaiunia asamüh epji.

²⁵Lüko eau maikü apaüh ti tsüchhi ta ngo ep, naiuso apaüh meshen chija nokpao Kaisarko chiteshi-e ta ngio nou shioko, ngü apa hongau mongchiosan.

²⁶Lüko apa thaiutha nokpao dongai ngü ayam ngio titso tsüsat. Nungtiphe liluküta ngü tsotsaklu lüko asatau lümeikü sungesao ta thekü, asam dongai naiuso tekkü adongai ngü apa niasaniu, Oh Agriba nokpao!

²⁷Tititenai akhotsamai noinso tsak hongnai, apa thako tsüo-itsünso hau tsüngela-kü hongau to mongyang tsünoi ta ngo yangji.