Read Khiamniungan Naga Hong 28 Bible Online

Hong 28 - Khiamniungan Naga bible

Hong 28

¹Tilai sam thako nungai khiamjet nou Mileta ta jontsün samüh ngen.

²Melemaohaiüh sam tü thatü meikü thangakü kankei, tititenai ah uo nou shioko, naiuso chong nou shioko, ngüsoüh in nou jahkiukü sam apem lu.

³Lüko Paulüh pai aketsak kamshikü nungso aokhan nai thioküta, inlam nou pao tsak sung-in, naiuso nung apa pha ai kumlut.

⁴Tilai Melemao haiüh pao nou apa pha nai tsülaolaokü ep, ngüso tsaküh tsak ko chitekü ngiom, “Nungto atsüoting khaiunia loattsün tsak. Apa sheasong ainou thakhu lüko loüh ayam nai mikhem kiutsün nou apa aa noiau tsüngioji.”

⁵Nungti lüko apaüh pao nou in nai yakthio, naiuso apa da ti tsütawai.

⁶Lüko ngüsoüh apa pem pume tsüdekünai alekta yaktaiukü eane ta yang, lüko tilai ngüsoüh laiukü taiukü noiküla, naiuso apa da ti tsümeikü tsüthawaokü ep, ngüsoüh ngüso mongyang phokle, “küta apa goa tsak ta ngiom!”

⁷Nung athang shimkü khiamjet nai atengting tsak nian nou Publio ün eiu ajantso noiküla. Apaüh sam monglingkü loküta, samnyi apaüh sam thatü meikü sao-in.

⁸Nungai Publio po kiyashi naiuso she-iu thaikia nou kiakü noiküla. Paulüh apa dongai sungkü misao sao, naiuso apa ta pha nou thangkü apa lomei.

⁹Tilai nung chhin, khiamjet nai akia apoi nouso shikü ngüso lüko apaüh lomeikiu.

¹⁰Loüh ngüsoüh lüko sam tü thatü asuhatkü kankei, naiuso tilai sam kheng nai khu, samüh pohkü noitsün jengtsaiu nouso ngüsoüh kheng nai lokthiokiu.

¹¹Alei süme yanküta sam Alekandria noksong ainou kheng tsak ko khu. Nung kheng nou khiamjet nai auo thathonkü shaman, naiuso nung kheng nian nou “Thso-ib goa” ta jonkü noiküla.

¹²Sirakusa nai noikü nungai samnyi shaman.

¹³Nung ainou sam kumkü khukü Regia sao. Ajekhaiu tsak noiküta ajepek etsai ahsheih tsak shiau yalo, naiuso nenyi nai sam Puteoli ai shin.

¹⁴Nungai samüh deisinio amonglamhoi epkü ngüsoko chinyatnyi shamau koja. Küta sam Rom ai shi.

¹⁵Nung ainou tilai deisiniosoüh sam thaiutha lula, ngüsoüh Apia Chaikam naiuso mesanhai tsam süme saokü sam hau waoshen. Tilai Paulüh ngüso ep, apaüh Goa nianlom naiuso oukongshi.

¹⁶Tilai sam Rom ai shin, Paul apa jimtsün ehü nouko apa pemsa noi-iau ngiokiu.

¹⁷Samnyi noiküta apaüh Yihudahai ongko asonghoi aikü jonkam. Tilai ngüso kamshi, apaüh ngüso tü ngiom, “Deisinioso, ngo asam khaiunia tsüdekünai sam paosipo don thako ti tsükankei, nungti lüko Yirusalem ainou Romhai pha nai ngo thumkü khothioau kiu.

¹⁸Ngüsoüh ngo liluküta sokau aiu, tititenai ngü eau maikü ti ngio tsünoiküla.

¹⁹Lüko tilai Yihuda haiüh nung thako chite, ngü Kaisar saokü chiteshi-e ta ngiokü hau iula, nungti lüko ngo meshen mele thaiutha tso aphio lothio kiu-e ta tsüde,

²⁰nung thako samko pheteau naiuso ngüko chiteau thaiutha ngü asam jonthio; tititenai Israelhai ayang nai nung son auo nou ngo kekü noin.”

²¹Ngüsoüh apatü ngiom, “Samüh Yihuda ainou athaiutha thsam ti tsüep, tsüdekünai deisinioso ongko nungai shikü athaiutha ti tsümeikü ngem kankü tsüshi tsüdekünai tsüchite.

²²Lüko ni ti yangji nung samüh ni ainou lolaoau aiuji, tititenai apemai nung hoi thaiuthalu chiteji ta samüh ngekü noin.”

²³Tilai ngüsoüh apa thaiutha ajekhaiu tsak singsan, ngüso piakü apa noitsün nai shin. Naiuso ahom ainou anyi saokü, Mosa Ngiokhem naiuso E-po nouso thsam ainou apaüh Goa nokshing thaiutha mitha kiukü, naiuso Yisu thaiutha ngüso shiolokü ngüso tü ngio nou sasakü chim.

²⁴Ti ngio chite, nungso ajantsoüh monglam, naiuso ajantsoüh tsümonglam.

²⁵Tilai ngüso kheng nai ngio tsüjeiaikü iula, nungko ngüso wonau yachu, Paulüh nung ngio ngiom, “Asio Onthso nou E-po Isaia tsangkü asam paosipo tü atsüoting nungti ngio-iu!

²⁶Tititenai apaüh ngiom, ‘Lükhu küta nung mele tü lüngio: Asamüh alu to lu-e lüko laitso tsüngela-e; asamüh epto eppe, lüko laitso tsütsangshei-e.

²⁷Tititenai nung khaiuniahoi mong lilai-aniu, naiuso ngüso noukhan kekaniu, naiuso ngüso niovei maishi-iu. Nungti tsüdekünaito ngüso niovei nou eppe, ngüso noukhan nou lula-e, ngüso mongpem nou ngela-e, naiuso ngüso jüdongai phoklekü shi-e, küta Ngo ngüso lomeikiu-e ta Goa nou ngioji.’”

²⁸Nungti Paulüh philo: “Nungtiphe nung Goa aasantsün Melemaohoi dongai hongkü noin; ngüsoüh lüko nung lula-e ta asamüh nung ngio lüngio!”

²⁹Naiuso tilai apaüh nung ngio nouso ngiom, Yihudahai ngüso si ngüso ongko thatü thsüokü sei-ekü pungekü khuwan.

³⁰Pon nime ngoikü Paul apa kihtsün tsam mai kiukü kih, naiuso apa dongai shitsünso apem apaüh monglingkü lou.

³¹Apaüh Goa nokshing thaiutha naiuso APAOU Yisu Khrista thaiutha thatü khakhakü chim, naiuso sauüh apa tsükiapjei.