Read Khiamniungan Naga Hong 26 Bible Online

Hong 26 - Khiamniungan Naga bible

Hong 26

¹Agribaüh Paul tü ngiom, “Ni achija athaiutha chiteau ngioji,” Nungai Paulüh apa pha lukü apa pentsün ngio chitejikan:

²“Oh, Agriba nokpao! Yihudahaiüh ngü ti thako tsüo-in, nung apem thaiutha lonyi akhako ngü pentsün ngio chiteau epnou shioko,

³tekkü Yihudahai don asangtsün apem nai ni apotha shioko, ngü jüchija kümi ta yangji, nung thako ni jiokü angau kojaji.

⁴“Ngo methso ainou jümele ongko naiuso Yirusalem nai titi noikü shin, nung Yihudahai apem nou ngen.

⁵Ngüsoüh jüthaiutha aya ainou ngekü titi sam don achektinghoi nai ngo Farisi tsakli noikü shin, nung ngüsoühlu mongchio nai, mitha kiuau shiom.

⁶Naiuso lo sam paosipo tü Goa nou thalotsün sübao epau yangkü,

⁷sam mele chekü nime nou anyi asoh Goa tü amongchio nou yathsüoji, nung ayangtsün thaiutha jüngio mikhemau ngo nungko tsakü noin. Naiuso Oh Nokpao, nung ayangtsün thaiutha Yihudahaiüh ngo tsüo-iji!

⁸Asam nungko noinsoüh Goa nou ee nouso ahkü shi-itsün tü monglamau tiau tsüshioji?

⁹“Ngo Nazaret hainou Yisu nian thako chhi piakü chhiau ayam ta atsüoting ngü jüchija yangkü noiküla.

¹⁰Nung Yirusalem nai lüko ngo chhin, naiuso akhengteng mesonhoi ainou oukong saolokü asiohoi piakü ngü akhotsamai khothio, naiuso tilai ngüso ean-in, ngü ngüso thako pha loksan.

¹¹Yihuda kamthang apemai piaküjam ngüso lohatkü ngü ngüso hau Goa lotsaotsün ngio chite-iau kowe, küta ngüso tü thsüokü mongmat sungkü Melemao noksong nouso ai lüko ngü ngüso omhe-in.”

¹²“Ngü akhengteng mesonhoi ainou oukong naiuso ngiokhem lokü donthehoi angja omhe kiuau thaiutha ayangtaiu nou Damaska ai khukü noiküla.

¹³Oh Nokpao, anyi yam nai aje tü simkü ajin oukü awon tsak aün ainou ngo naiuso ngüko hakü khutsünso lemkü thsaluttsün ngü ep.

¹⁴Tilai sam apem goh ai salikü noiküla, Ibri ngioko sang tsaküh ngütü chitetsün lula, ‘Saul, Saul! tiau ni Ngo omhe-iji? Jangtsopong tsaküh apa APAOU ün pailai tü chaiutsün khekkü, ni achija phiai meshen tülu chaiulokü tawailoji.’

¹⁵Ngü sangkü ngiom, ‘APAOU ni sau?’ Nai APAOU nou thashin, ‘Ni omhe-itsün Yisu Ngo.

¹⁶Achu, ahoküh ngamkü atsa, tititenai ti ngio nouso nai ni Ngo epe, naiuso ti ngio nouso nai Ngo adongai sunge, nungso thaiutha ni ayathsüotsün tsak naiuso mitha kiutsün tsak theau Ngo adongai sungiu.

¹⁷Israelhai naiuso Melemaohai dongai Ngo ni honge naiuso ni ngüso ainou kipsane.

¹⁸Ngüsoüh angei wankiutsün naiuso ngü da amonglam nou losiotsün ongko, tengkam loau thaiutha, naiuso anyakhem ainou awon dongai, naiuso Biya oukong ainou Goa dongai ngüso phokleau, ngüso niovei losatkiuau Ngo ni ngüso dongai hongji.’

¹⁹“Nungthako Agriba Nokpao, ngü atsangshei aün ainou eptsün tü angem tsülukü theau tsüshio.

²⁰Lüko aya Damaska nai, Yirusalem nai, naiuso Yihuda goumchi apemai, naiuso Melemaohai tü lüko, ngüso mong Goa dongai phokle-iau chhi nou maikü chhi-ela ta ngü ngiopengkiu.

²¹Nung shioko Yihudahaiüh ngo amkham tsamai thalo, naiuso ngo loatau kowe.

²²Nungtiphe Goa ainou shitsün ahachu lusanküta Khrista titi omhe-ela, naiuso ee ainou ahkü shitsün nou Yihudahai si Melemaohai nemtso tü awon apaüh ayanai titi ngiopengkiu-ela:

²³nung thaiutha asonghai si ehenhai tü ngü mitha kiukü E-po nouso naiuso Mosaüh ti thawao-e ta ngiom, nung tü simkü ngo amao titso tsüngiokü lonyi saokü tsaji.”

²⁴Apaüh nungti apentsün ngio chitenai, Festaüh sang asong nou vekü ngiom, “Paul, ni waiwai! thatü ngelo nou ni waiwai iula-iji!”

²⁵Lüko Paulüh thashikü ngiom, “Apem chiko asongting Festa! ngo waiwai tsüde, lüko ngo ngiotsüo naiuso khaiuniatsüo ngiolu chiteji.

²⁶Tititenai nokpao sauko ngo khakhakü chiteji, apaüh nungso thaiutha ngeji. Tititenai nungso ngio titso apa ainou tsangkü tsütaiu ta ngo monglamji, tiautenai nung akau ai tsüchhi.

²⁷Oh Agriba Nokpao! ni E-po nouso ngio da monglamjimo? Ni monglamji ta ngü ngeji!”

²⁸Nungai Agribaüh Paul tü ngiom, “Atao letletkü nouko, ni ngo Khristan iula-iau kowejiso?”

²⁹Paulüh ngiom, “Atao letletkü noulu lüko, ngio piakü nou lüko, nilu tsüde, lüko loüh lonyi jüngio lulatsün apem, nungso aketsün tü simkü, ngüso ngo khekkü iula au ngü Goa tü misao saoji!”

³⁰Nungai nokpao, nokshingpaou, Bernika naiuso ngüsoko moknoitsünso tsa

³¹kü tilai ngüso soikü khukü ngüso si ngüso chitekü ngiom, “nung khaiunia nou eau tsüdekünai akhotaiuau tinkü ti tsüchhi.”

³²Naiuso Agribaüh Festa tü ngiom, “nung khaiunia nou Kaisar saokü chiteshi-e ta tsüngio tünto, apa yaang sokkau lüko shio-ela.”