Read Khiamniungan Naga Hong 3 Bible Online

Hong 3 - Khiamniungan Naga bible

Hong 3

¹Nyitso Peter si Yohan ne süme baji tao thatsonai amkham tsamai misao au sungkü noiküla.

²Nungko achetnai yakü chiune khaiunia tsak amkham tsamai sungtsünso ainou saoheau thaiutha Alengamei ta jontsün amkham tsam Bekhan dongko ngüsoüh ajekhaiu pungkü kankü khukü taiukiu.

³Apaüh Peter naiuso Yohan ne amkham tsamai anap epkü tangka sao.

⁴Nungaih Peter si Yohan neüh apatü thapkü ngiom, “Sam tü athap!”

⁵Ngüne ainou tsotsak eppe ta yangkü, apaüh ngüne tü ang.

⁶Lüko Peterüh ngiom, “Ngo tangkason naiuso chaiou tsütaiu, lüko ngo ti taim, nung nihau kiuko: Nazarethai nou Yisu Khrista nianko ni tsakü lütsakei ta ngo ngiokhem kiuji!”

⁷Nai apaüh apa pha uai nou thalokü tenthsüo, naiuso nungailu apa hok channiu saokü oukongkü iula.

⁸Apa hamkü tsaküta tsakeijikan, naiuso hamkeikü Goa nian lomkü, apa ngüsoko aikü amkham tsamai sungh.

⁹Khaiunia apemüh apa tsakeikü Goa nian lomkü ep.

¹⁰Nai amkham tsam Aleng Amei bekhan dongko moknoikü saohetsün ta ngüsoüh seisan, küta apa tü ti thawao, nung athanga ngiongem nou ngüso mong soisoileklek nou mean.

¹¹Solomon amkham tsamsuo ta jontsün nai nung khaiunia nou Peter naiuso Yohan neko chitekü noinai, khaiuniahoi ngakü ngüso dongai kopkü shikü kamshi.

¹²Tilai Peterüh nung ep, apaüh khaiuniahoi tü ngiom, “Israelhai, asam tiau nung khaiunia thaiutha ngaji? Tsüdekünai sam momo oukong nai asio nou apa tsakei-inli tiau asamüh sam tü langlutkü thapji?

¹³Abraham, Isak, naiuso Yakob Goa, sam paosipo Goa nou apa Thso Yisu hau ajinka kiu. Lüko asamüh apa nokpao nokshing nouso hau thumkü kiu, naiuso Pailatüh Yisu leanau thatsankütün phiai lüko apa khako asamüh Yisu tsülo.

¹⁴Lüko asamüh asio naiuso amei tsülokü, nunglikoto khaiunia loattsün tsakbao loau kojasan,

¹⁵aa APAOU loat. Lüko Goa nou apa ee ainou ahkü shi-in; nung mitha sam noin.

¹⁶Apa nianko monglam tsangkü apa nian nou nung khaiunia sau asamüh epji naiuso ngen, apa oukongkü iula-in. Ah ti amonglam apa tsangkü noin nungüh asam chikü khako apa siudekü lomeikiu-iu.

¹⁷“Naiuso lo, deisinioso, asamüh nung tsüngekü kankei, naiuso asam nokpao nokshinghoi nousoüh lüko nungti kankei ta ngü ngen.

¹⁸Lüko Goa nou ngüso Khrista omhekü hau noin ta tilüsong E-pohoi apem sontham ngio tsangkü ngiokiu, nungti apa shinappe.

¹⁹Mong phoklekü Goa dongai ashi, naito apaüh asam angei nouso wankiu-e,

²⁰asam thaiutha shingsan nou Khrista nungti Yisu, apaüh hongau thaiutha asam mong phoklekü müjam ashi. Nung thaiutha kümei ainou apa asio E-po nouso sontham ngio tsangkü Goa nou chite.

²¹Apem ashanshitsün atao moshikün chikü apa aün ai taiukü hau noin.

²²Mosaüh atsüoting ngiom, APAOU Goa nou asam deisinio ong ainou asam thaiutha ngoli E-po tsak sungi-e. Apaüh asam tü tilüsong chite-e, nungso apem asamüh apa tü ang-e,

²³nungti iula-e sauhaiüh nung E-po ngio tsü-ange, khaiunia ong ainou ngüso moisemkü mowani-e.

²⁴Naiuso E-po apem, Samuel naiuso apa phiai nouso apem hakü sauhaiüh Goa ngiongem amei kan, ngüsoüh lüko nungso ajekhaiu nai ti shinapküla nung chite.

²⁵Ni ün le nai goumchi kau chikü oukkiu-e ta Abraham tü ngiokü, ti Goa nou asam paosipohoi nouko athalu nou shan, nung athalutsün thsoso asam noin.

²⁶Asam khaiunia pungkü meshen angei yam nouso ainou mongphoklekü shanshitsün tsangkü asam oukkiuau Goa nou meshen Thso chosanküta apa asam dongai aya hong.”