Read Khiamniungan Naga Hong 4 Bible Online

Hong 4 - Khiamniungan Naga bible

Hong 4

¹Ngüso hoi nouko chitekü noinai, mesonhoi naiuso ajeiaikam ehü aniakeitsün naiuso Sadokihoi nouso thatü mongmatkü ngüso dongai shin.

²Tititenai Yohan si Peter neüh hoi noutü Yisu ee ainou ahkü shin ta ngiokü chim.

³Nungaih ngüsoüh Peter si Yohanso tü pha po, naiuso nungtaoko anyiwemphe nungthanyi saokü ngüso akhotsamai taiu.

⁴Lüko ngüso ngio lutsün piakü nou monglamkü khaiuniahoi haove nai heng 5000 thatso iula.

⁵Nungthannyi nai Yihudahai aheihoi, ashe nouso, naiuso Ngiokhem tsandetsünso Yirusalem nai kamshin.

⁶Akhengteng meson Ana naiuso Kaifa, Yohan, Alekander, naiuso akhengteng meson tsammong titso noiküla ngüso hakü kamshin.

⁷Nungko ngüsoüh hongthon nouso ngüso khako tsa-in naiuso ngüso tü sangkü ngiom, “Asamüh nung sau nianko tsüdekünai ti oukong nou chhiji?”

⁸Nungaih Asio Onthso nou meankü Peterüh ngüsotü ngiom, “Hai, nokpao nokshing naiuso petchehoiso:

⁹Outsükongkü khaiunia tsak tü chhi amei chhitsün thaiutha ti in nou apa lomeikiu ta lonyi samtü sangji naito,

¹⁰Nazarethai nou Yisu Khrista, sau asamüh paiphu nai lalut, naiuso Goa nou ee ainou ahkü shi-in, apa nianko khaiunia nung asam khako lomeitsün tsakü noin ta asam chikü naiuso Israelhai chikü nou lüngela.

¹¹Asio ngio nou sübao thaiutha ngioji nung tsak nou Yisu noin, ‘Lung sübao asam tsamlah nousoüh tsülokü wanan nung apem chiko atengtingau iula.’

¹²Amao sau da aasantsün tsünoi, tititenai sam sauüh kipsankü hau noin, aün khemai khaiunia ongko nian titso kiukü tsünoi.”

¹³Ajeiaikam mepemhoi nousoüh Peter naiuso Yohan mongsong nou epnai ngawan, tiautenai ngüsoüh thsam tsüvekü naiuso tsüngekü nou epsan. Nungko ngüso Yisuko noiküla ta ngüsoüh ngekü iulan.

¹⁴Alomei eptsün khaiunia nou ngüsoko tsakü noitsün epkü, ngüsoüh nung chiai ti ngioau tsüshio.

¹⁵Tilai Ajeiaikam nou ngüsotü nung ainou soikü khuau ngiom, nungaih ngüso si ngüso chitekü ngiom,

¹⁶“Nung khaiunia nouso tü samüh ti chhi-e?” “Tiautenai ngüso tsangkü atsüoteng angawantsün athanga chhi tsak chhi-iu ta nung Yirusalemai noinso chikü nou ngekü noin, naiuso samüh nungtü tsüde ta ngioau tsüshio.

¹⁷Lüko hoi ongko pengkü tsükhukü hau, naiuso lonai yakü ngüsoüh nung Yisu nianko sauhau tsüchiteau thaiutha samüh ngüso lohatko.”

¹⁸Nungtiphe ngüsoüh hongthon nouso jonküta Yisu nianko intsotsüo tsüchiteau tsüdekünai tsütsandeau ngiokhem kiu.

¹⁹Lüko Peter si Yohan neüh ngüso tü thalakü ngiom, “Goako naito asam ngio angau ayam süne tsüde, asamüh ngio sasakü angio.

²⁰Tititenai sam pemüh ti ep naiuso lula, nung thaiutha samüh tsüchitekü noiau tsüshio.”

²¹Tilai ngüsoüh hongthon nouso tekkü lohat, ngüso ti-in nou lohat-e nung atsüo tsüepkü hoilun hatnou shioko ngüso sokkan; tititenai ti chhin nung thaiutha khaiunia apem nou Goa hau nianlomkiu.

²²Tititenai sau da nung alomeitsün athanga chhin, nung khaiunia achetpon aopülekü simkü thatso noiküla.

²³Peter si Yohan ne sokkü thonkü ngüne, hoiso dongai shikü Akhengteng mesonhoi naiuso petchehoi nousoüh ngüne tü ngiotsün apem chiten.

²⁴Tilai ngüsoüh nung lula, ngüso apem nou mong tsakhau thekü Goa tü ngiom, “Oh APAOU, goum, aün, khiamnok, naiuso nungko noitsün apem shantsün!

²⁵Asio Onthso nai sampo David ni yathsüotsün sontham nou ngiom, ‘melemao nouso tiauta mongmat sung; tiau khaiuniahoi nousoüh yaang tsümeikün mongthat that?

²⁶Goumchi nokpao nouso ngüso chija khemlo, naiuso nokpao nokshing nouso APAOU Messia thako khengshiau kamsan.’

²⁷Nungti ni shingsan nou Asio Thso Yisu thako, nokhoi naiuso Israelhai nouko Herod naiuso Pontius Pailat nung noksongai aikü kamshikü noiküla.

²⁸Tititenai apha naiuso ni thatsan nou tilüsong shinapiau ayanai khemlo.

²⁹Nungtiphe lo, Oh APAOU, ngüsoüh lohattsün alolaosai.

³⁰Athso Asio Yisu nian tsangkü, athanga naiuso ii nouso chhiau, naiuso alomeiau apha nou sam tü athan.”

³¹Tilai ngüsoüh misaotsün khem, ngüso aikü kamkü noitsün athang saiusaiu, naiuso ngüso chikü Asio Onthso nou meankü iula, nungko ngüsoüh Goa ngio mongsongkü chite.

³²Ngüso amonglamhoi nouso mongpem onthso tsak hau thekü noi. Saulünou meshenüh taiu nou meshen ün ta tsüngio, lüko jengtsaiu apem aikü ün hau iulan.

³³Oukong nai hongthonhoi nousoüh APAOU Yisu ahkü shitsün thaiutha mitha kiu naiuso atsüojin asong ngüso apem khako noiküla.

³⁴Tititenai ngüso ongko sau ti-inüh lukü tsünoi, tititenai goh tsüdekünai tsamthang taiutsünhoi nou nungso jan,

³⁵naiuso ajantsün amai kankü shikü hongthonhoi dongko taiukiu, naiuso nungko khaiunia pungkü meshenüh pohkü noitsün yangkü janelo.

³⁶Nai Levi kau ainou Yosep sau Kupra nai chet, sau tü hongthonhoi nou Barnaba (Alotsüotsün) ta jon,

³⁷apaüh eiu tsak taiu nou jan, küta tangka nou kankü shikü hongthonhoi khako taiukiu.