Read Khiamniungan Naga Hong 27 Bible Online

Hong 27 - Khiamniungan Naga bible

Hong 27

¹Tilai sam Itali ai kheng nouko khuau mongchiosan, ngüsoüh “Agusta ehühoi” ainou tsom khako APAOU tsak nian nou Julio hau Paul naiuso akhotsamai noinso amaohai ajantso thumkü kiu.

²Asia nai sheasong ai khuau khemtaiukü noitsün Adramitia ainou kheng tsak ko sam noiküta shilokü khu. Makedoniahai Aristaka, Thesalonika ainou samko hakü noiküla.

³Nungthannyi nai sam Sidon nai shingoi. Julioüh Paul tü atsüojinyang hankü apa haiso dongai khukü apa ti pohkü noin nung kiuau apa khu-i.

⁴Nung ainou tsalokü samüh sheasong Kupra khiamjet phiai asheih tsüsheihkü nai khu, tititenai nungko ahsheih phoklekü sheihkü noiküla.

⁵Kilikia naiuso Pamfulia shimkü noitsün sheasong yankü khuküta, sam Lushia nai Mura noksong ai shin.

⁶Nungai tsom khako APAOU nou Itali ai khuau Alekandria noksong ainou kheng tsak ep, naiuso apaüh sam nungko niathio.

⁷Ajekhaiu piakü wanküta sam jeikü Naida shimkü shisao, naiuso loüh ahsheih nou tsümei shioko sam Salmon shimkü Kreta phiai khu.

⁸Nung khiamjet lemkü jeikü khukü Kheng noitsün Amei ta jontsün tsak, sübao shimkü Lasea noksong noiküla, sam nungai shin.

⁹Samüh nungai atao laiukü wan, khiamyam tsülaokü thatü angja iula, tititenai nung taoko Ashiohsantsün Ajekhaiu nou yankü noiküla. Nungtiphe Paulüh ngüso tü nungso alotsüo kiukü:

¹⁰ngüso tü ngiom, “Asonghoi nouso, kheng nai noitsün thsa naiuso khenglu tsüde, lüko sam aa saokü sheasong yamai alothe naiuso amowan asong songau angja noin ta ngü epsanji.”

¹¹Lüko tsom khako APAOU nou Paulüh ngiotsün nouko to kheng APAOU naiuso kheng niakeitsün nou ngiotsünbao tekkü angio ang.

¹²Auo nai shamao kheng noitsün tsülatha nou shioko jeikü Finika shisaonai, nungai auo tao shamkü hau ngüso apia nou nung ainou khuau thaiutha ngiolu. Foinix tü ajenap etsai naiuso ajepek etsai noitsün Kreta khiamjet nai kheng noitsün tsak noin.

¹³Tilai ajepek etsai nou ahsheih shethopkü sheih, ngüsoüh ngüso ayang shinapiu ta yangkü kheng noiau tensankü, Kreta khiamjet khiamkou shimkü khu.

¹⁴Lüko laiukü tsünoikü nung ainou ah-uo-ahsheih asong tsak khekkü, “Shingan Ahsheih” ta jontsün ahsheih thatü thsüokü tsak shin.

¹⁵Tilai kheng lolao naiuso asheih dongai kha phokleau tsüshio, sam yaang nai tanat, naiuso ahsheih noulu sam niakei-in.

¹⁶Kauda ta jontsün khiamjet ehen tsak phiai ahsheih tsüsheih künai khukü, samüh jeikü kheng ehen nou kankü shiau shio.

¹⁷Tilai ngüsoüh nung loksan, ngüsoüh kheng khemai auo nou hachukü kheng keijikan. Naiuso Sirta singtso chiai ngüso thonge ta hatkü, ngüsoüh atsakeitsün lotham, naiuso nungti ahsheih nou sam niakei-in.

¹⁸Ah-ou-ahsheih nou sam thatü jeiat nou shioko, nungthan nyi nai ngüsoüh khengnai taiutsün thsa wanan.

¹⁹Naiuso samnyi nai ngüsoüh meshen pha nou kheng nai suntsün jengtsaiu wan.

²⁰Tilai aje lüko, kianthsüo lüko sam tü ajekhaiu piakü tsüjelut, naiuso ah-ou-ahsheih thatü tsülaokü iula, nungai sam kipsanau ayangtsün apem kheman.

²¹Ngüsoüh atao laiukü eheshiu tsüheshiukü shiküta, Paulüh ngüso ongko tsakü ngiom, “Asonghoi nouso, asamüh ngü tü angau noiküla, naiuso Kreta ainou tsükhuau noiküla, naito nung alothe naiuso amowan tsüepela.

²²Lüko lo mong lüsong ta ngo asam tü lotsüoji! tititenai kheng tü simkü asam ongko sau aa tsümowane.

²³Tititenai ngü sau ün nou noin, naiuso sau tü ngü yathsüoji, nung Goa ün hong tsak müso ngo shimkü tsakü ngiom,

²⁴‘Paul, lahat! Kaisar khako ni tsa au noin. Athaplu, niko hakü süme eiutsünso aa nou apem Goa nou ni hau kiuwaniu.’

²⁵Nungtiphe asonghoi nouso, monglüsong! tititenai ngü tü chitetsünli atsüoting nungtilu shinape ta ngo Goa da monglamji.

²⁶Lüko khiamjet tsak ko sam thonge-ela.”

²⁷Lüko tilai chekü püle asu shi, Adria khiamnok ai sam tsakaijam tsakaijam ta haiukeinai, ahwem taoko kheng niatsünsoüh goumchi tsak shimkü khuji ta yangsan.

²⁸Ngüsoüh khiam aokün tü lilu, naiuso phayam eknime noikü ep. Loüh intso noiküta ngüsoüh müjam lilushinai, phayam chekü pungo noikü ep.

²⁹Lungkap khiamkou nou tü sam thongeküle ta hatkü, ngüsoüh khengmi ainou kheng nyincheiau püle thio, naiuso ah-nge nou tü mongthonkü taiuküla.

³⁰Nai kheng niatsünso kheng khuwanau kowenai, ngüsoüh kheng khanai, kheng nyincheiau nouso thiojili hankü, ngüsoüh kheng ehen nou khiamnok ai lothamküta sao-i,

³¹Paulüh tsom khako APAOU naiuso ehühoi nouso tü ngiom, “Nungso kheng nai tsütaiunai, asam kipsanau tsüshio-e.”

³²Nungaih ehühoi nousoüh kheng ehen phantsün auo nouso hethat küta nung saowani.

³³Ah-ngeau taoko Paulüh ngüso tü tso heau kojakü ngiom, “Asam lonyi nou cheküpülenyi ngoikü ti tsühekü keithonji.

³⁴Nungtiphe asamüh tso eheshiu heau thaiutha ngü kojaji, tititenai nung asam kipsanau thaiutha noin, asam saulúnou khaiuo tsaktso tsüsa-ane.”

³⁵Nung ngiokü Paulüh themtsai loküta ngüso apem khako Goa nianlomkü ngeppekü heau yachu.

³⁶Nungai ngüso chikü oukongshikü iula, naiuso ngüsoüh lüko heshiu.

³⁷Kheng nai noitsün sam apem nai mepem haove 276 noiküla.

³⁸Ngüsoüh mongtsamkü heshiuküta ngüsoüh kantsün jengtsaiu nouso khiamnok nai yakthiokü kheng lohek-in.

³⁹Tilai ahom shin, lüko ngüsoüh goh tsüepsankü nung chiai kheng khuau shio-e süne tsüshio-e ta yanghe.

⁴⁰Kheng nyincheitsün apem lekkankü khiamnok nai taiuküta nung taokolu kheng niakeitsün nou khiupuo ketsün soktham. Akhongtsün ne ahsheih dongai loksankü ngüso khiamkuo dongai khu.

⁴¹Lüko sheasong nime wao-etsün nai napkü, kheng nou goh tü thong, nung khengkha nai thongetsün shioko alemlemau tsüshio, naiuso khengmi nai khiampek athsüoting nou lothejikan.

⁴²Naiuso akhotaiutsünso tsaklu lüko khiamla lahkü khukü khuwanküle ta yangkü, ehühoi nousoüh ngüso apem loatau sang.

⁴³Lüko tsom khako APAOU nou Paul kipsanau aiu, nungtiphe apaüh ngüso lolao. Nungliko khiamla montsünsoüh ngüso chija kheng ainou sheasong ai hamthiokü aya goh shisaoau thaiutha ngio nou kiu.

⁴⁴Apoi nouso ajantso khiupou chiai, naiuso ajantso kheng alothe nai khukü shisaoau apaüh ngiokhem kiu. Nungti ngüso apem goh ai meikü thakhu.